Ձեր վստահելի աղբյուրը

Կառավարության որոշմամբ, Հայաստանի Սահմանադրության օրը` հուլիսի 5-ին, այսուհետ նշվելու նաև որպես պետական խորհրդանիշների` զինանշանի, դրոշի, օրհներգի օր։ Այդ առիթով այսօր «Մենք» ազգային արժեքների պահպանման հիմնադրամը կամակերպում է տոնական քայլեր` Երևանում, մարզերում և Արցախում:

Սակայն, ինչպես պարզվեց մի քանի երևանցիների հետ զրույցում, իրենք տեղյակ էլ չեն, որ այսօր նշվում է նաև Հայաստանի խորհրդանշանների օրը: Միգուցե պատճառն այն է, որ կառավարությունը երեկ է ընդունել համապատասխան որոշում: Կամ միգուցե այն է, որ խորհրդանշաններն այնքան էլ հասարակության շրջանում «մեծ հարգանք» չեն վայելում, ինչպես կարծում են մեր հարցմանը մասնակցած մի քանի քաղաքացիներ:

«Ազգային խորհրդանշանները պետք է աչքի լույս պես պահել ու վերաբերել: Դրանք մեր պետականության վկայություններն են»,- ասաց Երևանի բնակիչ Ռոբերտ Սահակյանը: Նա նաև նշեց, որ հենց պետական շատ մարմիններ «հարգալից» վերաբերմունք չունեն`«տեսնում ես թարս են կախած լինում, կամ երկար արևի տակ մնալուց գունաթափվել է, կամ նույնիսկ պատռված է»:

«Մեր խորհրդանշանների հիքմերը դեռ վաղ ժամանակներից են գալիս: Ամեն մի մասնիկ իր իմաստաբանությունն ունի: Այն պետք է իմանան բոլորը: Սակայն հարցրեք, հիմնականում դպրոցահասակներին: Չեն կարող ասել` ինչը ինչ է նշանակում, որ գույնը ինչ է խորհրդանշում: Հենց այդտեղից է գալիս մեր սխալը. հենց դպրոցական տարիքից պետք է երեխայի մեջ արթանացնել սեր, հարգանք դեպի մեր երկիրը: Իսկ հարգանքի դրսևորում է նաև ազգային խորհրանշանների մասին ամեն ինչ իմանալը»,- մտահոգություն հայտնեց տիկին Նունեն:

«Մեր խորհրդանշաններն են` Եռագույն դրոշը, զինանշանը, օրհներգն էլ «Մեր հայրենիքն» է, ուզում ես երգեմ», -մեծ ոգևորությամբ ազգային խորհրդանշանները թվարկեց 6-ամյա Գուրգենը, ով ասաց, որ այս ամենն իրեն սովորեցրել է պապիկը: Պապիկը շարունակեց թոռնիկին. «Մեր խորհրդանշաններն արտահայտում են մեր անցած դժվարին ճանապարհը: Այդ դժվարությունները հաղթահարելով, մենք հասել ենք 21-րդ դար ու պարտավոր ենք աչքի լույս պես պահել մեր պետությունը»:

Հայաստանի Հանրապետության դրոշը եռագույն է` վերևից ներքև կարմիր, կապույտ, նարնջագույն հորիզոնական հավասար շերտերով: Կարմիր գույնը խորհրդանշում է Հայկական բարձրավանդակը, հայ ժողովրդի մշտական պայքարը հարատևման, քրիստոնեական հավատքի, Հայաստանի անկախության և ազատության համար: Կապույտ գույնը խորհրդանշում է հայ ժողովրդի ապրելու կամքը խաղաղ երկնքի ներքո: Նարնջագույնը խորհրդանշում է հայ ժողովրդի արարչական տաղանդը և աշխատասիրությունը:Դրոշի լայնության և երկարության չափերի հարաբերությունն է` 1:2-ի: Սույն մասով նախատեսված`Հայաստանի Հանրապետության դրոշի լայնության և երկարության հարաբերության չափերի պահպանմամբ կարող է օգտագործվել նաև փոքր կամ մեծ չափի դրոշ:

Հայաստանի Հանրապետության զինանշանն է` կենտրոնում` վահանի վրա պատկերված են Արարատ լեռը` Նոյյան տապանով և պատմական Հայաստանի թագավորություններից չորսի` վերևից ձախ` Բագրատունիների, վերևից աջ` Արշակունիների, ներքևից ձախ` Արտաշիսյանների, ներքևից աջ` Ռուբինյանների զինանշանները: Վահանը պահում են արծիվը (ձախից) և առյուծը (աջից), իսկ վահանից ներքև պատկերված են սուր, ճյուղ, հասկերի խուրձ, շղթա և ժապավեն: Հայաստանի Հանրապետության զինանշանի հիմնական գույնն է ոսկեգույնը, պատմական Հայաստանի թագավորություններինը` վերևից ձախ` կարմիր, վերևից աջ` կապույտ, ներքևից ձախ` կապույտ, ներքևից աջ` կարմիր, և կենտրոնում` վահանի վրա պատկերված Արարատ լեռը` նարնջագույն: Նշված գույները խորհրդանշում են Հայաստանի Հանրապետության դրոշի գույները:

Հայաստանի Հանրապետության օրհներգը հանդիսավոր երաժշտական ստեղծագործություն է, որը կատարվում է վոկալ, գործիքային, նվագախմբային, երգչախմբային, նվագախմբային-երգչախմբային տարբերակներով: Հայաստանի Հանրապետության օրհներգը «Մեր հայրենիքն» է (խոսքերը` Միքայել Նալբանդյանի):