Ձեր վստահելի աղբյուրը

Այս պահին կառավարության շենքի առջև բողոքի ակցիա են անում «Չենք վճարելու 150 դրամ» նախաձեռնության ակտիվիստները, ովքեր իրենց բողոքի ձայնն են արտահայտում ուղեվարձի թանկացման դեմ: Նրանք վանկարկում են «Ոչ 150 դրամին», «100-100» և այլ կարգախոսներ:
Հիշեցնենք, որ նույն այդ պահին կառավարության ներսում ընթանում է հերթական նիստը` վարչապետ Տիգրան Սարգսյանի գլխավորությամբ:

Panorama.am-ի թղթակցի հաղորդմամբ, ակտիվիստները բարձրախոսների միջոցով հայտարարում են, որ պայքարելու են մինչև վերջ և հասնելու են իրենց նպատակին ու բոլորին կոչ են անում միանալ այդ պայքարին ու վճարել միայն 100 դրամ և ոչ մի դրամ ավելի: Ակտիվիստները հայտարարում են, որ սա լուրջ սոցիալական խնդիր ու մեծ բեռ է յուրաքանչյուր ընտանիքի համար, մանավանդ, եթե այդ ընտանիքներում կան ուսանողներ, ու չեն պատրաստվում զիջել գծատերերին:

Նշենք նաև, որ նրանց ձեռքին կան նաև «Մեզ մի կթեք», «Մի վճարիր 150, չէ որ չես ուզում», «Ժպտալով վճարիր 100 դրամ» և այլ գրությամբ պաստառներ:

Panorama.am-ի թղթակցի փոխանցմամբ, ակտիվիստները կառավարության շենքի դիմաց այրեցին պաստառ, որի վրա գրված էր «150 դրամ», ինչը բուռն ծափողջյուններով ողջունվեց հավաքվածների կողմից: