Ձեր վստահելի աղբյուրը

Որտե՞ղ են այս տարի իրենց ամառային հանգիստն անցկացնելու մեր ազգընտիրները` Ազգային Ժողովի պատգամավորները: Panorama.am-ը պարզեց դա.

ԲՀԿ խմբակցության քարտուղար Նաիրա Զոհրաբյանն այս տարի անպայման ամառային հանգիստ ինքն իրեն նվիրելու է. «Անցած ամառ ես այդպես էլ չկարողացա մեկնել հանգստի, որովհետև խորհրդարանական ընտրություններից հետո անմիջապես ՏԻՄ ընտրություններն էին և ես մնացի Երևանում: Ուստի իրապես անչափ գերհոգնած եմ և արդեն նախապես ուղեգիրը պատվիրել եմ»,- ասաց նա: Ն.Զոհրաբյանը դստեր և թոռնիկի հետ մեկնելու է երկշաբաթյա հանգստի Ռոդոս կղզի օգոստոսի առաջին տասնօրյակում:

ՀՀԿ խմբակցության քարտուղար Հովհաննես Սահակյանն էլ ընտրել է ծովային հանգստի տարբերակը, քանի որ, նշեց նա, երեխաները փոքր են ու ծովը կարևոր է նրանց առողջության համար: Ճիշտ է դեռ չի կողմնորոշվել ծովափնյա ո՞ր հանգստավայրն է ընտերլու, իսկ կարևորը` ո՞ր երկրում: Հետաքրքրվեցինք` դա ենթադրում է, որ կարող եք հանգստանալ նաև հարևան Վրաստանո՞ւմ . «Չի բացառվում: Ես շատ սիրում եմ Քոբուլեթին ու Բաթումը, հատկապես, երբ ընկերներով ենք գնում, մեքենայով, ճանապարհին կանգնելով և այլն: Քաղքենի մտածելակերպից, փառք Աստծո, զուրկ եմ, որ պետք է պարտադիր լինի 5 աստղանի հյուրանոց և այլն, և այլն: Կարևորը հանգիստը ճիշտ կազմակերպելն է, ճիշտ մարդկանց հետ»,- նշեց նա ու հավելեց, որ որպես կանոն ամառային հանգիստը պարտադիր անցկացնում է ընտանիքի հետ:

ՀԱԿ խմբակցության քարտուղար Արամ Մանուկյանը նշեց, որ դեռևս որևէ հստակ ծրագիր ամառային արձակուրդի անցկացման վերաբերյալ չունի. «Դե ծրագրած հստակ որևէ բան չունեմ ու առայժմ կմնամ Երևանում»,-ասաց նա: Ավելացրեց, որ ցանկություն իհարկե ունի ու քանի որ սովորաբար մեկնում է Ռուսաստան ազգականների տուն հանգստանալու, ապա այս անգամ էլ եթե ստացվի, ապա հավանաբար այդ տարբերակը կընտրի. «Կարծում եմ օգոստոսին պարզ կլինի»,- ընդգծեց նա:

ՀՀԿ-ական պատգամավոր Մարգարիտ Եսայանի համար այս ամառը խիստ կարևոր է` ընտանիքում մեծ ուրախություն է սպասվում. «Օր-օրի սպասում ենք մեր երրորդ թոռնիկի ծնունդին, այդ պատճառով էլ հատուկ պլաններ դեռ չենք մշակել ամառային հանգստի համար: Հուսամ` ամառվա վերջում հնարավորություն կունենանք իրականացնել մտադրությունս և ամուսնուս հետ այցելել նրա և իմ պապենական հողերը` Արևմտյան Հայաստան,Մուշ և Մալկարա»,- պատմեց Մ.Եսայանը: Նրա խոսքով, այս այցելությունն իր համար խիստ կարևոր է, քանի որ իր նոր գրքում մեծ հատված նվիրված է լինելու հենց պատմական Հայաստանի այն բնակավայրերին, որտեղից ցեղասպանությունից փրկվել և հեռացել են պապերը. «Իսկ ամենից ավելի անհամբեր սպասում եմ, թե երբ եմ գոնե մեկ շաբաթ գտնելու և մենակ մնալու Բյուրականում գտնվող մեր տանը»,- գաղտնիքը բացահայտեց նա ու հավելեց, որ թեև ամառը հանգստի շրջան է, բայց ոչ իր համար, քանի որ ամռանն ինքը ավելի է հոգնում և ավելի բազմազբաղ է լինում, քան տարվա մյուս եղանակներին:

«Օրինաց երկիր» խմբակցության ղեկավար Հեղինե Բիշարյանի ամառային հանգիստը ևս կախված է թոռնիկից, որն արդեն երկու ամսական է. «Այս տարի դեռ չենք կողմնորոշվել, որովհետև մտածում ենք, թե որտե՞ղ պետք է տանենք մեր փոքրիկին հանգստանալու: Իմ ծրագրերն ամբողջությամբ թոռնիկիս հետ են կապված»,- ասաց նա` հավելելով, որ այս պահին դեռ որոշվա չի ոչինչ:

Իսկ նույն խմբակցության քարտուղար Մհեր Շահգելդյանն էլ պատասխանեց կարճ և լակոնիկ` արտերկիր մեկնելու մտադրություն չունի, մնալու է Հայաստանում: