Ձեր վստահելի աղբյուրը

Ինչպես նախորդ օրերին, այսօր էլ օրս սկսվեց կանգառում երկար սպասելով քաղաքային տրանսպորտի: Ավելի քան 40 րոպե սպասելուց հետո հեռվում նշմարեցի այդքան «սիրելի» 54 համարի ավտոբուսը: Հարևանուհուս հետ մի կերպ խցկվեցինք ավտոբուսի մեջ: Երբ վարորդին հարցրեցի, թե ինչո՞ւ է 40 րոպե հետո գալիս, նա ժպիտը դեմքին ասաց. «Աղջիկ ջան, լավ ա, որ 40 րոպե եք սպասել, գծում ընդամենը 5 մեքենա ա, տուն գնալուց նկատի կունենաս»:

Խոսակցությանը խառնվեցին մի քանի ուղևորներ ևս: «Էս ի՞նչ եք անում մեր գլխին, 150 դրամ եք դարձրել, որ սենց անեք: Ինչ պայմաններով ենք աշխատանքի հասնում, ամոթ ունեցեք էլի»: Վարորդը շատ հանգիստ բոլորին պատասխանում էր. «Վերևում «Երևան ավտոբուս» ՓԲԸ-ի հեռախոսի համարն ա, բոլոր հարցերով դիմեք իրենց»:

Վարորդը նշեց, որ վարորդների մեծ մասը չեն աշխատում` արձակուրդում են: Մի քանի օր հետո նա նույնպես արձակուրդ կգնա, բայց դրանից հետո աշխատանքի չի վերադառնա: «Հոգնել եմ, մեզ էլ հասկացեք: Մեր վարորդներից մեկը օրվա պլանը հանելու համար էնքան ա աշխատել, որ ոտքին կոճ ա առաջացել: Մարդ ենք չէ, մենք էլ ընտանիք ունենք», - ասաց նա:

Հասանք հերթական կանգառներից մեկը: Ուղևորներից մեկը վճարեց 100 դրամ, վարորդի հիշեցմանը` 150 դրամ է, ուղևորը պատասխանեց. «Չեմ պատրաստվում 150 դրամ վճարել»: Վարորդը սրտնեղած ասաց, որ իր համար էլ հեշտ չէ, ինքն էլ երեխաներ ունի, որ ամեն օր մի քանի անգամ օգտվում են տրանսպորտից, բայց ինչ կարող է անել, օրվա պլանը 50 տոկոսով բարձրացրել են:

Նրան խնդրեցի ցույց տալ այն փաստաթուղթը, որտեղ նշված է, թե որքան է վճարելու գծի տիրոջը, վարորդը մեծ սիրով այն փոխանցեց ինձ: Փաստաթղթում պարզ նշված էր. մինչև հուլիսի 19-ը նրանք օրական վճարել են 33 հազար դրամ, իսկ հուլիսի 20-ից հետո` 49 500 դրամ: «Հիմա տեսաք, թե մեզանից ինչեր են պահանջում: Ես ո՞նց էդքան գումարը մուծեմ: Երեկ հազիվ դրա կեսն եմ հանել, ախր ինչ կարող եմ անել», - սրտնեղած ավելացրեց վարորդը:

Ուղևորներից մեկն ասաց, որ եթե նորմալ սպասարկեն, գերբեռնված չքշեն, ապա գոնե այդ դեպքում կհամաձայնեն 150 դրամ վճարել: Դրանից հետո ուղևորն իջավ 100 դրամ կոպեկը մեկնելով վարորդին: Նա ժպտալով վերցրեց կոպեկը` ասելով, որ էլ ոչ մի ձայն չի հանելու, ով ինչքան ուզում է, թող այնքան էլ վճարի:

Հիշեցնենք, որ երեկ Երևանի քաղաքապետ Տարոն Մարգարյանը հերթական խորհրդակցության ժամանակ հանձնարարել է խստորեն վերահսկել տնտեսվարողների կողմից հասարակական տրանսպորտի սպասարկման պատշաճ որակի ապահովման պարտավորության կատարումը: Նա նաև հայտարարել էր, թե պետք է առավել խիստ և հետևողական լինեն սպասարկման բարձր որակի ապահովման, մասնավորապես` երթուղիների սահմանված չվացուցակների պահպանման և երեկոյան ու առավոտյան ժամերին անհրաժեշտ մեքենաքանակի ապահովման ուղղությամբ: «Պետք է բացառել միկրոավտոբուսներով սահմանված նստատեղերից ավելի անձանց տեղափոխումը»,- նշել էր քաղաքապետ:

40 րոպե սպասելը վառ օրինակ է, որպեսզի քաղաքապետը հետևություն անի, թե ինչպես են տնտեսվարողները կատարում իր հանձնարարականը: