Ձեր վստահելի աղբյուրը

Տուրիստական գործակալություններից մեկի աշխատակցի հետ հեռախոսազրույցում ներկայացա որպես քաղաքացի, ով ցանկանում է հուլիսի վերջին կամ օգոստոսի սկզբին հանգիստն անցկացնել ալեկոծվող Եգիպտոսում: Պատասխանեցին` խնդիր չկա, միայն թե Թբիլիսիից է թռիչքը: Ասացի թերթերում կարդացել եմ, որ ԱԳՆ-ն խորհուրդ չի տալիս այդ երկիր մեկնել:

«Ո՞վ է ասել ձեզ: Հետո մենք չենք իրականացնում, վրացական ընկերություններն են իրականացնում: Այնտեղից նորմալ իրականացվում են չվերթները: Ավիաընկերությունն է պատասխանտվություն կրում անվտանգության համար: Հետո էլ Խուրգանդան Կահիրեից շատ հեռու է, համարյա 8 ժամվա ճանապարհ»,-ասաց տուրիստական գործակալության աշխատակիցը:
Նա նաև ասաց. «Հենց այս պահին այնտեղ հանգստացող ունեմ, ամեն ինչ նորմալ է, էդ ցույցերը իրենց մոտ միշտ էլ կա»:
«Բայց վերջին օրերին ինչ-որ սրացել է իրավիճակը»,-քաղաքացու դերի մեջ մտած շարունակեցի ես:
«Էդ դեպքում մի գնացեք, եթե վախենում եք, մարդ կա գնացել, եկել է, իրենք առանց վախենալու գնում են»,-ասաց գործակալության աշխատակիցը:

Panorama.am-ի հետ զրույցում երիտասարդ քաղաքացիներից մեկը, ով պատրաստվում էր ամուսնական ճանապարհորդության մեկնել Եգիպտոս, ասաց, որ ԱԳՆ հորդորից հետո հրաժարվել է այդ մտադրությունից:
«Տուրիստական գործակալություններն ասում են` ամեն ինչ լավ է, բայց հեղափոխությունների դեպքում վտանգի տակ են հայտնվում օդանավակայանները, երկաթգծերն ու հեռուստատեսությունը: Ի՞նչ իմանաս, վաղը ի՞նչ կլինի»,-ասաց մեր զրուցակից երիտասարդը:

Տուրիստական մեկ այլ գործակալության աշխատակցի հետ զրույցում ներկայացա որպես լրագրող: Աշխատակիցն ասաց, որ իրենց հաճախորդներին խորհուրդ չեն տալիս մեկնել Եգիպտոս, ներկայացնում են այնտեղ տիրող իրավիճակը, սակայն լինում են մարդիկ, ովքեր ամեն գնով ցանկանում են հենց այդ երկրում անցկացնել հանգիստը:

«Դուք մեր անվտանգությունից գործ չունեք»,-նման քաղաքացիների խոսքը փոխանցեց տուրսիտական գործակալության աշխատակիցը:

Panorama.am-ն ԱԳՆ հրապարակած համարով` +202 27374157 կապ հաստատեց Եգիպտոսում Հայաստանի դեսպանության հետ:

«Այս օրերին խորհուրդ չենք տալիս ընդհանրապես Եգիպտոս գալ, որովհետև կրիտիկական վիճակ է, ցանկացած պահի կարող է վտանգ առաջանել»,-ասաց դեսպանատան աշխատակիցը:

Նրա խոսքով, վտանգն առկա է ցանկացած քաղաքում, «որովհետև ամբողջ երկրի տարածքում են ցույցերը, միայն Կահիրեի տարածքում չէ: Օրինակ Կահիրեի բոլոր գլխավոր փողոցներում ու հրապարակներում ցուցարներ կան, ցույցերը շարունակվում են, դրա համար մեր քաղաքացիներին խորհուրդ ենք տալիս հետ կանգնել Եգիպտոս այցելելու մտադրությունից»:

Դեսպանատան աշխատակիցն ասաց, որ այս պահին չի կարող ասել քանի հայ ու Հայաստանի քանի քաղաքացի կա այդ երկրում:
ԱԳՆ մամուլի խոսնակ Տիգրան Բալայանը Panorama.am-ին հայտնեց, որ Եգիպտոսում հանգստանալու նպատակով մեկնած հայաստանցիների թվի վերաբերյալ տեղեկություններ չունի, իսկ ընդհանրապես Եգիպտոսում ապրում են 400-ից ավելի հայաստանցիներ, որոնց մի մասը երկքաղաքացի են:

Նշենք, որ Եգիպտոսում ցուցարարները պահանջում են նախագահ Մուհամեդ Մուրսիի հրաժարականը: Մի քանի նախարարներ արդեն հրաժարական են տվել` հայտարարելով ցուցարարներին միանալու մտադրության մասին: Նրանց թվում են նաև տուրիզմի ու ՏՏ նախարարարները:  Ի պատասխան ցուցարարների պահանջի, Մուրսին հայտարարել էր, թե չի պատրաստվում հեռանալ: «Ես չեմ կարող այլ պես անել, ինձ ընտրել է ժողովուրդը, ես մտադիր եմ պահպանել օրենքը և պատրաստ եմ այսուհետ ևս կրել պատասխանատվություն»,-ասել է նա:

Չնայած այս հայտարարությանը, Եգիպտոսում ռազմական հեղաշրջում իրականացվեց:

Վերջին օրերեին Մուրսիի համակիրների և ոստիկանների միջև բախման հետևանքով առնվազն զոհվել է ավելի քան 2 տասնյակ մարդ, վիրավորների թիվ տարբեր տեղեկությունների համաձայն 400-600 է, տուժածների թվում են նաև լրագրողներ: Կահիրեի կենտրոնում գտնվող «Սեմիրամիս» հյուրանոցում ցուցարարների կողմից գործադրված պայթուցիկների պատճառով հրդեհ է բռնկվել: արևանությամբ գտնվող մեկ այլ «Շեպարդ» հյուրանոցը դադարեցրել է իր աշխատանքը և խնդրել բոլոր այցելուներին լքել հյուրանոցի տարածքը:

Ընդդիմության ակտիվիստները վստահեցնում են, որ կարողացել են նախագահական վաղաժամ ընտրություններ անցկացնելու պահանջով ավելի քան 22 մլն եգիպտացու ստորագրություն հավաքել։ Այս թիվը գրեթե 10 մլն-ով ավելի է, քան այն ձայները, որոնց շնորհիվ Մուհամադ Մուրսին մեկ տարի առաջ նախագահ է ընտրվել։

Թեմային հարակից հրապարակում`
Հայաստանի արտգործնախարարությունը խորհուրդ է տալիս զերծ մնալ Եգիպտոս այցելելուց