Ձեր վստահելի աղբյուրը

«Ես գտնում եմ, որ պետությունը պետք է հնարավորություն տա իր քաղաքացիներին սովորել այլ երկրների համալսարաններում: Դրա համար կարող են մշակվել գրանտային ծրագրեր, որոնք թույլ կտան, օրինակ, սովորել մեզ մոտ, քանի որ ես հասկանում եմ, որ ոչ բոլորը կարող են դա անել սեփական ուժերով ու ելնելով ֆինանսական վիճակից» ,- Լոմոնոսովի անվան Մոսկվայի պետական համալսարանի «Պատմության» ֆակուլտետում Հայաստանի, Վրաստանի և Ադրբեջանի լրագրողների հետ հանդիպմանը հայտարարեց ՄՊՀ դեկան, ակադեմիկ Սերգեյ Կարպովը: Դեկանը հնչեցրեց այն գումարը, որն անհրաժեշտ է «Պատմության» ֆակուլտետում սովորելու համար` տարեկան 320 հազար ռուբլի կամ 10 հազար դոլար, ինչը, հասկանալի է, հատկապես ԱՊՀ երկրների քաղաքացիների համար լուրջ գումար է: Իսկ անվճար սովորելու համակարգից օգտվելու հնարավորություն նույն Հայաստանի քաղաքացին չունի, որքան էլ լավ սովորող լինի:

Սերգեյ Կարպովը անհրաժեշտ համարեց երկրների միջև տեղեկատվական ճիշտ բազայի առկայությունը, որպեսզի, օրինակ, հայ երիտասարդները լավ տեղեկացված լինեն Մոսկվայի պետական համալսարանի գործունեությունից, ընդունելության մանրամասներից և այլն. «Շատ կարևոր է համագործակցությունը երկրների հետ, որպեսզի տեղերում ավելի շատ մեր մասին տեղեկացված լինեն, որովհետև մամուլում տարատեսակ տեղեկատվություն կա, որ երբեմն իրականության հետ որևէ աղերս չունի` կոնտեքստից վերցրած նախադասությունը, հայտնի է, կարող է լրիվ այլ իմաստ ունենա արդյունքում ու վնասի: Այդ իսկ պատճառով ես կուզենայի, որ տեղեկատվությունը ճիշտ ներկայացվեր»,- նշեց դեկանը:

Ի դեպ, նրա խոսքով, արդեն իսկ Հայաստանին առաջարկվել է Երևանում բացել Մոսկվայի պետական համալսարանի մասնաճյուղը, որը հնարավորություն կտա քաղաքացիներին չլքել հայրենիքը: Սակայն Panorama.am-ի ճշտող հարցին, թե երբ այդ հեռանկարը կիրականանա, Սերգեյ Կարպովը նշեց, որ դեռ շատ ժամանակ է անհրաժեշտ, քանզի բացի թղթաբանությունից, անհրաժեշտ է նաև տարածքի, շենքային պայմանների տրամադրում հայկական կողմում և այլն:

Պարզվեց, որ ուսումնական ձեռնարկների ու դասագքրերի խնդիր առկա է նաև ՌԴ-ում: Ֆակուլտետի դեկանը համաձայնեց, որ պետությունը համալսարանական ձեռնարկների ու դասագրքերի ձևավորման ժամանակ պետք է առաջնորդվի իր քաղաքական ու աշխարհաքաղաքական շահերից` դա օրինական է ու դա է ճիշտը:
Բայց. «Պետության քաղաքական ու աշխարհաքաղաքական շահերը դա ժամանակակից է, մինչդեռ անհրաժեշտ է դասագրքերի ստեղծմանը մոտենալ ավելի գլոբալ, օգտագործելով երկրների պատմական փորձը: Որովհետև այն երկրները, որոնց հետ մենք համագործակցում ենք` Հայաստան, Վրաստան, Ադրբեջան, ԱՊՀ այլ երկրներ, ինչպես նաև Թուրքիա, Իրան և այլն, այս երկրներն ունեն հարուստ պատմություն ու ավանդույթներ, իսկ դրանք չի կարելի անտեսել»,- նշեց դեկանը` ընդգծելով երկրների միջև բաց երկխոսության անհրաժեշտությունն ու կարևորությունը:

Լոմոնոսովի անվան համալսարանի դեկանն ընդգծեց նաև, որ պատմական դասագրքերում պետք է լինի օբյեկտիվ մոտեցում բոլոր պատմական իրադարձություններին և դրա վերաբերյալ ներկայացնել տարբեր աղբյուրների տեղեկատվություն. «Ես գտնում եմ, որ, օրինակ, Օսմանյան Թուրքիայում հայերի ցեղասպանությունը պետք է օբյեկտիվ ներկայացվի դասագրքերում, դրա համար օգտագործելով այն փաստաթղթերը, որ կան մեր արխիվներում և այլն: Ինչպես նաև հարկավոր է օբյեկտիվ ներկայացնել հույների ցեղասպանությունը ևս.... նման հարցեր ու պատմական փաստեր շատ կան, մարդիկ քիչ բան գիտեն այդ ամենի մասին և լռել դրա մասին պետք չէ: Ես հասկանում եմ, որ դպրոցական դասագրքերում այդ փաստերը չենք կարող լիարժեք ու մեծածավալ ներկայացնել, բայց համալսարանական դասագքրերը այդ հնարավորությունը տալիս են: Կարևոր է միայն, կրկնում եմ, դիմել տարբեր աղբյուրների, որպեսզի փաստերի շարադրումը լինի հնարավորինս օբյեկտիվ»,- հավելեց Ս.Կարպովը: