Ձեր վստահելի աղբյուրը

 Որտե՞ղ են նախընտրում հանգստանալ մեր քաղաքացիները:

Երևանի փողոցներում փորձեցինք հարցում անցկացնել` պարզելու, թե որտեղ են պատրաստվում հանգստանալ երևանցիները, կամ արդյոք պատրաստվում են: Արդյունքում, հարցվածների մեծ մասը պատասխանեցին, որ հանգստի չեն մեկնելու, քանի որ հնարավորություն չունեն, երևանցիների մի մասն էլ նշեց, որ նախընտրում են հանգստանալ գյուղերում` իրենց բարեկամների մոտ, ինչը, նրանց խոսքերով, ամենաէժան տարբերակն է:

Հարցումների արդյունքում նաև պարզեցինք, որ երևանցիները հնարավորություն չունեն մեծ գումարներ ծախսել Ծաղկաձորի, Սևանի, Ջերմուկի թանկարժեք հյուրանոցներից ու հանգստյան տներից օգտվելու համար, ուստի նախընտրում եմ մեկնել Երևանին մոտ մարզեր՝ բնության գրկում գոնե մի քանի ժամով օդափոխվելու և մայրաքաղաքի կեղտ ու փոշուց ազատվելու:

Նշենք նաև, որ հարցվածների մեջ կային մարդիկ, ովքեր փորձել են այս տարի իրենց հանգիստը կազմակերպել արտերկրում, սակայն վիզայի հետ կապված ընկել են քաշքշուկների մեջ, ուստի այդ ամենից հոգնած որոշել են հանգիստը կազմակերպել կամ Վրաստանում, կամ էլ` Հայաստանի հանգստյան տներում:

Սակայն «հանգստանալու մեկնելու եք և որտեղ» հարցը, հատկապես միջին տարիքի որոշ մարդկանց նյարդայնացնում էր. «Ինչ հանգիստ, ինչ բան, որ հանգստանանք, բա մեզ ով պահի»,- ասաց 45 տարեկան Մարատը, ով ընտանիքի միակ աշխատողն է, ամսական ստանում է 130 հազար դրամ աշխատավարձ, ապրում է կնոջ և երկու անչափահաս երեխաների հետ: «Մտածում էի, որ մի օրով երեխաներին Սևան կտանեմ, բայց դա մոտավորապես 25-30 հազար դրամ կարժենա: Դրանով կոմունալ վարձերը կվճարեմ»,- նշեց Մարատը:

Մի քաղաքացի էլ սրտնեղած ասաց, որ ամբողջ կյանքում աշխատել է, սակայն երբեք չի հանգստացել: «Միշտ էլ հոգսաշատ եմ եղել, էն ժամանակ երեխաներիս, ծնողներիս հոգսն էի հոգում, հիմա էլ երեխաներիս ու թոռներս: Հազիվ հացի գումար ենք վաստակում, նման ճոխություն մեզ չենք կարող թույլ տալ»,- ասաց նա:

«Ցանկությունը մեծ է ինչ-որ տեղ գնալու, բայց հնարավորություն, գումար չկա»,- ահա այսպիսի պատասխան էր հիմնականում հնչում:

Մանկավարժ Լաուրան ինքն իրեն մխիթարում է` ասելով, որ տանն իրեն ավելի լավ է գգում: «Փորձում եմ ամառային արձակուրդներին երեխաներիս ինչ-որ տեղ ուղարկել, համեմատաբար էժան հանգստյան տներ, որպեսզի նրանք գոնե մի քիչ օդափոխվեն: Ես արդեն տարիքս առել եմ, էս կյանքից քիչ թե շատ օգտվել եմ, հիմա հերթը երեխաներինն է, ամեն ինչ անում ենք, որ տարվա մեջ մի քանի օր նրանք էլ իրենց լավ զգան»,- նշեց տիկին Լաուրան:

20-ամյա ուսանողուհի Անին ասաց, որ արդեն երկու տարի է ծնողների հետ ամռանը մեկնում է Վրաստան, սիրում է ծով և նախընտրում է հանգիստն այնտեղ անցկացնել: «Միջինը ծախսում ենք 300-400 դոլար: Շատ գոհ ենք, իրոք լիցքաթափվում ենք, իսկ այդքան գումարով չեմ կարծում, որ կարողանայինք Հայաստանում հանգստանալ: Այստեղ հյուրանոցները բավականին թանկ արժեն»,- ասաց Անին:

Քաղաքացիներից մեկն էլ, ով ստանում է 100 հազար դրամ աշխատավարձ, նշեց, որ քանի տարի է մտածում է` գումար խնայել և ինչ-որ տեղ գնալ, բայց այդպես էլ չի կարողանում գումար խնայել: «Ամսվա կեսից գումար չեմ ունենում, էլ ուր մնաց խնայեմ: Ամբողջ տարին աշխատելուց հետո հազիվ երկու շաբաթ արձակուրդ են տալու, բայց չեմ կարծում, որ կհանգստանամ»,- նշեց Ռուզաննան:

Տիկին Էմման ուսուցչուհի է, ունի 35 տարվա աշխատանքային փորձ, երբեք չի հանգստացել, միշտ աշխատել է: Հիմա ընտանիքի հոգսը թեթևացել է, աղջիկներին ամուսնացրել է և որոշել են ամուսիններով գնան հանգստանալու: «Քանի որ չենք կարող արտերկիր մեկնել, ուստի որոշել ենք հանգստանալ Հայաստանում, բայց մեր երկրում ավելի թանկ է հանգիստը, քան ուրիշ երկրում: Շատ հիասթափվեցինք, երբ գների հետ ծանոթացանք, բայց ինչ արած, գոնե 5 օրով կմեկնենք Ստեփանավան»,- ասաց նա:

Նկատենք, որ հարցվածները հիմնականում ասում էին` ամառը կանցկացնեն տանը, լավագույն դեպքում` կգնան գյուղ բարեկամի տուն:

Նշենք, որ Հայաստանում հյուրանոցների թանկ լինելու հանգամանքը չեն ժխտում նաև տուրիստական գործակալությունների աշխատակիցները: «Եթե տոմսերի գինը չհաշվենք, ապա Հայաստանում ավելի թանկ է հանգիստը»,- մեզ հետ զրույցում ասաց տուր մենեջեր Անահիտը:

Նախորդող`
Գյուղաբնակների մեծ մասը հանգստի մասին անգամ չի էլ երազում