Ձեր վստահելի աղբյուրը

Սյունիքի մարզի Արևիս համայնքի վարչական տարածքում գտնվող, հանրապետական նշանակության, պետական սեփականություն հանդիսացող Թանահատի վանքի Սրբ. Ստեփանոս եկեղեցին հուլիսի 14-ին մասնակի փլուզվել է: Այս մասին Panorama.am-ը տեղեկացավ «Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ-ի պաշտոնական կայքից:

Փլուզվել է հարավային մուտքից վերև գտնվող հատվածը` մինչև մուտքի ճակատկալ քարը: Պատճառը` հուլիսին տեղացած հորդառատ անձրևներն են եղել: Սրբ. Ստեփանոս եկեղեցին, որը կառուցվել էր 5-րդ դարում, «Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ-ի մարզային ծառայության կողմից ներառված է եղել առավել վտանգված հուշարձանների ցուցակում:

Ի դեպ, հիշեցնենք, որ դեռևս ամիսներ առաջ Panorama.am-ը մշակույթի նախարարությունից հետաքրքրվել էր, թե ինչ «ճակատագիր» է սպասվում 5-րդ դարով թվագրվող կիսավեր վիճակում գտնվող հուշարձանին: Ի պատասխան ասված էր` «Հայաստանի մշակույթի նախարարության 2013 թ. «առավել վտանգված հուշարձանների տեխնիկական վիճակի դիտանցման ծրագրում» արդեն իսկ ներառված է Սյունիքի մարզի Թանահատի վանքը, իսկ դրա ամրակայման և վերականգնման նախագծանախահաշվային փաստաթղթերի պատրաստումը կնախատեսվի 2014 թ. պետական բյուջեով»:
Արդյոք կիսավեր հուշարձանը «կպահպանվի» մինչև 2014 թվական, դժվար է ասել:

Սուրբ Ստեփանոս եկեղեցին դրսից ու ներսից սրբաշատ, խոշոր կարմրավուն քարից կառուցված բազիլիկ շինություն է: Եկեղեցին ունեցել է սրահ և ավանդատուն: Սյունասրահի խոյակները զարդարված են շուշանածաղիկներով: Վանքին կից պահպանվել է գերեզմանատունը խաչքարերով ու տապանքարերով:
1975թ. Թանահատի ավերակներում հայտնաբերվել է ուրարտերեն սեպագիր արձանագրություն փորագրված բազալտե քարակոթողի երկու երեսին, որից մեկում քրիստոնեական շրջանում տաշվել և տեղում խաչ է քանդվել: 

Նախորդող նորություններ`   Թանահատի վանքը կործանման եզրին է… «հսկում» է մշակույթի նախարարությունը

«Թանահատի վանքում վերջին տարիներին կամ օրերին ոչ մի քար չի փլուզվել ու չի տեղաշարժվել»

Տեր Վահրամ. Պարագաներ, որ գործարարի անունով եկեղեցի լինի, ինձ հայտնի չեն