Ձեր վստահելի աղբյուրը

Թեև տրանսպորտի ոլորտի պատասխանատուները հայտարարում են, որ փոխադրավարձի բարձրացումը «կլինի հօգուտ քաղաքացիների», սակայն հասարակական տրանսպորտից օգտվող քաղաքացիներն այս օրերին արդեն մտքում հաշվարկներ են կատարում ու այլընտրանքներ որոնում:

Մինչ քաղաքապետարանում ու տրանսպորտի և կապի նախարարությունում հաշվարկներ են կատարում, թե որքանով բարձրացնեն ծառայության գինը, քաղաքացիներն էլ հաշվում են իրենց գրպանի հնարավոր վնասները:

15 տարեկան Մայիսը ապրում է Ներքին Չարբախում, սովորում է Շրջանայինում գտնվող Բժշկական քոլեջում: Ուսումնական հաստատություն հասնելու ու տուն վերադառնալու համար ստիպված է օրական չորս անգամ տրանսպորտ փոխել:
«Առավոտյան ժամերին 54 համար ավտոբուսը շատ վատ է աշխատում, մինչև Ներքին Չարբախ է հասնում, ոչ նստելու, ոչ կանգնելու տեղ չի լինում, Դարակերտ ու Նորաբաց գյուղերից մարդիկ արդեն լցվում են: Եթե հաջորդին սպասեմ, դասից կուշանամ, ստիպված երկու տրանսպորտ եմ փոխում»,-Panorama.am-ին ասաց պատանին: Հիմա մտածում է, որ սեպտեմբերից ծնողների բեռը կծանրանա, ասում է, մտադիր է, շատ կանուխ վեր կենալ, շատ քայլել, որ հաջորդ տրանսպորտի կանգառ ոտքով հասնի:

«Եթե ամեն առավոտ 7:30 եմ դուրս գալիս, պետք է ավելի շուտ դուրս գամ, որպեսզի քայլեմ, օգտվելու մի տրանսպորտից, որպեսզի ծնողներիս բեռը թեթևացնեմ: Դրան գումարած, բուհ ընդունվելու համար պետք է կրկնուսույցի մոտ պարապեմ, դասերից հետո ստիպված եմ լինելու մեկ-երկու անգամ ավել օգտվել հասարակական տրանսպորտից»,-սրտնեղում է պատանին ու շարունակում, որ եղբայրն էլ ուսանող է, սեպտեմբերին առաջին անգամ ԲՈՒՀ է ոտք դնելու:
Եղբայրն էլ պետք օգտվի երկու տրանսպորտից /97 համարի միկրովտոբուս+մետրո/:

«Մայրս էլ աշխատում է, ստանում է 120 հազար դրամ աշխատավարձ, էլի ամեն օր 2-4 տրանսպորտից է օգտվում: Պարզ հաշվարկով, եթե հասարակական տրանսպորտի գինը բարձրանա 50 դրամով, ապա մեկ օրում մեր ընտանեկան բյուջեից ստիպված ենք լինելու միայն տրանսպորտի վրա ծախսել 1800-2000 դրամ»,-ասաց 15-ամյա պատանին:
Պատանու մոր խոսքով, լինում են օրեր, երբ ինքը ուշ է վերջացնում աշխատանքը ու ստիպված տաքսիով է տուն հասնում, քանի որ ժամը 9-ից հետո հասարակական տրանսպորտին սպասելն անհույս բան է:

«Այս իրավիճակում միգուցե ավելի ճիշտ է մի կերպ մեքենա ձեռք գցել ու գոնե մարդավարի երթևեկել»,-ասաց 40-ամյա Արմինեն:
Քաղաքացիներից մեկը, ով ստանում է 100 հազար դրամից ավել աշխատավարձ, նշեց, որ ապրում է Մոնումենտում: Ստիպված պետք է ոտքով Կասկադով ամեն օր իջնի Օպերայի հարևանությամբ գտնվող գրասենյակ, իսկ տուն գնալուց էլ, արդեն որոշել է, ոչ մի ծանոթի փոխարեն չի վճարելու: «Իսկ ընդհանարպես մտածում եմ, ամուսնանալ, գնալ ու ապրել Ամերիկայում»,-ցանկության մասին բարձրաձայնեց 27-ամյա աղջիկը:

Արմավիրի մարզի գյուղերից մեկից աշխատելու նպատակով Երևանում վարձով բնակություն հաստատած Ստեփանն էլ անելիքը չգիտի: 150 հազար դրամ աշխատավարձից 50 հազար դրամը տան վարձն է տալիս, կինը չի աշխատում, դեռևս մեկ տարին չբոլորած փոքրիկին է խնամում:
«Եթե գոնե 50 դրամով թանկանա, կշարունակեմ օգտվել, բայց եթե 200 դրամ դառնա, պետք է աշխատանքի հասնեմ ոտքով, այլ տարբերակ չունեմ»,-ասաց Ստեփանը, ավելացնելով, որ վարձած բնակարանից աշխատանքի վայր ոտքով կհասնի մոտ մեկ ժամում: Նա միաժամանակ նշեց, որ ամեն շաբաթ Արմավիր է գնում, իսկ աշխատանքի բնույթն էլ այնպիսին է, որ օրվա մեջ 2-3 անգամ տրանսպորտից է օգտվում:

«Բյուջեիս վրա լաաավ էլ կանդրադառնա, դրան գումարած աշխատավարձս էլ չի բարձրանա»,-ասաց նա:
Կան մարդիկ, որոնք կողմ են փոխադրավարձի բարձրացմանը, բայց մի պայմանով:
«Բացարձակ կողմ եմ, որ ավտոբուսների փոխադրավարձը դառնա 200 դրամ, բայց իրականում աշխատեն 15 րոպե ինտերվալով, մինչև կեսգիշեր նորմալ գրաֆիկով, դրան գումարած երկարացված ծառայություն հանգստյան օրերի համար: Բայց վստահ եմ, որ ուղղակի կթանկանա, առանց ծառայության որակի կամ բյուջեի եկամուտների բարձրացման»,-գրել էր ֆեյսբուքայան օգտատերերից մեկը:

Նախորդող հրապարակում`
Հասարակական տրանսպորտի գործադուլի մասին հայտարարությունները ինքնակոչ են. Հ. Նավասարադյան

Գազալցակայաններում գազը թանկացել է ավելի շատ, քան Նազարյանն էր կանխատեսում