Ձեր վստահելի աղբյուրը

Պաղպաղակների շուկայի շուրջ բարձրացված աղմուկին Տնտեսական մրցակցության պետական պաշտպանության հանձնաժողովն առայժմ չի խառնվում:

Հիշեցնենք,  որ«Սուր անկյուն» հաղորդաշարը ԳՆ սննդամթերքի անվտանգության պետական ծառայության տեսուչների հետ համատեղ իրականացրել է նմուշառում, և արդեն կոդավորված նմուշները հանձնվել է լաբորատոր փորձաքննության: Տեսանյութում կոդավորումն իրականացնելիս պարզ է դառնում, որ «Թամարա», «Էլիտ շանթ», «Աշտարակ կաթ», «Անի», «Բիոկաթ», «Ասա», «Գրանդ քենդի», «Չանախ» և «Արմսվիթ շանթ» ընկերություններից «Թամարա», «Էլիտ շանթ», «Աշտարակ կաթ», «Անի», «Բիոկաթ», «Ասա» և «Չանախ» ընկերությունների կողմից արտադրված նմուշառված ապրանքատեսակները չեն համապատասխանում մակնշման պահանջներին:

«Իրազեկ և պաշտպանված սպառող» ՀԿ-ն երեկ հայտարարեց, որ հանրությանը ներկայացվում է կեղծ տեղեկատվություն, որի հետևանքով սպառողները հայտնվում են մոլորության մեջ՝ ձեռք բերելով կաթնաբուսական պաղպաղակը՝ այդ մասին չիմանալով: Իսկ համաձայն «Տնտեսական մրցակցության պաշտպանության» մասին Հայաստանի Հանրապետության օրենքի 14-րդ հոդվածի՝ սպառողին մոլորության մեջ գցելը համարվում է անբարեխիղճ մրցակցության գործողություն:

ՏՄՊՊՀ մամուլի քարտուղար Գայանե Սահակյանը Panorama.am-ի հետ զրույցում նշեց, որ հանձնաժողովը չունի լաբորատորիա, չունի նման հնարավորություններ, որպեսզի փորձաքննություն անցկացնի:
«Սա առաջին հերթին խնդիր է, որը գտնվում է սննդի անվտանգության պետական ծառայության դաշտում»,-ասաց հանձնաժողովի մամուլի քարտուղարը:

Գ. Սահակյանի խոսքով, այս պահին հանձնաժողովը սպասում է ծառայության ուսումնասիրությունների արդյունքներին:
«Այս պահի դրությամբ ծառայությունից ուսումնասիրության արդյունքների վերաբերյալ որևէ տեղեկատվություն չի ստացել: Ստանալուն պես հանձնաժողովը կսկսի ուսումնասիրություն` պարզելու, թե որքանով են տնտեսվարողների գործունեության մեջ առկա անբարեխիղճ մրցակցության դրսևորումներ»,-ասաց նա:

Հիշեցնենք, որ Սննդի անվտանգության պետական ծառայությունն ավելի վաղ հայտարարել է, որ ուսումնասիրելով նմուշառված արտադրատեսակների մակնշումը և համադրելով լաբորատոր փորձաքննության արձանագրությունների հետ՝ միայն «Էլիտ Շանթ» ՍՊԸ-ի մեկ արտադրատեսակի մակնշման մեջ է բացակայել բուսական յուղի առկայության մասին տեղեկատվություն:
«Ծառայության պետի 2013 թվականի հունիսի 25-ի N372-Ա հրամանի համաձայն «Էլիտ Շանթ» ՍՊԸ-ում իրականացվում են ստուգումներ: Պաղպաղակ արտադրող բոլոր կազմակերպությունները գտնվում են Ծառայության մշտական վերահսկողության ներքո»,-ասված էր ծառայության հայտարարության մեջ:

Մինչ գերատեսչություններից մեկը ընդամենը մեկ ընկերությունում ստուգումներ է իրականացնում, մյուսն էլ սպասում է արդյունքներին, մարդիկ գնում են ոչ ճիտ մակնշված պաղպաղակը: Այս առումով «Իրազեկ և պաշտպանված սպառող» հասարակական կազմակերպությունը հունիսի 24-ին, հղում անելով ՀՀ ԳՆ սննդամթերքի անվտանգության պետական ծառայության տեսուչի կողմից արձանագրված խախտմանը, կոչ էր արել Ծառայությանը պարզաբանել` ինչու մինչ օրս սխալ մակնշած պաղպաղակները շուկայից դուրս չեն բերվել, այն դեպքում, երբ օրենքը ոչ միայն թույլ է տալիս, այլև պարտավորեցնում:

Նախորդող հրապարակումներ`
«Իրազեկ և պաշտպանված սպառող». Պաղպաղակ արտադրողները հանրությանը ներկայացրել են կեղծ տեղեկատվություն

Ինչո՞ւ շուկայից դուրս չեն բերվել սխալ մակնշած և ցածր որակի պաղպաղակները