Ձեր վստահելի աղբյուրը

Մոլդովայի խորհրդարանում հնարավոր է հանձնաժողով ստեղծվի, որը քննության առարկա կդարձնի երեկ Հայաստանի խորհրդարանում Մոլդովայի օմբուդսմենի արած հայտարարությունը: Այդ մասին այսօր Երևանում իր նախաձեռնությամբ կազմակերպված ասուլիսում հայտարարեց Մոլդովայի Սահմանադրական դատարանի անդամ Վիկտոր Պոպանը:

«Ես երեկ կատարվածից հետո խոսել եմ Մոլդովայի խորհրդարանի ղեկավարի հետ, և նա ինձ լիազորել է ցավ հայտնել կատարվածի համար: Մեր ղեկավարությունը խոստանում է, որ դա կլինի քննության առարկա, որպեսզի պարզվի թե ում անունից և ինչ լիազորություններով էր օժտված նա նման հայտարարություն անելու համար: Այնուհետև պաշտոնական հայտարարություն կարվի», -հայտարարեց Պոպանը:

Նշենք, որ Վիկտոր Պոպանը Մոլդովայի Սահմանադրական դատարանի անդամ է, իրավաբանական գիտությունների դոկտոր, պրոֆեսոր, երկրի խորհրդարանի նախկին պատգամավոր:

Պոպանը տեղեկացրեց, որ ինքը երեկ խոսել է Հայաստանի խորհրդարանում մեր երկիրը «ագրեսոր» որակած Մոլդովայի օմբուդսմեն Աուրելիա Գրիգորիուի հետ, և վերջինն ասել է, որ ինքը խոսել է սառեցված հակամարտություններում մարդու իրավունքների մասին: «Ես նրան ընդդիմացել եմ` ասելով, որ խորհրդաժողովի կազմակերպիչներն իրեն այդ ելույթի հնարավորությունն են տվել, ամենայն հավանականությամբ, նկատի են ունեցել, որ Մոլդովայում ևս կա սառեցված հակամարտություն` Մերձդնեստերը, որտեղ, գաղտնիք չէ, խախտվում են մարդկանց իրավունքներ, որպեսզի սեփական փորձով կիսվի: Իսկ այն, ինչ նա հայտարարեց, ընդհանրապես խորհրդաժողովի թեմաների մեջ չէր մտնում», -հայտնեց ՍԴ անդամը` նկատելով, որ չի կարող ասել, թե ինչ պատճառով է իր համերկրացին նման հայտարարություններ արել:

Լրագրողների դիտարկմանը, թե տիկին Աուրելիա Գրիգորիուն, դատելով իր ֆեյսբուքյան պաշտոնական էջից, շատ է սիրում Ադրբեջանը և հիացական արտահայտություններ է շռայլել այդ երկրի նախագահի հասցեին ու ոգևորված է եղել Բաքվով, պարոն Պոպանը պատասխանեց. «Ես իրականում նրան չեմ ճանաչել, իհարկե, իմացել եմ նրան որպես օմբուդսման, քանի որ խորհրդարանն է օմբուդսմանին նշանակում: Բայց չեմ ճանաչել: Եվ ինչպես ասացի, դա քննության առարկա կդառնա խորհրդարանում` տուն վերադառնալուն պես»:

Նա նաև նշեց, որ իրենց երկրում մի քանի օմբուդսմեններ կան, որոնց նշանակում է խորհրդարանը, և օմբուդսմենի լիազորությունների շրջանակներում այլ հարցեր են դրված` ուսումնասիրում են բնակիչների բողոքներն ու պաշտպանում մարդկանց իրավունքները, այլ ոչ` զբաղվում սառեցված հակամարտություններում:

Նկատենք, որ մինչև լրագրողների հետ հանդիպումը, Հայաստանի Ազգային ժողովում երկօրյա «Իրավունքի գերակայության եվրոպական չափորոշիչները և իշխանությունների հայեցողության սահմանները Եվրոպայի խորհրդի անդամ երկրներում» համաեվրոպական խորհրդաժողովի հյուրերը մեկնել էին Էջմիածին, սակայն Աուրելիա Գրիգորիուն նրանց հետ չէր եղել:

Հիշեցնենք` Մոլդովայի օմբուդսմեն Աուրելիա Գրիգորիուն անդրադառնալով հայ-ադրբեջանական հակամարտությանը, երեկ Հայաստանի խորհրդարանում հանդես էր եկել իրականությանը չհամապատասխանող հայտարարությամբ և նշել, որ «Հայաստանը գրավել է Ադրբեջանի տարածքների 20 տոկոսը՝ ադրբեջանցիների նկատմամբ իրականացնելով ցեղասպանություն»։ Նաև ասել էր, որ «Խոջալուի ցեղասպանությունն իրականացրել են հայերը, ինչն այլևս միջազգայնորեն ճանաչված փաստ է»։ Հայաստանի խորհրդարանում մոլդովացի փաստաբանը Հայաստանին անվանել էր «ագրեսոր երկիր»։

Նախորդող`
Մոլդովացի փաստաբանը Հայաստանի խորհրդարանում Հայաստանն անվանել է «ագրեսոր». Նրան լռեցրել են ԱԺ փոխխոսնակն ու ՍԴ նախագահը