Ձեր վստահելի աղբյուրը

Մրգաշատի եվրավերանորոգված ու լուսավոր գյուղապետարանի շենքում այցելուին առաջինը դիմավորում է «Վարկը հույս է» գրությամբ վարկային կազմակերպություններից մեկի գովազդային պաստառը, որտեղ կազմակերպությունը հորդորում է գյուղացիներին վարկեր վերցնել ու ներկայացնում գումարը տրամադրելու պայմանները: Այս գյուղում, որտեղ շուրջ 6.500 բնակիչ կա, 80 տոկոսը տարբեր բանկերի ու վարկային կազմակերպությունների վարկառու են համարվում: Հույսը դրել էին այս տարվա բերքի վրա, սակայն կարկուտը օդ ցնդեցրեց այդ հույսը, և հիմա կանգնել են փաստի առաջ: 

«Աշոտ 26.660+2800+400+220+7650+2450+1170» Մրգաշատ համայնքի խանութի պարտքի հսկայական ցուցակում գրանցված գյուղացիներից մեկն է. անվերջանալի պարտքեր է հավաքել ընտանիքի հայրը, բայց դեռ չի փակվել: «Փող չկա», - մեզ հետ զրույցում ասում է գյուղի խանութի վաճառողուհին:

Խանութում, բացի առաջին ահրաժեշտության մթերքներից կան նաև «աման-չամանեղեն», բայց դրանց վրա նայող չկա: «Մինակ ուտելիք են առնում», -նկատում է վաճառողուհին ու ասում, որ գյուղացիների մեջ պարտք մոռացող չկա` թոշակով լինի, թե ինչ ձևերով, բերում, պարտքը փակում են:

Մրգաշատի բնակիչ Հովհաննես Սողոմոնյանը 800 հազար դրամ վարկ է վերցրել` հույսով, որ ծիրանը կվաճառի, վարկը կտա: Սակայն կարկուտը փչացրել է ծիրանը, իսկ մթերող ըննկերությունն էլ կիլոգրամը 50 դրամով է վերցնում: «Օգուտ չկա», -եզրակացություն է արել համայնքի բնակիչը: Այգու բերքն է կորցրել, բայց կառավարությունը նրան դրա դիմաց եգիպտացորենի սերմ է տվել: «Կուկուռուզի սերմը տալիս են կարկտահարված այգու տիրոջը: Ես 1 հա այգու բերք եմ կորցրել, իրանք ինձ կուկուռուզի սերմ են տվել: Ինձ պետք ա 100 տոննա սերմ տային, ես տանեի ծախեի, որ ինչ-որ իմաստ ունենար իրանց տվածը: Որտե՞ղ ցանեմ ես էդ սերմը», - չեխական People in Need կազմակերպության ծրագրով Արմավիրի մարզ այցելած լրագրողներին ասում է Սողոմոնյանը ու մատնանշում իր հարևաններին, որոնցից շատերը գնացել, իսկ «շատերն էլ ճար չունեն, որ գնան»:

Մրգաշատի գյուղապետ Գևորգ Դանիելյանի աշխատասենյակը լուսավոր է, ընդարձակ: 13 տարի է` համայնքի գյուղապետ է: Հանրապետական կուսակցության անդամ է: Հպարտանում է` գյուղի մշակույթի տունն է հիմնովին վերանորոգվել, մանկապարտեզը, բուժամբուլատորիան, երկու դպրոց կա գյուղում, որոնք ջեռուցված են: Բայց գյուղի ունեցած միակ երաժշտական դպրոցը չի վերանորոգվել: Գյուղապետին այս 13 տարվա մեջ չի հաջողվել նաև գյուղի ճանապարհները նորոգել: 

Իր համագյուղացի Հովհաննես Սողոմոնյանի դժգոհությունը, ըստ գյուղապետի, պատճառներ ունի. «Եթե ես մեկին չեմ սիրում, ապա ինչ ասես, կասեմ: Կառավարությանը չի սիրում: Էդ ով որ ասում ա, գլոխը մեծ ա, բայց մեջը բան չկա»:

Մայիսի 12-ին տեղի ունեցած կարկտահարությունից գյուղը խեղճացել է. կարկուտից 80-100 տոկոսով տուժել է 1130 ընտանիք, որոնք ընդգրկվել են գյուղապետի կազմած ցուցակում: Ընտանիքների ընտրությունը կատարվել է հաշվի առնելով մի շարք հանգամանքներ` ապրում են «դոմիկներում», հաշմանդամություն ունեն, բազմանդամ են:

Գյուղացիներից մի քանիսն անգամ լքել են Մրգաշատը: Գյուղապետը շտապում է հուսադրել. «Հիմա գնանք, ման գանք, կտեսնեք, որ փակ դուռ չկա, մարդիկ են գնացել, ոչ թե ընտանիքներով, հելել գնացել են: Լիժբի, իմ աներձագը երկու տղեն, կինը, սաղ նաֆարը (ընատնիքը -հեղ.) ստեղ ապրում ա, ինքը գնացել ա Ռուսաստան` աշխատելու: Բերենք կապենք կարկուտի հե՞տ: Որ լավ գործ ըլնի, մի իրեք ամսով Ռուսաստան գնամ, աշխատեմ, գամ, ես էլ կէթամ-կգամ, ի՞նչ ա եղել»:

Հսկայական վարկերի, դրանց տակից դուրս գալու և առօրյա հոգսերի տակ կքած գյուղացու աչքին չի երևում կառավարության տված մի քանի գդալ եգիպտացորենի սերմնացուն ու ձմեռվա վառարանի «կպչանի համար» 5 լ դիզելային վառելիքը: Իսկ դրանից բխող դժգոհությունների պատճառը գյուղապետը գտել է. «Եթե մարդիկ ընդդիմություն են, լավատես չեն, ուզում ես մի մեշոկ տուր, մեկա` ասելու ա լավ չի»:

Կարդացեք նաև`

Մանկավարժական համալսարանում կարկտահարված Մրգաշատի բնակչից ուսման վարձ են պահանջել (տեսանյութ)

«Ձեզ ենք ընտրել, արա´, եկեք տեր եղեք». Ծիրանը հերթի մեջ փչանում է, գյուղնախարարությունից ասում են՝ արտառոց բան չկա (տեսանյութ)