Ձեր վստահելի աղբյուրը

 Վիեննայում կայացած Հայաստանի արտգործնախարար Էդվարդ Նալբանդյանի և Ադրբեջանի արտգործնախարար Էլմար Մամեդյարովի առանձնազրույցը, նաև համատեղ հանդիպումը ԵԱՀԿ-ի Մինսկի խմբի համանախագահների և ԵԱՀԿ-ի գործող նախագահի անձնական ներկայացուցիչ Անջեյ Կասպշիկի հետ, հիմնականում ավարտվեցին համանախագահների` քիչ ուշ տարածած հայտարարությամբ: Նրանք մասնավորապես նշեցին. «Համանախագահները և նախարարները շարունակեցին քննարկումները խաղաղ գործընթացի էության վերաբերյալ՝ կենտրոնանալով կողմերի միջև լարվածությունը նվազեցնելու և այս տարի ավելի ուշ ամենաբարձր մակարդակներով հանդիպման համար պայմաններ ստեղծելու միջոցների վրա»:

Թե ինչ է ենթադրում այդ «խաղաղ գործընթացը», panorama.am-ը հարցրեց քաղաքագետների կարծիքները:

Քաղաքական հարցերով փորձագետ Տիգրան Աբրահամյանի համոզմամբ, համանախագահների հայտարարության հիմնական նպատակն էր ցույց տալ, որ բանակցությունները կանգ չեն առել և դրանք, միգուցե մի փոքր դանդաղ, սակայն կայուն ընթացքով շարունակվում են:

«Վերջին շրջանում տարածաշրջանում նկատվող զարգացումները, մասնավորապես, Ադրբեջանի կողմից բաց տեքստով հնչող պատերազմի սպառնալիքները, որոնք զուգորդվում են մեծաքանակ սպառազինության ձեռք բերմամբ, միջնորդ երկրներին ստիպում են ակտիվացնել գործընթացը (կամ գոնե ցույց տալ, որ դրանք ակտիվ փուլում են) և թույլ չտալ, որպեսզի իրադարձությունները դուրս գան վերահսկողությունից:

Նկատելի է, որ համանախագահները փորձում են կազմակերպել նախագահների մակարդակով հանդիպում, սակայն գործընթացում տեղաշարժի տեսանկյունից, էական փոփոխություններ դժվար է ակնկալել, մանավանդ, որ առաջիկայում Ադրբեջանում նախագահական ընտրություններ են:

Ավելին, սպասելի է, որ նախընտրական քարոզարշավի շրջանակներում Ադրբեջանից հնչող հայտարարությունների տոնայնություն առավել կտրուկ բնույթ կստանա, ինչը միայն բացասական ազդեցություն կունենա բանակցային գործընթացի վրա:

Ինչ վերաբերում է կողմերի միջև լարվածության նվազմանն ուղղված միջնորդների մտահոգությանը, ապա դրա ամենահարմար տարբերակը Մինսկի խմբի համանախագահների կողմից ներկայացված և միջազգային հանրության լիակատար աջակցությունը վայելող վստահության ամրապնդման միջոցների իրականացումն է՝ զինադադարի ամրապնդում, շփման գծից դիպուկահարների դուրս բերում, զինադադարի խախտումների հետաքննության մեխանիզմի ստեղծում, ինչն ի դեպ, մինչև այժմ պաշտոնական Բաքուն մերժում է»,- նշեց Տ. Աբրահամյանը:  
«Կովկասի» ինստիտուտի տնօրեն, քաղաքագետ Ալեքսանդր Իսկանդարյանի գնահատականով`գործընթացի, մասնավորապես Համանախագահների վերջին հայտարարության հիմնական նպատակը ԵԱՀԿ ՄԽ շրջանակներում բանակցային գործընթացի շարունակականության ապահովումն է:

«Ակնհայտ է, որ առկա են Մինսկի գործընթացը ինչ-որ ձևով պահպանելու ճիգեր: Պարզ է, որ Ադրբեջանում կայանալիք ընտրությունների հետ կապված իրավիճակը բավականին բարդ է և Բաքվում պետք է ասեն այն, ինչ և որ ասում են: Վիեննայում կայացած հանդիպման, ինչպես նաև հայտարարության հիմնական նպատակը միայն գործընթացի շարունակականությունը ապահովել էր: «Show Must Go On»` սա է հիմնական նպատակը»,- ասաց Ա. Իսկանդարյանը:

Վերջինիս համազմամբ` ԼՂ հակամարտության գոտում առկա ստատուս-քվոն կպահպանվի նաև Ադրբեջանում կայանալիք նախագահական ընտրություններից հետո:

«Սխալ կլինի ասել տասնամյակների կտրվածքով, սակայն մոտակա տարիների առումով ստատուս-քվոն կպահպանվի: Ստատուս-քվոյի պահպանման շարժառիթները չեն գտնվում իրավական հարթության մեջ: Իրադրության պահպանման հիմնական գրավականը կողմերի ուժերի հավասարակշռություն է, իսկ այն պահպանվում է»,- նշեց Ա. Իսկանդարյանը:

Պատրաստեց Կարեն Ղազարյանը