Ձեր վստահելի աղբյուրը

Գորիսի հայտնի դեպքերից հետո այժմ զինվորական հոսպիտալում գտնվող Արտակ Բուդաղյանի և նրա սպանված եղբոր իրավահաջորդի ներկայացուցիչ, Փաստաբանների պալատի փաստաբան Հայկ Ալումյանը հուլիսի 1-ին գրություն է ներկայացրել Գլխավոր դատախազին` բողոքարկելով ՊՆ քննչական ծառայության որոշումը, որով հետաձգվել էր Արտակ Բուդաղյանին որպես տուժող ներկայացնելու մասին փաստաբանի միջնորդությունը: Այդ մասին Panorama.am-ին տեղեկացրեց փաստաբան Հայկ Ալումյանը:

Ավելի վաղ Panorama.am-ը տեղեկացրել էր, որ նախաքննական մարմինը տուժողի իրավահաջորդ է ճանաչել Արտակ Բուդաղյանի հորը` Էմիլ Բուդաղյանին, իսկ Արտակ Բուդաղյանին գործով որպես տուժող ճանաչելու մասին Ալումյանի միջնորդության քննարկումը հետաձգել է` պատճառաբանելով, թե կա գործով մի շարք քննչական-դատավարական գործողություններ կատարելու անհրաժեշտություն:

Ալումյանն ասաց, որ անիմաստ է համարել զինվորական դատախազին բողոքարկելը, այդ պատճառով էլ բողոքարկումն հասցեագրված է գլխավոր դատախազին:

Օրերս Ալումյանը մեզ հետ զրույցում ասել էր, որ արդեն գոյություն ունեցող փաստերի հիման վրա պետք էր Արտակ Բուդաղյանին ճանաչել տուժող, այլ ոչ թե այսքան հետաձգել: «Այդ փաստերը միանշանակ խոսում են այն մասին Արտակ Բուդաղյանին պետք էր ճանաչել տուժող», -ասել էր Հայկ Ալումյանը:

«Ազատություն» ռադիոկայանին տված հարցազրույցում Զինվորական դատախազ Գևորգ Կոստանյանը ասել էր, որ Արտակ Բուդաղյանին որպես տուժող ճանաչելու միջնորդությունը հետաձգվել է, որպեսզի որոշվի, որ անձը հանցագործության արդյունքում տուժել է, այսինքն իրեն պատճառվել է ֆիզիկական, նյութական կամ բարոյական վնաս (իսկ այս դեպքում մասնավորապես), դեռևս անհրաժեշտ են բազմաթիվ քննչական, դատավարական գործողություններ: «Համապատասխան փորձաքննության արդյունքների և այլ ապացույցների համադրության արդյունքում միայն հնարավոր կլինի հստակեցնել գործին մասնակից յուրաքանչյուր անձի դերը, նշանակությունը, և միայն այդ ժամանակ հնարավոր կլինի իրավական գնահատական տալ այդ գործողություններին»,- ասել էր Կոստանյանը:

Նա նաև հնարավոր էր համարել, որ անհրաժեշտ քննչական գործողությունների արդյունքում Արտակ Բուդաղյանը ընդգրկվի որպես մեղադրյալ: «Ամեն ինչ հնարավոր է: Իրավական գնահատականներին կանդրադառնանք հաջորդիվ»,- նշել էր նա:

Հայկ Ալումյանը սակայն դա համարում է «միակողմանի դիրքորոշում» և այդ պատճառով էլ բողոքարկումը հասցեագրել է ոչ թե զինդատախազին, այլ գլխավոր դատախազին:

Գորիսում հունիսի 1-ին տեղի ունեցածի կապակցությամբ, երբ մահացել էր Ավետիք Բուդաղյանը, հարուցվել էր քրեական գործ, կալանավորված են Սուրիկ Խաչատրյանի որդին` Տիգրան Խաչատրյանը և թիկնապահ Զարզանդ Նիկողոսյանը: Հարուցված քրեական գործի շրջանակներում արդեն իսկ հարցաքննվել է սպանված Ավետիք Բուդաղյանի եղբայրը՝ Ասկերանի զորամասի հրամանատար, գնդապետ Արտակ Բուդաղյանը, ինչպես նաև Սուրիկ Խաչատրյանի վիրավորված մյուս թիկնապահ Նիկոլայ Աբրահամյանը: Նշենք, որ Տիգրան Խաչատրյանը և Զարզանդ Նիկողոսյանը «Նուբարաշեն» քրեակատարողական հիմնարկի մեկուսարանում են և, ինչպես ավելի վաղ հայտարարել էր զինդատախազը, մինչև նախաքննության ավարտը մնալու են այնտեղ:

Կարդացեք նաև` 

Արդեն եղած փաստերի հիման վրա պետք էր Արտակ Բուդաղյանին ճանաչել տուժող. Փաստաբան