Ձեր վստահելի աղբյուրը

Կոտայքի մարզի Պռոշյան համայնքի գյուղապետ Հրաչ Մուրադյանի սպանության գործով նախաքննությունը դեռ առաջընթաց չի արձանագրել. գործով միակ կալանավորված Արայիկ Պետրոսյանի կալանքի ժամկետն արդեն մեկ անգամ երկարացվել է, և նրա փաստաբանը շարունակում է պնդել, որ նրան ապօրինի են կալանավորել: Panorama.am-ի թղթակցի հետ զրույցում փաստաբան Գիվի Հովհաննիսյանը փոխանցեց, որ Արայիկ Պետրոսյանին չեն ճնշում, բայց նաև քննչական գործողություններ չեն կատարում: «Գործողություն չեն կատարում, գործի շրջանակներում ոչ մի բան չեն անում: Բողոքարկում ենք կալանքի որոշումը, դատարանին ասում ենք, բայց դե դատավորն էլ ինչ է, ոնց որ ժեկի աշխատող լինի` շտամպովկա են անում ու վերջ», -կարծիք հայտնեց Գիվի Հովհաննիսյանը:

Հիշեցնենք, որ Արայիկ Պետրոսյանին մեղադրանք է առաջադրվել ՀՀ քրեական օրենսգրքի 104-րդ հոդվածի 2-րդ մասի 2-րդ կետով (Սպանությունը, որը կատարվել է անձի կամ նրա մերձավորի՝ կապված այդ անձի կողմից իր ծառայողական գործունեության կամ հասարակական պարտքի կատարման հետ) և 235-րդ հոդվածի 1-ին մասով (Ապօրինի կերպով հրազեն, բացի ողորկափող հրազենից և դրա փամփուշտներից, ռազմամթերք, ակոսափող հրազենի փամփուշտներ, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը):

Փաստորեն, Հայաստանի ոստիկանապետ Վլադիմիր Գասպարյանի հայտարարությունը, թե իրենք պատրաստ են գործով նախաքննությանը արժեքավոր տեղեկություն տրամադրելու համար 5000 ԱՄՆ դոլար նվիրել, արդյունք չի տվել: Հակառակ դեպքում, ըստ փաստաբանի, նախաքննությունը տեղից կշարժվեր: «Այդ հայտարարությունը ցույց է տալիս, որ գործը բացահայտված չէ, և ինչ-որ մեկին պատրաստ են այդքան գումար պարգևատրել բացահայտելու համար», -նկատեց Գիվի Հովհաննիսյանը: Փաստաբանը, սակայն, չի բացառում, որ մարդիկ սոցիալական այնքան ծանր վիճակում են գտնվում, որ այդքան գումարի համար պատրաստ կլինեն ցանկացած տեղեկություն տրամադրել:

«Երկրում հանցագործության բացված գործի համար 5000 դոլար պարգևատրում չեն տալիս, որևէ տեղ նման բան չեմ տեսել, չգիտեն` ով է կատարել, բայց փաստն էլ այն է, որ Արայիկ Պետրոսյանը մինչև հիմա անազատության մեջ է», -նկատեց Գիվի Հովհաննիսյանը:

Ոստիկանապետի կողմից 5000 ԱՄՆ դոլար պարգևատրման խոստման մասին առաջին անգամ հայտարարել էին ԱԺ դաշնակցական պատգամավորներ Արմեն Ռուստամյանն ու Աղվան Վարդանյանը, որոնք հանդիպել էին Վովա Գասպարյանի հետ և տեղեկացել իրենց կուսակից Հրաչ Մուրադյանի սպանության գործով նախաքննության ընթացքին:

Փաստաբան Հովհաննիսյանը չի կարող ասել, թե գործով նախաքննությունը փակուղո՞ւմ է հայտնվել, թե՞ ոչ: «Ես միայն մի բան կարող եմ ասել, որ ապօրինի է կալանավորվել իմ պաշտպանյալը: Իսկ թե իրանց համար դա փակուղի է, թե ոչ, չեմ կարող ասել: Սակայն մի կողմից էլ կարելի է ասել, որ եթե ոստիկանապետն այդպիսի հայտարարություն է անում, նշանակում է, որ իրենց օպերատիվ աշխատանքներով հավանաբար փակուղու առաջ են կանգնել», -հավելեց փաստաբանը:

Կարդացեք նաև. Մարդասպանն ազատության մե՞ջ. Պռոշյանի գյուղապետի սպանությունը խախտել է Պետրոսյանների անդորրը