Ձեր վստահելի աղբյուրը

Մի խումբ երիտասարդ գիտնականներ ուսումնասիրել են բարձրագույն որակավորման հանձնաժողովի կանոնակարգը, որը բարեփոխելու աշխատանքներ են այժմ ընթանում, ու ներկայացրել են իրենց առաջարկությունները:

Նրանք առաջարկել են մի քանի կետեր թեթևացնել` «բյուրոկրատական քաշքշուկը վերացնելու», ինչպես նաև ատենախոսությունների որակը բարձրացնելու համար: Այդ նպատակով երիտասարդ գիտնականներն առաջարկել են միջազգային Thomson Reuters և Scopus շտեմարաններում ընդգրկված համապատասխան ամսագրերում մեկական հոդված տպագրել:

«Ներկա դրությամբ չի գործում հայկական անտիպլագիատ ծրագիրը, շատ ատենախոսություններ արտատպություններ են: Այդ շտեմարանների ամսագրերում տպագրվող հոդվածները պետք է համապատասխանեն որոշակի չափանիշների, որևէ արտատպություն չի ընդունվում: Այսինքն այս ճանապարհով ուղղակի կկանխվի զեղծարարությունները և գիտական որակյալ պրոդուկտ կտրվի, կտրուկ կնվազեն անորակ աշխատանքները»,- ասաց նախաձեռնության անդամ, տնտեսական գիտությունների թեկնածու, «Տեկտում» ՀԿ-ի նախագահ Անահիտ Մանասյանը:

Բանասիրական գիտությունների թեկնածու, ԵՊՀ դասախոս, «ԱՐՄԱԿԱԴ» ցանցի հիմնադիր Խաչիկ Գևորգյանը նշեց, որ այս քայլով նաև հայկական տեղական ամսագրերի որակը կբարձանա. խմբագրերը շահագրգռված կլինեն, որ Հայաստանում տպագրվող ամսագրերը ներառվեն այդ շտեմարաններում (հայկական ընդամենը չորս ամսագիր է ներառված): Ըստ նրա, որքան շատ հայկական հոդվածներ տպագրվեն այդ ամսագրերում, այնքան կբարձրանա նաև Հայաստանի հեղինակությունը գիտական ոլորտում, հայ գիտնականների աշխատանքներին ավելի շատ հղումներ կտրվեն:

Նրա ներկայացմամբ, այդ առաջարկությունները, որոնք կազմվել են տարբեր քննարկումների արդյունքում, իրենք նամակով ուղարկել են ՀՀ կրթության և գիտության նախարարին, այնուհետև քննարկում է կազմակերպվել, որին մասնակցել են ԿԳ նախարարը, գիտության պետական կոմիտեի ղեկավար Սամվել Հարությունյանը, ԲՈՀ ղեկավար Արտյուշա Ղուկասյանը:

Երիտասարդ գիտնականների առաջարկությունները հավանության են արժանացել, ԿԳ նախարարը հանձնարարել է Ա. Ղուկասյանին այդ առաջարկությունները ներառել բարեփոխումների փաթեթում: 1-2 շաբաթ անց ԲՈՀ-ը հրավիրել է քննարկում, սակայն, նախաձեռնության անդամ, Երիտասարդ կենսաբաններիի ասոցիացիայի նախագահ Արսեն Գասպարյանի գնահատմամբ, հանդիպումը եղել է անարդյունք. «Այնտեղ հանդիպեցինք հակառակ կողմի ներկայացուցիչներին: Քննարկում էր կազմակերպվել, բայց անիմաստ, անարդյունավետ բանավեճ ծավալվեց»:

Երիտասարդ գիտնականների ներկայացմամբ, որոշ ժամանակ անց իրենք երկրորդ նամակով տեղեկացրել են ԿԳ նախարար Արմեն Աշոտյանին, որ իր հանձնարարականը չի կատարվել, այսինքն` իրենց առաջարկությունները չեն ընդգրկվել բարեփոխումների փաթեթում: Դրանից հետո նախարարը ԲՈՀ-ի ղեկավարին նկատողություն է արել հանձնարարականները թերի կատարելու կապակցությամբ: Երիտասարդ գիտնականները չեն ուզում դա կապել իրենց նամակի հետ, այլ համարում են զուգադիպություն:

Խ.Գևորգյանի փոխանցմամբ, Ա. Ղուկասյանն ասել է, որ ԲՈՀ-ը կոմպետենտ չէ զբաղվել ԲՈՀ-ի կանոնադրության հարցերով. «Մենք կփնտրենք ու կգտնենք, թե ով է կոմպետենտ մարմինը»: Ա. Գասպարյանն էլ հավելեց. «Եթե ԲՈՀ-ը կոմպետենտ չէ, ինչո՞ւ նախարարին ասաց` կզբաղվի հանձնարարականով, այնուհետև քննարկում կազմակերպեց»:

Երիտասարդներ գիտնականների խոսքով, իրենք այս նախաձեռնությամբ չեն ցանկանում խոչընդոտել գիտության որևէ ոլորտի զարգացմանը, այլ` ընդհակառակը: Միգուցե առաջին երկու-երեք տարիների ընթացքում կլինեն ոլորտներ, որտեղ թեկնածուական պաշտպանողներ չլինեն, բայց հետո, նրանց համոզմամբ, արդեն կապահովի անհարժեշտ որակ:

Ա. Գասպարյանի դիտարկումներով, ոչ բոլորը պետք է լինեն ասպիրանտ ու ոչ բոլորը պետք է դառնան գիտության թեկնածուներ, ու եթե մարդ այնքան գիտելիք չունի, որ կարողանա այնպիսի հոդված գրել ու թարգմանել անգլերեն, որպեսզի տպագրվի այդ հեղինակավոր ամսագրերում, «ուրեմն թող գիտությամբ չզբաղվի»:

Նախորդող նորություն` Երիտասարդ գիտնականներն առաջարկում են ԲՈՀ-ի կանոնակարգում փոփոխություններ կատարել