Ձեր վստահելի աղբյուրը

Ծնունդները տեղայնացնելու վերաբերյալ առողջապահության նախարար Դերենիկ Դումանյանի հրամանից հետո երկու ամիս  է անցել, սակայն խոսակցությունները դրա շուրջ շարունակվում են: Գլխավոր հարցը, որ հուզում է բոլորին, այն է, թե արդյոք ծննդատները հագեցա՞ծ են անհրաժեշտ սարքավորումներով, մասնագետներով և համապատասխանո՞ւմ են նվազագույն չափանիշներին, որպեսզի կինը վստահի իր և ապագա երեխայի կյանքը դրանց: Ի վերջո, երաշխավորելը դժվար է, թե ամեն ինչ լավ կլինի, եթե բուժհաստատության արտաքին տեսքն ու սարքավորումների հնամաշ լինելը ինքնին խոսուն փաստ են:

Բոլորովին վերջերս թեմային նվիրված քննարկումներից մեկում ԱԺ «Ժառանգություն» խմբակցության պատգամավոր Թևան Պողոսյանը հանդես եկավ տեսակետով, որ որոշումը, այդուհանդերձ, ճիշտ չէ` հաշվի առնելով ոչ թե գաղափարը, այլ վերոնշյալ խնդիրները, իսկ Առողջապահության նախարարության մայրական և վերարտադրողական բաժնի պետ Գայանե Ավագյանը հակադարձեց նրան` ճիշտ է: ՄԱԿ-ի բնակչության հիմնադրամն էլ առաջարկեց նախաձեռնել շրջայց հայաստանյան ծննդատներով, որպեսզի լրագրողները տեղում տեսնեն ինչն-ինչոց է և ըստ այդմ որոշակիորեն հստականա դաշտը, որը լուսաբանվում է: Ինչպես ասում է ռուսը` сказано-сделано!

Շրջայցի առաջին կանգառը Արտաշատի ծննդատանն էր. ծննդատունը դիմավորեց ժավելի տարածված հոտով, կոնսուլտացիայի բաժանմունքում բազմաթիվ հղիներով ու նրանց ուղեկցողներով, ինչն էլ եկավ ապացուցելու, որ հղիների պակաս այս ծննդատանը թերևս չկա: Փոխարենը կա հարմարությունների, նոր սարքավորումների և ընդհանուր առմամբ՝ վերանորոգման պակաս` մահճակալները հին են, սարքավորումները նույնպես, իսկ նորածինների պրոցեդուրային սենյակը (որն այնքան փոքր էր, որ հազիվ երկու հոգի էին դրանում տեղավորվում) առհասարակ պատգամավոր Թևան Պողոսյանի վրդովմունքը հանգեցրեց` երեխաներին պառկացնելու համար նախատեսված հատվածի հարևանությամբ դրված էր փոքրիկ «կաստրյուլկա», կողքը մաքրող միջոց «Rakhsha»... մի խոսքով` Թևան Պողոսյանը, ով հինգ երեխաների հայր է, ասաց, որ երբեք թույլ չէր տա, որ իր երեխան ծնվեր ու խնամվեր նման պայմաններում: Ավելին` պատգամավորը հայտարարեց, ինչը բավականին բացասաբար ընդունվեց տնօրինության կողմից, որ այս հարցը կբարձրացնի Առողջապահության նախարարությունում.

«Ես որ մտնեմ սենյակ, արդեն չեմ թողնի, որ երեխաս այստեղ լինի... առհասարակ, այստեղ շրջելով՝ ես չեմ կարծում, թե որևէ մեկը նորից կցանկանա գա ու այստեղ ծառայություն ստանա: Իսկ ծննդատունը պետք է հավուր պատշաճի ծառայություն մատուցի»,- հայտարարեց Թ.Պողոսյանն ու լքեց սենյակը, մինչդեռ բժիշկը, ով ողջ ընթացքում փորձում էր ինչ-որ բան հակաճառել, արդարացրեց սենյակի գոյությունը` «կարևորը, որ սառնարանն աշխատում է...» (խոսքը պատվաստանյութերի, դեղերի պահպանման համար նախատեսված սառնարանին է վերաբերում):

Տարեկան Արտաշատի ծննդատանը ծնվում է շուրջ 600 երեխա: Բժշկական կենտրոնի տնօրենի ժամանակավոր պաշտոնակատար Վարդան Հովհաննիսյանը լրագրողների հետ զրույցում ասաց, որ մայիսին ծննդատանը եղել է ծնունդների գրեթե նույն ցուցանիշը, ինչ նախորդ ամիսներին` 45 ծնունդ, Երևանում ծննդաբերել է 14 կին, որոնք ոչ թե ուղեգրվել են, այլ ինքնակամ որոշում կայացրել: Իսկ հունիսին արդեն նկատել են շոշափեի փոփոխություն` 12 ծնունդ ավելացել է, իսկ Երևան գնացողների թիվն էլ երեքով պակասել.

«Իմ կարծիքով երկու ամիսը դեռ այն ժամանակը չէ, որպեսզի վերլուծենք, թե ինչպես է հրամանը աշխատում, բայց որոշակի տենդենց կա: Ամեն դեպքում կարող եմ ասել, որ հունիսին դրական դինամիկան երևում է»,- նշեց նա:

Հարցին, թե ինչպե՞ս է ինքը վերաբերում նախարարի հայտնի որոշմանը, արդյոք այն ժամանակավրե՞պ չէր, Վ.Հովհաննիսյանը պատասխանեց.

«Այսպես ասեմ. Որպես տնօրեն` հրամանը միանշանակ հօգուտ մեր բժշկական կենտրոնի է, բայց որպես քաղաքացի` ես համարում եմ, որ քաղաքացին պետք է ազատ ընտրություն ունենա ծննդաբերելու՝ անկախ նրանից, թե որտեղ է գրանցված»,-շեշտեց նա:

Այն հարցադրումներին, թե ինչու է Երևանից ոչ այդքան հեռու գտնվող քաղաքի ծննդատունը նման վիճակում, ամեն կողմից լսվում էր նույն պատասխանը` փող չկա: Գայանե Ավագյանն անգամ ասաց, թե` «պատգամավորն ուզում է, որ լինի շքեղ մահճակալ, բայց դա չէ բուժօգնությունը» և մատնանշեց պալատը, որում, ըստ նրա, այնքան էլ վատը չէին պայմանները, որպեսզի կինը ընդամենը երկու օր այդտեղ ապրի: Նրա համոզմամբ՝ կարևորը ծառայությունների պատշաճ մակարդակն է, որն էլ մատուցվում է և եթե 600 երեխայի փոխարեն այս ծննդատանը տարեկան ծնվի 300 երեխա, ապա բյուջեն չի էլ հերիքի.... Բայց արդյոք հղի կնոջը այդ հարցը հուզո՞ւմ է կյանքի այն հատվածում, երբ նա մտածում է անել ամենը, որպեսզի իր երեխայի կյանքը որևէ բան չվտանգի:

Հ.Գ. Նշենք, որ 25 հազար բնակչություն ունեցող Արտաշատից ընդամենը կես ժամ հեռավորության վրա տեղակայված Արարատ քաղաքում գտնվող ծննդատունը ուղղակի հակապատկերն էր Արտաշատի ծննդատան: Ինչն էլ բացատրելի է` բուժհաստատությունը վերանորոգվել է 2010 թ-ին Համաշխարհային բանկի ծրագրով, ոչնչով չի զիջում մայրաքաղաքի ծննդատներին, այնպես որ նախարարի հրամանն այս հաստատությունում ընդունել են առանց հատուկ էնտուզիազմի` դժվար թե արարատցիները ձգտեին Երևան, եթե բոլոր հարմարանքները հարևանությամբ են: