Մոլդովացի փաստաբանը Հայաստանի խորհրդարանում Հայաստանն անվանել է «ագրեսոր». Նրան լռեցրել են ԱԺ փոխխոսնակն ու ՍԴ նախագահը
Այսօր խորհրդարանում շարունակվող միջազգային խորհրդաժողովի ժամանակ արտառոց իրավիճակ է ստեղծվել. Մոլդովան ներկայացնող փաստաբան տիկին Աուրելիա Գրիգորիուն ի պաշտպանություն Արդբեջանի ելույթ է ունեցել, որը սակայն անմիջապես արձագանք է ստացել ՀՀ ԱԺ փոխխոսնակի և ՍԴ նախագահի կողմից:
Մանսավորապես, Մոլդովայի խորհրդարանական փաստաբան Աուրելիա Գրիգորիուն անդրադառնալով հայ-ադրբեջանական հակամարտությանը, հանդես եկավ իրականությանը չհամապատասխանող հայտարարությամբ և նշեց, որ «Հայաստանը գրավել է Ադրբեջանի տարածքների 20 տոկոսը՝ ադրբեջանցիների նկատմամբ իրականացնելով ցեղասպանություն»։ Նաև ասաց, որ «Խոջալուի ցեղասպանությունն իրականացրել են հայերը, ինչն այլևս միջազգայնորեն ճանաչված փաստ է»։ Հայաստանի խորհրդարանում մոլդովացի փաստաբանը Հայաստանին անվանեց «ագրեսոր երկիր»։
Տիկնոջ ելույթին անմիջապես արտահերթ ելույթով արձագանքեց ԱԺ փոխխոսնակ Հերմինե Նաղդալյանը և հորդորեց չօգտագործել խորհրդաժողովը ու Հայաստանի խորհրդարանի ամբիոնը՝ սուտ տեղեկատվություն տարածելու համար։
«Անընդունելի է, որ որոշ փաստաբաններ այս դահլիճում պատվերներ են իրականացնում։ Ես չգիտեմ, թե դուք ում պատվերն եք իրականացնում, հարգելի փաստաբաններ, բայց ձեր ելույթները կարող եք ձայնագրել, որպեսզի ձեր պատվիրատուները ձեզ շնորհակալություն հայտնեն։ Ես կարծում եմ, որ այստեղ ներկա բարձրաստիճան հյուրերը պետք է անպայման իրենց անհամաձայնությունը հայտնեն, որ գիտական կոնֆերանսը որոշ մարդիկ փորձում են վերածել անթույլատրելի քննարկման։ Այսպիսի հարցի շուրջ քննարկումներ տեղի են ունենում այնպիսի լսարանում, որտեղ կան մասնագետներ, ովքեր տիրապետում են թեմային, իսկ հայտարարել, որ այստեղ կամ այնտեղ ցեղասպանություն է եղել, շատ նման է մեր հարևանների կողմից ամեն օր հնչող միօրինակ հայտարարություններին։ Ես գտնում եմ, որ տիկին փաստաբանը պետք է ավելի կոռեկտ լիներ իր արտահայտություններում»,- ընդգծեց Հերմինե Նաղդալյանը։
Մոլդովացի փաստաբանը արձագանքեց՝ նշելով, որ իր ելույթով ինքը պարզապես ցանկանում էր ընդգծել, որ բոլոր հակամարտությունները պետք է լուծվեն խաղաղ ճանապարհով։ «Ես չեմ պատրաստվում խորանալ հակամարտության մանրամասների մեջ, ես ուզում եմ ուղղակի ասել, որ անընդունելի է սառեցված հակամարտությունների տարածքներում ոտնահարել մարդու իրավունքները»,- ասաց նա՝ հավելելով, որ ինքը որևէ մեկի պատվերը չի կատարում, այլ իր աշխատանքն է անում՝ «պայքարում է մարդու իրավունքների համար»։
Փոխադարձ երկխոսությանը միջամտեց Լիտվայի օմբուդսմենը, որն ասաց, որ ավելի ճիշտ կլիներ, որ մոլդովացի փաստաբանը խոսեր Մոլդովայի սառեցված հակամարտության մասին, այլ ոչ թե անդրադառնար ղարաբաղյան հակամարտության պատմությանը։ Նա նաև նկատեց, որ տեղը ճիշտ ընտրված չէ նման հարցի մասին խոսելու համար ու առաջարկեց դադարեցնել քննարկումը:
Նույնն արեց նաև նիստը վարող Հայաստանի ՍԴ նախագահ Գագիկ Հարությունյանը և պարզապես հնարավորություն չտվեց Մոլդովայի ներկայացուցչին արձագանքել իր հասցեին հնչած դիտողություններին՝ նշելով, որ այս հարցի քննարկման շարունակությունը երկար երկխոսության կվերածվի։ «Հարգանք ունեցեք, դուք արտահայտվեցիք, նաև լսեցիք ձեր գործընկերների կարծիքն, այսքանով սահմանափակվենք»,- դիմելով նրան հայտարարեց Գագիկ Հարությունյանը։
Լրահոս
Տեսանյութեր
Թշնամnւ հրահանգները մեր կյանք տեղափոխողները Հայաստանի թշնամիներն են. Բագրատ Սրբազան
