Ձեր վստահելի աղբյուրը

Դեղագործության ոլորտում կրթության որակը բարձրացնելու և կրթական հաստատություններում ուսուցանվող գիտելիքների ու գործատուի կարիքների միջև անհամապատասխանությունը հարթելու նպատակով ԱՄՆ ՄԶԳ Ձեռնարկությունների զարգացման և շուկայի մրցունակության (Ի-Դի-Էմ-Սի) ծրագրի աջակցությամբ Հայաստանի դեղ արտադրողների և ներմուծողների միությունը հուլիսի 1-ից 20-ը Հայաստանի Պետական ճարտարագիտական համալսարանում (ՀՊՃՀ) անցկացրել է «Դեղագործության ոլորտի ամառային դպրոց» միջոցառումը։

ԴԱՆ Միության փոխանցմամբ` միջոցառմանը մասնակցել են դեղագործության ոլորտն ուսումնասիրող 35 ուսանողներ` Հայաստանի դեղ արտադրողների և ներմուծողների միության գործընկեր Երևանի Մ. Հերացու անվան պետական բժշկական համալսարանից, ԵՊՀ-ից, Մեհրաբյանի անվան Երևանի բժշկական ինստիտուտից, Երևանի հայ-ամերիկյան «էրեբունի» պետական բժշկական քոլեջից, Գիտությունների Ազգային Ակադեմիաից, Եվրոպական տարածաշրջանային ակադեմիայից և ՀՊՃՀ-ից։

Դասընթացները վարող ոլորտի առաջատար մասնագետները ուսանողներին գիտելիքներ են փոխանցել դեղագործության ոլորտի տարբեր ուղղությունների վերաբերյալ, այդ թվում՝ Գործունեության ստանդարտ ընթացակարգերի (ԳՍԸ), Պատշաճ բաշխման գործունեության (ՊԲԳ), դեղագործության ոլորտում մտավոր սեփականության պահպանության առանձնահատկությունների մասին, ինչպես նաև ներկայացրել են առանձին մասնագիտական ուղղությունների համար պահանջվող անհրաժեշտ հմտություններ։

Հուլիսի 12-ին, դասընթացի մասնակիցները այցելել են «ԷՖ-ԴԻ-ԵՅ ԼԱԲ» սննդի և դեղերի փորձաքննության լաբորատորիա, իսկ հուլիսի 20-ին՝ Լիկվոր դեղագործական ընկերություն` նրանց աշխատանքներին և մատուցվող ծառայություններին տեղում ծանոթանալու նպատակով։

Ամառային դպրոցի ավարտին շրջանավարտներին շնորհվել են մասնակցության վկայականներ:

«Ամառային դպրոց» միջոցառումը անցկացվել է ԴԱՆ միության և վերոնշյալ ԲՈՒՀ-երի միջև կնքված համագործակցության հուշագրերի շրջանակներում։ Այն իրենից ներկայացնում է «Ի-Դի-Էմ-Սի»-ի աջակցությամբ իրականացվող ծրագրի երկրորդ փուլը։ Առաջին փուլը՝ «Կարիերայի օր» միջոցառումը, անց է կացվել սույն թվականի ապրիլ-մայիս ամիսներին։ Իսկ ծրագիրը կավարտվի սեպտեմբեր ամսին՝ «Կարիերայի տոնավաճառ» միջոցառմամբ։