Ձեր վստահելի աղբյուրը

«Ուրեմն նրանք մտածում են, որ ստորագրահավաքով առաջնորդի հարց կլուծե՞ն, կամ առաջնորդի փոփոխության խնդիր կդնե՞ն, այո՞: Կարծում եք Սրբազանին հանելու եք մյուս եպիսկոպոսներն ասելու են ինձ դրե՞ք, ինձ դրե՞ք: Սխալվում եք, մենք համերաշխ ենք, Սրբազանը շարունակելու է պաշտոնավարել»,- Շիրակի թեմի առաջնորդն աներեր դիրքերից շտապում է հանգստացնել Նավասարդ Սրբազան Կճոյանի դեմ արշավի ելածներին:

Հայ Առաքելական եկեղեցու Շիրակի թեմի առաջնորդ Միքայել արքեպիսկոպոս Աջապահյանը համարում է՝ Սրբազան Կճոյանի հանդեպ վստահություն կորցրածները մոլորյալներ են:

«Այս ձնագնդին կմեծանա, ավելորդ աղմուկ կլինի, գազը բաց կթողնվի, փրփուրը կանցնի և կվերջանա, ու ամեն բան կշարունակվի նորից բնականոն հունով», -ասաց նա:

Աջապահյանի խոսքով՝ վերջին 100 տարում այսպիսի նախադեպ չի եղել որևէ հոգևորականի հանդեպ: Արարատյան Հայրապետական թեմի առաջնորդական փոխանորդի դեմ արշավը զարմացնում Արքեպիսկոպոսին, բայց կասկածները տանում են ոչ թե դեպի Մայր Աթոռ, այլ աղանդավորական խմբեր:

«Հասարակությունը ստերոտիպներ ունի հոգևորականի նկատմամբ և նա անտարբեր կգտնվի՝ հոգևորականը սոված է, թե կուշտ, «Բենթլիով» է շրջում թե, ոտքով: Եթե Նավասարդ Սրբազանը հացի կարոտ լիներ, մեկը հաց կերկարե՞ր նրան: Բնավ: Հասարակություն ասվածն էնքան անտարբեր է եկեղեցականի հանդեպ, էնքան, որ ինձ զարմացնում է անգամ ձեր անհանգստությունը»:

Մինչև ո՞ւր կզարգանա այս իրավիճակը. Սրբազանը դժվարանում է պատասխանել՝ փոխարենը հորդորում է աղոթել Սրբազան Կճոյանի համար, որպեսզի նա շարունակի ծառայությունը եկեղեցուն:

-Դուք ևս Հայաստանի մարզերից մեկի հոգևոր առաջնորդ եք, և Ձեզ, որպես հոգևորական, չի՞ վիրավորում բարձր ու միջին ամբիոններից այս սկանդալային պատմության արծարծումն առավոտից իրիկուն:
-Անշուշտ վիրավորում է և այն էլ ոնց է վիրավորում: Բայց Ես հիմք չեմ տեսնում այդ աստիճան աղմուկ բարձրացնելու մեջ:
Շատ սխալ բան է դա, ի՞նչ ստորագրահավաք, հանուն ինչի՞ , չեմ հասկանում: Նավասարդ սրբազանն իմ հոգևոր եղբայրն է. դուք ինչ է, կարծում էինք պիտի ողջունեի՞, ասեի շատ լա՞վ են անում: Շատ վատ բան է ստորագրահավաքը առհասարակ որևէ հոգևորականի հանդեպ: Պետք է վերջ ի վերջո սպասել, տեսնել թե հարցերին ինչպես է լուծվում տրվում: Ամեն մի մեղադրանք հո չի կարելի հենց էնպես վերցնել ու հնչեցնել: Ի վերջո գոյություն ունի անմեղության կանխավարկած:

-Ուրեմն Դուք և՞ս չեք հավատում Սրբազանի անվան հետ առնչվող օֆշորային սկանդալին:
-Ես հավատալու կամ չհավատալու խնդիր չունեմ ,որովհետև միշտ էլ ամեն մարդու կարող են զրպարտել: Ես հավատում եմ իմ հոգևոր եղբորը, իսկ նա հերքել է:

-Այսինքն հի՞մք չունեք հավատալու հրապարակմանը, բայց հիմք ունեք հավատալու Սրբազանի՞ն:
- Ես հիմք ունեմ հավատալու այն բանին, ինչ Սրբազանն է ասում՝ ինքը կապ չունի օֆշորում այդ գրանցման հետ: Իսկ ես ինչու՞ պիտի չհավատամ Կճոյանին: Ստացվում է՝ չհավատամ իմ եղբորը, ում ճանաչում եմ արդեն 30 տարի, հավատամ մամուլի՞ ն: յստեղ չկա տղամարդկային «սոլիդարնըստ» ասվածը, ես և Նավասարդ Սրբազանը միասին ենք ընդունվել Ճեմարան 1981-ին և այս ամբողջ 30 տարին ճանապարհ ենք անցել միասին: Մենք եղբայրներ ենք և շատ տարբեր:

-Նամակում, որով ստորագրահավաքից հետո պատրաստվում են դիմել Վեհափառին, այսպիսի ձևակերպում կա՝ « Նավասարդ Կճոյան հոգևորականը ամբողջովին հեռացել է եկեղեցուց և ներքաշվել գողական կյանքի մեջ»: Ինչու՞ է ձևավորվել այս կարծիքը:
-Բնավ չեմ կիսում այդ տեսակետը, իսկ ինչո՞ ւ պիտի համաձայն լինեի:

- Կարծիք կա, որ վերջին տարիներին սրբազանի ակտիվ մասնակցությունը զանազան միջոցառումներին, չիովնիկների քեֆերին ու խնջույքներին, Ինչպես նաև հայտնի պատմությունները՝ կապված «JOZE» ռեստորանի և «Բենթլիի» հետ, հիմք ծառայեցին, որպեսզի հասարակության մոտ նվազի հավատը Կճոյան հոգևորականի հանդեպ: Կիսու՞ մ եք այս տեսակետը, Սրբազան:
-Չգիտեմ հասարակություն ասելով ինչ նկատի ունեք, ով է այդ հասարակությունը, որի մոտ այդ հավատը պակասել է: Երևանի եկեղեցիները լեփ-լեցուն են: Եվ հետո ինչ է նշանակում խնջույքների է մասնակցում, աշխարհիկ կյանքի բոլոր հաճույքներից օգտվում…եթե 15 տարվա մեջ, ասենք, մի ռեստորանի բացման է ներկա եղել, դա նշանակում է ինքն աշխարհիկ հաճույքների մե՞ ջ է: Այդքան խոսվում է, թե ռեստորան ունի, բար: Ես չգիտեմ, հետաքրքրված չեմ ու տեղյակ էլ չեմ իր բիզնեսներից, ցակություն էլ չունեմ:

-Այսինքն համաձայն չե՞ ք, որ Սրբազանն սկսել է աշխարհիկ կյանքը գերադասել հոգևորից:
-Ոչ, բացարձակապես այդպես չէ:

-Իսկ եթե հենց Ձեզ հետ համեմատելու լինեք:
-Ամեն մեկս մեր բնավորությունն ունենք, մեր խառնվածքը, իր հայացքները, բայց բոլորս էլ նույն նվիրումով ծառայում ենք նույն եկեղեցուն և նույն ժողովրդին : Մենք բացարձակապես նման չենք իրար, բայց դա չի նշանակում որ իրար հակառակ ենք:

-Այդ դեպքում ինչո՞ւ Դուք այդպես սերտորեն կապված չեք քաղաքական գործիչների հետ, օլիգարխների, ինչու՞ Ձեզ չենք տեսնում պաշտոնյաների միջավայրում կերուխումերին, ռեստորաններում ու «փարթիներում»:
-Հա, բայց ես Երևանի առաջնորդը չեմ , չէ՞. ես Գյումրիի առաջնորդն եմ:

-Ինչ է, Գյումրիում չկա՞ ն պաշտոնյաներ ու օլիգարխներ:
-Չէ , եղել է, որ Վադան Ղուկասյանի հետ ներկա եմ եղել միջոցառումներին, և դա եղել է մինչև մեր միջև եղած հայտնի կոնֆլիկտը: Այ քեֆերի, ուրախությունների իրոք չեմ մասնակցել, բան չունեմ ասելու, բայց քաղաքային միջոցառումներին ինչպե՞ս կարող էի ներկա չգտնվել, չեմ պատկերացնում:

-Երբևէ մտածե՞լ եք, Սրբազան, եթե Դուք «Բենթլի» նվեր ստանայիք, ի՞նչ կանեիք:
- Ես իսկի չգիտեմ թե որն է դա, ես «Բենթլին» ինչ պիտի անեմ Գյումրու պայմաններում, ես Երևանի առաջնորդը չեմ:

-Այսինքն նման շքեղագույն հաճույքներից օգտվելու կամ Սրբազանի պես աշխարհիկ հաճույքներից ետ չմնալու համար Ձեզ միայն Շիրակում գտնվելու հանգամա՞նք է խանգարում:
-Ես Բենթլի չունեմ, ես մեքենա չեմ վարում, և մեզ համար մեքենան ընդամենը փոխադրամիջոց է, ոչ ավելին: Ի դեպ, ես արդեն իմ մեքենան նվիրաբերել եմ եկեղեցուն և այն ինձ ծառայոււմ է որպես ծառայողական մեքենա: Այդքան խոսվում է այդ «Բենթլիից», հիմա ես այլ ձևով եմ հարցը դնում՝ Երևանի հոգևոր առաջնորդը ավելի անարժան է՝ քան որևիցե մեկ այլ Բենթլի քշո՞ղ, այո ՞»:
Ուրեմն Երևանի առաջնորդը արժանի չէ լավ մեքենա քշելու՞, Դուք այդպե՞ս եք կարծում: Ի վերջո նույն այդ հոգևորականը մասնակցում է բազմաթիվ պաշտոնական հանդիպումների ու արարողություների, ուրեմն ինչ է, «Մոսկվիչո՞վ» պիտի գնա այդ արարողություններին: Դուք ա՞յդ եք ուզում , որ ձեր Սրբազանը «Մոսկվիչով» ման գա քաղաքու՞մ: Նվիրել են՝ մարդն ընդունել է նվերը, երբ Ձեզ են նվիրում, դուք այն նվիրաբերում եք մանկատա՞ նը:

Սրբազանը վերջ ի վերջո ցանկացած ունեցվածք մի օր նվիրաբերելու է եկեղեցուն, նա չունի իր անձնական ունեցվածքը, դա եկեղեցու սեփականությունն է: Այնպես որ ցանկացած կուսակրոնի ունեցվածք իր մահից հետո մնում է եկեղեցուն:

-Ասացիք 30 տարի է ճանաչում եք Սրբազանին, Ձեր աչքերում նա փոխվել է այս տարիներին: Ինչպես որ պնդում են շատերը:
-Չէ, նույնն է: Երևի չեք ճանաչել մոտից, այսօր ընկալումն է փոխվել:

-Դուք և՞ս 200 պաշտոնյաների, գործարարների ու նրանց զավակների կնքահայրն եք, Սրբազան:
-Ե՞ ս, ոչ: Ոչ: Պաշտոնյաների ու նրանց զավակների կնքահայրը չեմ, պարզապես մարդ կա էքստրավերտ է, մարդ կա ինտրավերտ, ինչո՞ ւ եք զարմանում: Ես սիրում եմ փակ կյանքը , ինքն ավելի բաց կյանքն է նախընտրում, դա չի նշանակում, որ բաց կյանքը սիրողը վատ հոգևորական է և հակառակը:

-Վստահորեն պնդում եք, որ Սրբազանի դեմ այս ըմբոստ արշավների մեջ չկան իրական հիմքեր: Ուրեմն ինչի համար է այդ ամենը, ում շահերին է ուղղված: Ժամանակին, երբ Դուք շատ կոշտ ձևով դուրս եկաք Գյումրու քաղաքապետ Վարդան Ղուկասյանի դեմ, գյումրվա ժողովուրդը չընդվզեց Ձեր դեմ , ստորագրահավաքով Ձեզ կարգալույծ անելը չպահանաջեց: Ուրեմն գյումրեցիներն ավելի վա՞ տ հավատավոր էին, ավելի քի՞ չ էին եկեղեցու կողքին կանգնած:
-Իմ դեմ էլ արշավ սկսեցին, բայց ստորագրահավաքի ծրագիրը տապալվեց, քանի որ ոչ մեկը չստորագրեց իմ դեմ: Հիմա ինչ է, կարծում եք Հյուսիսային պողոտայում Սրբազանի դեմ 1 միլիոն մա՞ րդ պիտի ստորագրի:

-Ո՞ ր թիվն է Ձեզ համար որոշիչ ՝ բարոյական իմաստով:
-Երևանցիների կեսից ավելին է որոշիչ, իսկ եթե Հայրապետական թեմի կեսից ավելին չի ստորագրում, ուրեմն ինչի՞ մասին է խոսքը:

-Ասենք 300 000 ստորագրությունը չի՞ խոսում այն մասին, որ այնուամենայնիվ ռեալ դժգոհություն կա: Եվ ո՞րն է լինելու այս դեպքում առաջնորդարանի անելիքը ըստ Ձեզ, եթե կիսից պակաս, բայց զգալի քանակ այնուամենայնիվ լինի:
-Ուրեմն այդ դեպքում կստացվի, որ Ձեր նշած 300 000-ից 290 000-ը ուղղակի անցնելով վերցրել ու ձեռի հետ անտարբերությամբ ստորագրել թերթիկը, իսկ սա չի նշանակում որ նրանք բոլորը շահագրգռված են: Հավատացեք, հասարակության համար հոգևորականի ճակատագիրը ամենավերջին հարցն է՝ սոված է, կուշտ է, Բենթլիով է ման գալիս, թե ոտքով:

Այս ակտիվությունն ավելի շատ կապում եմ մամուլի բարձրացրած աղմուկի հետ, մարդիկ հավեսի են ընկել:

-Չար լեզուները տարածում են , թե իբր սա Մայր Աթոռից ուղղորդված քաղաքականություն է՝ պայմանավորված՝ Վեհափառի եղբորն այդ պաշտոնին տեսնելու ձգտումով:
-Մայր աթոռից ինչու՞ պիտի այս ամենը գա, հետաքրքիր: Ո՞րն է շահը: Հոգևորականները համերաշխ են:

-Եթե համերաշխ եք, այդ դեպքում տարօրինակ չէ՞, որ այս աղմուկից հետո որևէ հոգևորական այդ թվում և Դուք, չշտապեցիք կարծիք հայտնել, զորակցել Նավասարդ Սրբազանին:
-Հիմա օգտվելով առիթից՝ հորդորում եմ մեր հայրենակիցներին, ձեռնպահ մնալ ավելորդ անհաշտություն ու անհանդուրժողականություն քարոզելուց: Դադարեցրեք այս աղմուկը և աղոթեք մեր Սրբազանի համար, որպեսզի ինքը շարունակի իր ծառայությունը կատարել:

-Եթե մի պահ պատկերացնենք Դուք էինք դատափետվող Սրբազանի փոխարեն, որը կլիներ Ձեր հաջորդ քայլը:
-Ինչ պիտի անեի, կշարունակեի ծառայել եկեղեցուն, իսկ եթե ինչ որ բանում սխալ էի՝ կփորձեի գտնել ու շտկել այդ սխալը:

Հարցազրույցը՝ Սյուզի Բադոյանի