Ձեր վստահելի աղբյուրը

«Հայկական ժամանակ»-ին հայտնի է դարձել, որ երեկ առավոտյան ԱԱԾ է հրավիրվել ԱԳ նախկին նախարար, ԱԺ ԲՀԿ-ական պատգամավոր Վարդան Օսկանյանը: Նրանից, սակայն, մեկնաբանություն ստանալ չի հաջողվել: «ԱԱԾ աղբյուրները հայտնում են, որ փողերի լվացման աղմկոտ գործի նախաքննությունը, որով Օսկանյանն անցնում է որպես մեղադրյալ, ավարտվել է: ԱԱԾ մամուլի խոսնակը տեղեկությունը պաշտոնապես չի հաստատել»,-գրում է թերթը, նշելով, որ իրենց աղբյուրների համաձայն, ԱԱԾ-ն այդ մասին պաշտոնապես կհայտարարի առաջիկայում:

Շարունակելով թեման՝ թերթը գրում է, թե ականատեսները ֆիքսել են Վ.Օսկանյանի ելքը ԱԱԾ-ից: Թերթը գրում է. «Տարօրինակ է սակայն, որ և ԱԱԾ-ն, և Օսկանյանն ու յուր թիմը փորձում են գաղտնի պահել սույն փաստը: …Ինքը, Օսկանյանը, մեր հեռախոսազանգերին չի պատասխանում: Նրա շահերի պաշտպան Տիգրան Աթանեսյանից ևս մեկնաբանություն վերցնել չհաջողվեց: Չհաջողվեց զրուցել անգամ «Սիվիլիթաս» հիմնադրամի տնօրեն Սալբի Ղազարյանի հետ: …Իրականում, ինչպես փոխանցում են ԱԱԾ մեր աղբյուրները, փողերի լվացման սկանդալային գործով նախաքննությունն, ըստ էության, ավարտվել է և առաջիկայում գործը կհայտնվի դատարանում:

Ամբողջ այս ընթացքում, ինչպես հայտնի է, Օսկանյանը հրաժարվում էր ցուցմունք տալ սույն գործի շրջանակներում, իսկ ամեն անգամ հարցաքննության հրավիրվելուց հետո «Ֆեյսբուքում» գրառում էր անում, որ կրկին ԱԱԾ է հրավիրվել: Վերջին անգամ նա նման գրառում է արել 2012թ.–ի նոյեմբերի 9-ին: Եվ ուրեմն, ինչու է լռում Օսկանյանը: Ինչու սկանդալային այս գործը, որը սկսվեց մեծ շոուով, աղմուկ-աղաղակով, կամաց-կամաց քնեցվեց: Դեռ ամիսներ առաջ, հղում անելով լավատեղյակ աղբյուրներին, գրել էինք, որ Օսկանյանի գործն այսպես դանդաղ և անաղմուկ մի օր «փակվելու» է: Համենայնդեպս, մինչ այս պահն այդպես էլ շարունակվում է:

Եվ ահա՝ երեկվա հրավերն ու գործի նախաքննության ավարտի մասին տեղեկությունը: Չի բացառվում, որ Օսկանյանին հրավիրել են հենց այդ մասին իրազեկելու: Թե ինչու է նա աշխատում չհրապարակայնացնել այս ամենը, անհասկանալի է: Ընդհանրապես, վերջին շրջանում Օսկանյանը կտրականապես հրաժարվում է լրատվամիջոցների հարցերին պատասխանել: Երբեմն-երբեմն նա հայտնվում էր ԱԺ նիստերին և աննկատ հեռանում՝ որևէ դահլիճային քննարկման չմասնակցելով: Այնինչ, քննարկումները բավական թեժ էին: Նախկին արտգործնախարարը, որ նախկինում աչքի էր ընկնում իր ընդդիմադիր ելույթներով և իշխանությունների ու մասնավորապես գործող կառավարության գործունեության հանդեպ սուր քննադատությամբ, որևէ ձևով չարտահայտվեց ոչ օֆշորային սկանդալային պատմության, ոչ 2012 թ. բյուջեի կատարման մասին հաշվետվության խորհրդարանական քննարկման, ոչ էլ նոր ձևավորված կառավարության ներկայացրած ծրագրի քննարկման վերաբերյալ: Նա խուսափեց անգամ գնահատել Երևանի ավագանու ընտրությունները: …Այս օրերին մամուլում տեղեկություն տարածվեց, որ «Սիվիլիթաս» հիմնադրամի խորհրդի անդամ Ջոն Հանթսմանը խզել է բոլոր կապերը Օսկանյանի հետ և դադարեցրել հիմնադրամի ֆինանսավորումը: «Սիվիլիթասի» տնօրեն Սալբի Ղազարյանն անգամ դա չէր մեկնաբանել»: