Ձեր վստահելի աղբյուրը

Երևանի քաղաքապետարանի առջև բողոքի ակցիայի մասնակիցներին էին միացել նաև «Բարև Երևան» դաշիքնի անդամները` Անահիտ Բախշյանը, Ստյոպա Սաֆարյանը, Դավիթ Սանասարյանը:

Ստյոպա Սաֆարյանը նշեց, որ հասարակական տրանսպորտի ուղեվարձի թանկացման հարցը պատրաստվում են բարձրացնել Երևանի ավագանու արտահերթ նիստում: ««Բարև Երևան»-ը դիմել է, որպեսզի արտահերթ նիստ գումարվի, քանի որ այս հարցի վերաբերյալ Երևանի ավագանին լռելու իրավունք չունի»,- ասաց Ս.Սաֆարյանը:

Դավիթ Սանասարյանը, անդրադառնալով «Ֆեյսբուք» սոցիալական ցանցում բացված էջին, մասնավորապես տրանսպորտի ուղեվարձի թանկացման հետ կապված այսօր Երևանի քաղաքապետարանի առջև կազմակերպված բողոքի ակցիային, նշեց, որ ֆեյսուքը լավ թեև լավ հարթակ է, սակայն ֆեյբուքից դուրս որոշ հարցերում թերանում ենք: «Կարող ենք տանից լավ բողոքել, բայց դե արև է ու չենք կարող էստեղ կանգնել: Փաստորեն ուղեվարձի թանկացումը ընդամենը այսքան մարդու է հետաքրքրում: Մենք ենք չունևոր խավը, եկել ենք էստեղ ու 50 դրամի խնդիր ենք լուծում: Այդ գիտակցությունը մեր մեջ դեռևս չկա: Յուրաքանչյուր քաղաքացի պիտի գիտակցի, որ իր ձայնից ու իր քայլերից է կախված թե երկրի, թե իր երեխաների ապագան»,- ասաց նա:

Ինչ վերաբերում է տրանսպորտի ուղեվարձի բարձրացմանը, Դ.Սանասարյանը նշեց, որ քաղաքապետ Տարոն Մարգարյանը Երևանու ավագանու ընտրության քարոզարշավի ժամանակ խոստացել էր, որ առաջիկայում տրանսպորտի սակագնի բարձրացման հարց չի քննարկվելու. «Բայց տեսանք ինչ եղավ»: Ինչ վերաբերում է քաղաքապետարանի այն հայտարարությանը, թե ուղեվարձի թանկացումը կապ չունի գազի սակագնի բարձրացման հետ, այլ կապված է դիզվառելիքի թանկացման և ներկրված նոր ավտոբուսների հետ, որոնց ծախսերը բավականին մեծ են, Դ.Սանասարյանն ասաց, որ նոր ավտոբուսը երկար ժամանակ որևէ տեխնիկական խնդիր չի ունենում, հետևաբար, քաղաքապետարանի հիմնավորումները տրամաբանական չեն:

Նա նշեց նաև, որ ինքը հիմնականում օգտվում է հասարակական տրանսպորտից, սակայն չի պատրաստվում 150 դրամ վճարել: «Վարորդին կբացատրեմ, որ սա իր դեմ ուղղված չէ»,- ասաց Դ.Սանասարյանը` հավելելով, որ ամեն դեպքում փորձելու են Երևանի ավագանու արտահերթ նիստ հրավիրել, հարցը բարձրացնել և լսել նրանց հիմնավորումները: «Ցանկացած ժամանակ կարելի է նոր որոշում ընդունել, որևէ խնդիր այստեղ չկա: Եթե գնան ընդառաջ և վերանայեն իրենց որոշումը, ապա որևէ մեկը չի ասի, որ նրանք անսկզբունքային են, ուղղակի կասենք, որ այդ քայլերը մտածելուց հետո են անում և կողջունենք իրենց որոշումը»,- ընդգծեց Դ.Սանասարյանը:

Հիշեցնենք, որ Երևանի քաղաքապետարանի որոշմամբ, հասարակական տրանսպորտի ուղեվարձը հուլիսի 20-ից կթանկանա 50 դրամով և կկազմի 150 դրամ:

Նախորդող հրապարակում՝ Կոպեկներից մեկը դիպավ քաղաքապետի խորհրդականի գլխին. «Գնացեք, որտեղ ուզում եք բողոքեք, վերջացավ» (Տեսանյութ) 

Ակցիայի մասնակիցները 50 դրամանոցներ նետեցին. «Սրանով կշտացեք» (Տեսանյութ)