Ձեր վստահելի աղբյուրը

Աշխատանքի տեղավորման գործակալությունների տվյալների համաձայն`այսօր աշխատաշուկայում առավել պահանջարկ ունեն գրասենյակային, սպասարկման և ծառայությունների ոլորտի (մատուցողուհիներ, վաճառողներ, վարսահարդարներ և այլն), ինչպես նաև՝ առևտրի ոլորտի աշխատողները:

Սակայն առաջարկվող աշխատանքների հայտարարություններին ծանոթանալով՝ տեսնում ենք, որ աշխատանքի համար առաջնային պայման դրվում է արտաքին տեսքը, ինչպես նաև՝ տարիքը. 35 տարեկանից հետո թե՛ կանանց, թե՛ տղամարդկանց համար  դժվարանում է աշխատանք գտնելը:

Աշխատանքի տեղավորման գործակալություններից մեկի աշխատողը մեզ հետ զրույցում նշեց, որ արդեն երկու ամիս է, ինչ աշխատում է գործակալությունում: Նրա խոսքով` այս երկու ամսվա ընթացքում գործատուների կողմից այնպիսի առաջարկների է ականատես եղել, որ «մազերը բիզ-բիզ են կանգնել»: «Աբսուրդի հասնող պահանջներ: Օրինակ` պահանջում են հավաքարար` անգլերենի, ռուսերենի գերազանց իմացությամբ: Կամ` 20-25 տարեկան մատուցողուհիներ 5-6 տարվա աշխատանքային փորձով»,- ասաց գործակալության աշխատակցուհին:

Նա ցավով նկատեց, որ այսօր աշխատանքի տեղավորման գործակալություն են դիմում այնպիսի մարդիկ, ովքեր ունեն բարձրագույն կրթություն, ժամանակին լավ աշխատանք են ունեցել, սակայն այսօր կանգնել են փաստի առաջ. աշխատանք չունեն, բայց պատրաստ են ամեն ինչ անել: «Նրանք այսօր ստիպված են հավաքարար կամ սպասք լվացող աշխատել, քանի որ այլ աշխատանքի նրանց պարզապես չեն վերցնում»,- ասաց Նարինեն:

Մեկ այլ գործակալության աշխատակից էլ նշեց, որ իրենց ավելի շատ դիմում են բուհերի ուսանողները, կամ էլ նոր ավարտածները: «Փաստորեն, այս երեխաները 4 տարի սովորում են, բայց մնում են անաշխատանք: Ստիպված դիմում են աշխատանքի տեղավորման գործակալություն: Օրինակ` երկու օր առաջ մեզ էր դիմել երկու տարի առաջ մանկավարժական ինստիտուտն ավարտած մի աղջիկ: Նա նշեց, որ դպրոցում չի կարողանում աշխատանքի տեղավորվել, ազատ տեղ չկա, իսկ լինելու դեպքում՝ իրենց ծանոթներին են աշխատանքի ընդունում: Հիմա ստիպված գործավարուհու աշխատանք էր փնտրում»,- ասաց Արամը:

22-ամյա Անին, ով ավարտել է Երևանի պետական համալսարանի հոգեբանության ֆակուլտետը, մեզ հետ զրույցում նշեց, որ արդեն մեկ տարի է աշխատանք է փնտրում, գործակալություններին դիմել է, սակայն ոչ մի արձագանք չի ստացել: «Անիմաստ գումար եմ վճարել: Այնպիսի աշխատանք են առաջարկում, որ լսել անգամ չեմ ուզում: Ինչի համար եմ սովորել, որ գնամ ինչ-որ մեկի համար սուրճ եփող աշխատեմ: Ինչ օրի ենք հասել: Պետությունը ընդամենը մի քանի հոգու աշխատանքի է տեղավորում ու ասում է` մարդկանց համար աշխատատեղեր եմ բացել: Բայց փաստը մնում է փաստ, որ գործազուրկների թիվը գնալով ավելանում է»,- նշեց Անին:

Այդուհանդերձ, նա ասաց, որ թեկուզ աշխատանք չճարի, միևնույն է Հայաստանից չի գնալու: «Նախ արտասահմանում բարեկամ չունեմ, հետո մորս չեմ կարող մենակ թողնել: Ստիպված կաշխատեմ ոչ իմ մասնագիտությամբ»,- ասաց նա:

«Զբաղվածության պետական ծառայություն» գործակալության տվյալներով` Հայաստանում 2013թ. մայիսի 1-ի դրությամբ աշխատանք փնտրողների թիվը կազմում է շուրջ 85 հազար, ինչը նախորդ տարվա նույն ժամանակահատվածի համեմատ նվազել է շուրջ 14 %-ով:

Ըստ գործակալության` շուկայում շարունակում է բարձր մնալ գործազուրկ կանանց թիվը` 72,9%: Նշենք, որ գործազուրկների թվաքանակում մեծ թիվ են կազմում ինժեներները, բուժքույրերը, տնտեսագետները, հաշվապահները, դիզայներները, բանվորներն ու վարորդները: