Ձեր վստահելի աղբյուրը

«Հայաստանի և Եվրամիության միջև Ասոցացման և Խորը ու համապարփակ ազատ առևտրի մասին համաձայնագրի» շուրջ բանակցությունների հաջող ավարտի և վիլնյուսյան գագաթաժողովից Հայաստանի ակնկալիքների մասին Panorama.am-ը զրուցեց ԱԺ ֆինանսաբյուջետային հանձնաժողովի նախագահ Գագիկ Մինասյանի հետ:

-Պարոն Մինասյան, հասարակությանը հետաքրքրող առաջնային հարցերից մեկն այն է, թե ինչ է տալու «Ասոցացման և Խորը ու համապարփակ ազատ առևտրի մասին համաձայնագրի» ստորագրումը Հայաստանին: Ի՞նչ պետք է ակնկալել այս փաստաթղթից:

-Վիլնյուսյան գագաթաժողովի և եվրաինտեգրման գործընթացներում հնարավոր զարգացումների մասին խոսելիս կարևոր է հասկանալ, թե ինչ ակնկալիքներ ունեն Եվրամիության Ասոցացման համաձայնագրից Արևելյան գործընկերության երկրները: Պետք է նշեմ, որ դրանք միանգամայն տարբեր են: Արձանագրենք մի շատ կարևոր հանգամանք, որը վճռորոշ է առաջիկա զարգացումները պատկերացնելու համար: Հայաստանն ունի բավական հստակ կողմնորոշում իր ռազմաքաղաքական վեկտորի առումով:

Խոսքը ՀԱՊԿ-ի մասին է: Մենք բավականին լուրջ դերակատարում ունենք այդ ռազմաքաղաքական համակարգում, դրանում ընդունված բազմաթիվ որոշումների նախաձեռնողն ենք, և այդ որոշումներն էապես համահունչ են մեր ազգային ու պետական շահերին: Ասոցացման համաձայնագրի նախաստորագրմանը պատրաստվող մյուս երեք պետությունները որևէ ռազմաքաղաքական դաշինքի մեջ չեն գտնվում: Սա մեզ համար ամենակարևոր առանձնահատկություններից է:

Այս պարագայում ակնհայտ է, որ նրանք, ինտեգրվելով Եվրոպայի հետ, ապագայում ակնկալում են նաև դառնալ ՆԱՏՕ-ի անդամ: Այսինքն՝ այս հարցում Հայաստանի դիրքորոշումը կտրուկ տարբերվում է մնացած երեք երկրների դիրքորոշումից: Մենք տեսանելի ապագայում չենք պատկերացնում, որ այլ ռազմաքաղաքական դաշինք կարող է փոխարինել ՀԱՊԿ-ին: Հայաստանում է գտնվում 102-րդ ռուսական ռազմակայանը, որը չափազանց կարևոր է մեր ռազմաքաղաքական անվտանգության առումով: Այն ոչ պակաս կարևոր է նաև Ռուսաստանի համար այս տարածաշրջանում իր խնդիրները լուծելու առումով:

Տնտեսական ասպեկտի մասին. ճգնաժամերի ժամանակ ներդրումների ծավալները նվազում են բոլոր երկրներում և առաջին հերթին այն երկրներում, որոնք գտնվում են բարձր ռիսկայնության պայմաններում: Այս ճանապարհով ընթանալով՝ մենք ձեռք ենք բերում նոր հնարավորություններ այդ ներդրումների համար, որովհետև Հայաստանում արտադրված ապրանքները հեշտությամբ կարող են ներթափանցել եվրոպական շուկաներ, ապահովելով այդ արտադրատեսակների համար սպառման մեծ հնարավորություններ:

Այս ամենից զատ, Վրաստանի ու Հայաստանի ընդհանուր տնտեսական դաշտում հայտնվելը կփոխի տարածաշրջանի պատկերը: Կառաջանա նոր բաժանարար գիծ` մի կողմում կլինեն Հայաստանն ու Վրաստանը որպես եվրաինտեգրման գործընթացում գտնվող պետություններ, ու մյուս կողմում Ադրբեջանը, որը դուրս է այդ գործընթացից: Այս տեսանկյունից, կցանկանայի հակադարձեի նաև այն մոտեցմանը, թե Հայաստանի եվրաինտեգրացման ուղին հակասում է ՌԴ շահերին, քանզի այն նոր հնարավորություններ կստեղծի Հայաստանում գործող ռուսական ձեռնարկությունների համար:

Հայաստանում բավականին լավ ներկայացված է ռուսաստանյան բիզնեսը, և այդ առումով ռուսական ընկերությունների համար լավ հնարավորություններ կարող են առաջանալ: Նրանք կարող են իրենց համատեղ ձեռնարկությունները հիմնել Հայաստանում և մեր երկրի միջոցով իրենց արտադրանքը ներկայացնել եվրոպական երկրներում:

-Հաշվի առնելով այն հանգամանքը, որ ԼՂ հիմնախնդիրը մնում է չլուծված, շատ կարևոր է հասկանալ, թե ի՞նչ նոր հեռանկարներ կբացի Եվրաինտեգրացման պրոցեսը Արցախի համար:

-Եվրաինտեգրումը հնարավորություն է տալու ԼՂՀ-ին միջազգային ասպարեզում մի նոր ձևաչափով հանդես գալ: Ժողովրդավարության և նաև տնտեսական չափորոշիչների առումով ԼՂՀ-ն շատ ավելի բարձր մակարդակում է, քան Ադրբեջանը: Եվրաինտեգրման գործընթացը նոր հնարավորություն է՝ ԼՂՀ-ի հարցը դիտարկելու տարբեր հարթակներում, այդ թվում՝ նաև քաղաքական:

-Արդյո՞ք երկարաժամկետ հեռանկարում Հայաստանը միտք ունի անդամագրվել Եվրոպական միությանը:

-Մենք չունենք Եվրամիության անդամ դառնալու օրակարգում դրված խնդիր: Մենք ուղղակի ցանկանում ենք ուժեղացնել այն հնարավորությունները, որոնք մեր տնտեսական ու քաղաքական գործընթացները կարող են բարելավել, բերել բարվոք վիճակի: Այս ճանապարհին մենք մեզ համար նոր խնդիր չենք առաջացնում:

Մեր երկրի եվրաինտեգրման քաղաքականության հիմքում դրված են կոնկրետ խնդիրներ, որում հաշվի են առնված մեր պետական շահերը: