Ձեր վստահելի աղբյուրը

Գյումրիի նախկին քաղաքապետ Վարդան Ղուկասյանի փեսայի` Կարեն Եսայանի սպանության գործով հուլիսի 9-ին կայացած դատավարության ժամանակ իր ցուցմունքում ամբաստանյալ Հարություն Սարգսյանի մայրը` Անահիտ Նիկոլյանը, երիտասարդ տղայի հարազատներին ցավակցություն հայտնելուց հետո տվել էր անուններ, որոնք կարող են կազմակերպած լինել Կարեն Եսայանի սպանությունը:

Մասնավորապես, նա նշել էր Վարդան Ղուկասյանի որդու` Սպարտակ Ղուկասյանի, Շեկոյի (Արտյոմ Կարապետյան, որը մահացել էր Գյումրիում տեղի ունեցած վերջին դեպքերից հետո) անունները ու ասել. «Ո՞վ ռիսկ ուներ էն ժամանակ դեմ գնար քաղաքապետին, ո՞վ ռիսկ ուներ. ոչ իմ տղան, ոչ էլ իմ տղայի հայրը էն էլ էդ տարածքում: Էդ տարածքն ո՞ւմ է պատկանում, իրանցը (նկատի ունի Ղուկասյաններին-հեղ.): Ով ռիսկ կաներ, տաներ էդ երեխին, ըտեղ էդպես աներ: Հավանական անունները կանգնում էին Սպարտակ Ղուկասյանի վրա, Շեկոյի վրա: Գուցե երրորդ կա, գուցե չորրորդ կա» («ԳԱԼԱ»-ի տեսանյութը):

Հիշեցնենք` Կարեն Եսայանը սպանվել էր ապրիլի 12-ին: Նրա դին հայտնաբերել էին «Սև Ղուլ» կոչվող տարածքում, որը պատկանում է Ղուկասյանների ընտանիքին: Այս գործով մեղադրվում է Անիի տարածաշրջանի նախկին ոստիկանապետի որդին` Հարություն Սարգսյանը: 

Եսայանի սպանությանը Վարդան Ղուկասյանի որդու` Սպարտակ Ղուկասյանի մասնակցության մասին դատարանում Նիկոլյանի հայտարարությունը շատ գյումրեցիների շրջանում ոգևորության մեծ ալիք է բարձրացրել: «Ղուրբան էղնինք էդ աղջկան, որ ռիսկ արեց ու ըդպես խոսաց, ինքը մեր Գյումրու առաջին տիկինը դարձավ, ըտենց բան ոչ մեկ չէր արել», -Panorama.am-ի թղթակցի հետ զրույցում ասաց Գյումրիի բնակիչ կանանցից մեկը, ով, անհանգստանալով իր անվտանգության համար, հրաժարվեց ներկայանալ: 
Տիկին Անահիտը նաև դատարանում ասել էր, որ Կարենի սպանության մասին լուրը լսելիս իրենք կարծել են, որ դա Գյումրիի Տեքստիլ թաղամասում «օրը ցերեկով ավտոմատներով կազմակերպված դուետի շարունակությունն է»:

«Երբ մեզ հրավիրեցին ոստիկանություն ու սկզբում ասացին, թե Վարդան Ղուկասյանի աղջկան են սպանել, հետո ասացին փեսացուին, մենք մտածեցինք, որ հենց այդ կռվի շարունակությունն է: Բայց ինձ պատմել են, որ Սպարտակը ասել է, թե` չէ պապա` չպիտի տանք քրոջս դրանց, իսկ Վարդան Ղուկասյանն էլ, աչքի առջև ունենալով եղբոր` Գևորգ Ղուկասյանի դստեր` Անիի ինքնասպանությունը, ասել է`պիտի տանք: Անին ինքնասպան եղավ, որովհետև սիրում էր մի տղայի, որին վերացրեցին Սպարտակի գլխավարությամբ» , -հայտարարել է Անահիտ Նիկլոյանը` հիմնվելով որդու և հոր միջև վեճին ներկա գտնված մի մարդու պատմության վրա:

Հատկանշական է, որ Անահիտ Նիկոլյանը դատարան ներկայացել էր ձեռնափայտով ու ոտքերի վիրահատությունից հետո, սակայն որպես վկա կանչվող Վարդան Ղուկասյանն ու նրա դուստրը` Մանյա Ղուկասյանը համառորեն չեն ներկայանում նիստին: Հուլիսի 16-ին շարունակվող դատական նիստում ցուցմունք տալու հերթը նրանցն է. դատարանը բերման ենթարկելու որոշում էր կայացրել, բայց այն չէր իրականացվել:

Գյումրեցին, որը մեզ հետ զրույցում ներկայացնում էր Ղուկասյանների «շնորհիվ» հայրաքաղաքում տիրող վախի մթնոլորտի մասին, նկատեց, որ Անահիտ Նիկոլյանը ամենափոքր մասն է դատարանում ներկայացրել այն ամենի, ինչ կատարվել է իրենց «երկրում», Սպարտակ ու Վարդան Ղուկասյանների կողմից:

Նա մասնավորապես, հիշեց Ղուկասյաններին պատկանող «Օազիս» սրճարանում աշխատող ջութակահարի սպանությունը, երբ Սպարտակ Ղուկասյանն ու իր շրջապատը խնդրել են իրենց համար ջութակ նվագել, սակայն ջութակահարը «համարձակվել է» մերժել ու հետո սպանել են: Հիշեց նաև «Դուետ» սրճարանում Մայիսիկ անունով մի երիտասարդի սպանությունը, որի համար Ղուկասյանի փոխարեն «նստել է գյումրեցի Պիշը»:

Մեր զրուցակիցը հիշեցրեց նաև 2007-ի մայիսի 20-ի աղմկահարույց փոխհրաձգության մասին, որը տեղի էր ունեցել օրը ցերեկով, Գյումրու նախկին քաղաքապետի որդու անմիջական մասնակցությամբ ու որի արդյունքում մի ծեր կին` 74-ամյա Համասփյուռ Մնացականյանը, ձեռքից վնասվածք էր ստացել («Երկիր Մեդիա»-ի տեսանյութը):

Գյումրեցիների համար, մեր զրուցակցի խոսքով, մինչև հիմա չբացահայտված ու խորհրդավոր է համարվում փոքրիկ երեխայի (12-ամյա Ռոբերտ Սիմոնյան) մահը, որի մասին լուրը հաջորդել էր Գյումրիում Սպարտակ Ղուկասյանի ու «իրա թայֆի» կողմից վերը նշված փոխհրաձգության դեպքին: Հիշեցնենք, որ երեխայի դին հայտնաբերվեց փոքրիկ չբնակեցված տնակում և դրանից հետո հայտարարվեց, որ երեխան մահացել է նռնակի պայթյունից: «Հայտարարին, թե նռնակ է պայթել, բայց ոչ մի նռնակ էլ չէր պայթել, էդոր պայթած ըլներ, կվնասվեին նաև էդ փոքր տնակի ապակիները, բայց բան չէր էղել: Էդ գործն էլ կարճվեց ու Վարդանիկն ու տղեն մնացին անպատիժ», -ասաց մեր զրուցակիցը:

Ղուկասյաններին պատկանող Գյումրիի «Հրաշքների աշխարհ» սրճարանի դիմաց տեղի ունեցած վիճաբանությունը, որն ուղեկցվել էր կրակոցներով, Սպարտակ Ղուկասյանի հերթական «քաջագործությունն» է եղել, որի մասին անգամ իրավապահ մարմինների պաշտոնական հաղորդագրություններում էր նշվում: Ոստիկանությունը հաղորդել էր,որ 2012 թ. օգոստոսի 24-ին՝ ժամը 22.30-ի սահմաններում, Գյումրու Սայաթ-Նովա ևՌուսթավելու փողոցների խաչմերուկում գտնվող «Հրաշքների աշխարհ» սրճարանի դիմաց տեղի է ունեցել վիճաբանություն: Վիճաբանողները, կոպիտ կերպով խախտելով հասարակական կարգն ու բացահայտ անհարգալից վերաբերմունք դրսևորելով հասարակության հանդեպ, ծեծի են ենթարկել միմյանց, խուլիգանական հայհոյանքներ տվել, կրակոցներ արձակել: Նախաքննության ունեցած տվյալներով՝ վիճաբանությանը մասնակցել են Գյումրու բնակիչ Սպարտակ Ղուկասյանն ու քաղաքի ավագանու անդամի թեկնածու Էդգար Մկրտչյանը իրենց ընկերների հետ: Փաստի առթիվ օգոստոսի27-ին Շիրակի մարզի քննչական բաժնում հարուցվել է քրեական գործ՝ ՀՀ քր. օր-ի 258հոդվածի 4-րդ և 235 հոդվածի 1-ին մասերով: Խուզարկություններ էին կատարվելՎարդան Ղուկասյանին պատկանող օբյեկտներում՝ «Օազիս»-ում, «Հրաշքների աշխարհում», «Ալեքսանդրապոլ» հյուրանոցում:

Այս ու դեռ չհիշատակված բազմաթիվ հանցագործություններից հետո էլ, ինչպես փոխանցում է մեր զրուցակիցը, Սպարտակ Ղուկասյանն ազատության մեջ է և նոր սպառնալիքներ է տարածում քաղաքում: Եթե հոր քաղաքապետ լինելու տարիներին նա իրենց՝ «Սլաբոդկա» կոչվող թաղամասում բնակիչներին ստիպելով, «մի երկու քոռ կոպեկ տալով» ու բնակֆոնդից բնակարաններ հատկացնելով գնել է թաղամասի տները, ապա այժմ հերթը մարդկանց ավտոտնակներինն է: «Թաղի բնակիչներին, ովքեր գառաժներ ունեն շանտաժի ու պարտադրանքի միջոցով քանդել ա տալիս դրանք: Կհայտարարե, թե ում ուզում եք, բողոքեք, դիմեք, մեր դեմ խաղ չկա: Մարդիկ էլ շվարած են, չգիտեն` ինչ անեն: Մեր երկրում արդեն սովորական բան է դարձել, որ Սպոն կկրակե, հիմա էլ մարդկանց ունեցածն ա խլում», -նշեց մեր զրուցակից կինը:

Ընդհանրապես, նրա խոսքով, նման իրավիճակը Գյումրում ամենաթողության ու անպատժելիության հետևանք է: «Մինչև հիմա հանցագործությունների, կրակոցների ու ծեծուջարդի համար որ պատժվեր, էս օրին չէր հասնի գյումրեցու վիճակը», -նշեց մեր զրուցակիցը:

Նախորդող՝ Կարեն Եսայանին սպանել է Վարդան Ղուկասյանի որդին. Հայտարարել է ամբաստանյալի մայրը