Դեկորատիվ ջրավազաններում լողանալը հիվանդությունների պատճառ կարող է դառնալ. զգուշացնում է մասնագետը
Դեկորատիվ ջրավազանները նախատեսված չէ լողի համար, թույլ մի տվեք ձեր երեխաներին մտնել այդ ջրավազաններ: Լրագրողների հետ հանդիպման ժամանակ նման կոչով դիմեց ՀՀ առողջապահության նախարարության պետական հիգիենիկ և հակահամաճարակային տեսչության շրջակա միջավայրի և կոմունալ հիգիենայի բաժնի պետ Աիդա Պետիկյանը:
Ըստ նրա, այդ ջրավազանները նախատեսված չեն եղել որպես լողավազան, ջրի ջերմաստիճանը չի համապատասխանում հիգենիկ նորմատիվներին, չի ախտահանվում, թափառող կենդանիներ են մտնում այդ ջրավազանները:
Նա ընդգծեց, որ դեկորատիվ ջրավազաններում լողալը կարող է մաշկային հիվանդությունների, ջրի կուլ տալու դեպքում նաև աղիքային հիվանդությունների պատճառ դառնալ:
Ա. Պետիկյանի խոսքով, իրենք առաջարկել են այդ դեկորատիվ ջրավազաններն էլ սկսել ախտահանել: Ըստ նրա, իրավիճակը վերահսկվում է: Քաղաքային իշխանությունները, բանախոսի կարծիքով, կարող են այդ դեկորատիվ ջրավազանները հարմարացնեն լողավազանների չափանիշներին:
Ի տարբերություն դեկորատիվ ջրավազանների, լողավազանները սանիտարական առումով անվտանգ են, այս դեպքում հսկողություններն ավելի ուժեղ է, քանի որ վերահսկվում են ինչպես տնտեսվարողի, այնպես էլ առողջապահության նախարարության մասնագետների կողմից:
Ինչ վերաբերում է գետերին, Ա. Պետիկյանն ասաց, որ գետերի ջրերը ինքնամաքրման հատկություն ունեն, սակայն չի նշանակում, որ լիովին անվտանգ է. վտանգ է ներկայացնում այն հատվածը, որտեղ ջրի հոսքը դանդաղ է, ճահճացած է, իսկ այն մասը, որտեղ ջրի հոսքն արագ է, խորն է, նույնպես վտանգ է ներկայացնում: Այսինքն, ըստ մասնագետի, կրկին նախընտրելի տարբերակ չէ:
Ա. Պետիկյանն ընդգծեց, որ իրենք պարբերաբար նմուշներ են վերցնում ջրերից ու ուսումնասիրություններ կատարում. այս տարի որևէ արտառոց դեպք չի եղել:
«Սպառողների ասոցիացիայի» նախագահ Արմեն Պողոսյանի խոսքով, Հայաստանը կիսաանապատային երկիր է, իսկ ամռան շոգին հանգիստը կազմակերպելու ամենալավ միջոցը լողանլն է: Նրա խոսքով, պետք է քաղաքային իշխանությունները քաղաքի տարբեր հատվածներում լողավազաններ կառուցեն: Ինչ վերաբերում է դեկորատիվ ջրավազաններին, Ա. Պողոսյանի դիտարկմամբ, ոչ թե պետք է արգելել այնտեղ լողալը, այլ առողջապահության նախարարությունը պետք է վերահսկողություն իրականացնի, ախտահանի, որպեսզի երեխաները հնարավորություն ունեն լողալ, ոչ թե «սարսափեցնեն»:
