Ձեր վստահելի աղբյուրը

«Օտար լեզուներ սովորելու համար առավել շատ նախընտրում են դիմել արդեն որոշակի համբավ ունեցող լեզվի կենտրոններին, քան անհատներին», - Հայաստանում լեզուների ուսման մասին խոսելիս ասաց օտար լեզվի մասնագետ, դասախոս Լիլիթ Սարգսյանը:

Նրա խոսքով` ներկայումս լեզուների ուսուցման շուկայում բավական կոշտ և սուր մրցակցությունն է: «Կան լեզվի կենտրոններ, որոնք, թերևս, չտալով լեզվի իմացության որոշակի որակ, տարբեր ակցիաներով և ծավալուն գովազդով մարդկանց են ներգրավում, դրանով հարվածելով մյուս և որակյալ մասնագիտական թիմ ունեցող ուսման կենտրոններին: Վերջիններս էլ ստիպված են լինում ենթարկվել թելադրվող խաղի կանոններին և իջեցնել դասընթացների գները: Բնական է, որ դա էլ բերում է վերջիններիս նկատմամբ վստահության որոշակի նվազման», - ասաց մասնագետը:

Նրա խոսքով` քանի որ Կրթության և գիտության նախարարությունը համապատասխան լիցենզավորում է պահանջում միայն այն ուսումնական հաստատություններից, որոնք գործում են պետական ծրագրերին և չափանիշներին համապատասխան, լեզվի կենտրոնների ուսուցման որակի հարցերը հիմնականում անտեսված են:

«Կան լեզվի կենտրոններ, որոնք տալիս են դասընթացների մասնակցության վկայականներ, բայց դրանք քիչ են: Բնական է, որ պետական կարգի վկայականներ կարող են ստանալ միան այն ուսումնական հաստատությունները, որոնք համապատասխանում են պետստանդարտին: Սակայն, միաժամանակ պետք է փաստել, որ լեզու սովորողին հաճախակի չի հետաքրքրում ավարտական փաստաթուղթը, որքան հենց մատուցվող առարկան: Եվ այստեղ նույնպես որակականի և քանակականի խնդիր է առաջանում, քանի որ շատ լեզվի կենտրոններ գոյություն ունեն հենց ուսանողների քանակի հաշվին, որը երբեմն սեզոնայնության միտում ունի», - նշեց նա:

Ըստ բանախոսի` լեզուներով մեր համաքաղաքացիների հետաքրքրվածությունն ունի իր սեզոնայնությունը: «Երբեմն աճում է պահանջարկն անգլերենի և ֆրանսերենի նկատմամբ, հիմնականում` աշնանը, կապված ուսումնական տարվա հետ: Այս կամ այն միջազգային երևույթներն ազդում են նաև մյուս լեզուների պահանջարկի վրա: Ամռանը մոտենալուն պես մեծանում է հետաքրքրվածությունը վրացերենի, թուրքերենի նկատմամբ: Սիրիայում քաղաքացիական պատերազմից առաջ բավական մեծ էր արաբերենի պահանջարկը», - հայտնեց մեր զրուցակիցը:

Նրա խոսքով` ներկայումս անգլերեն լեզվի դասընթացների ամսական նվազագույն վճարը 5 հազար դրամ է, գրեթե նույնքան են նաև այլ եվրոպական լեզուները, իսկ արևելյան լեզուները սկսվում են 10 հազար դրամից:

Ինչ վերաբերում է անհատ դասախոսների մոտ ուսանողների թվի պակասելուն, ապա, ըստ Լ.Սարգսյանի, այստեղ դերակատարություն ունեն մի քանի գործոններ: «Նախ` անհատը չի կարող զբաղվել համապատասխան գովազդով, որպեսզի նոր հաճախորդ գա: Նրա հիմնական աշակերտները նրա անմիջական շրջանակներից են կամ բարեկամ – ծանոթների մոտից: Բացի այդ, մեծ դեր է խաղում դասախոսի տարիքը, մեթոդաբանության իմացությունը: Ոչ պակաս կարևոր են նաև դասընթացների անցկացման վայրը և դրա մատչելիությունը: Այս պայմանը կարևոր է նաև ուսումնական կենտրոնների համար», - նշեց լեզվի մասնագետը:

Եզրափակելով` Լ.Սարգսյանը նշեց, որ հայաստանցիների մոտ, այնուամենայնիվ, օտար լեզուների հանդեպ հետաքրքրվածությունը բավական բարձր է, բայց ուսուցանելը մեծապես կախված է դասընթացների մատչելիությունից: