Ձեր վստահելի աղբյուրը

«Ինչու՞ զարմանալ: Կարծում եք մի երկրում, որտեղ պետական բյուջեն դատարկվում է, այս տները արդարացիորեն ե՞ն տրամադրվելու: Եթե արդարություն լիներ, նրանք ձեր լռության կարիքը չէին ունենա: Պետք է հասկանանք և ընդունենք, որ այդ 5 միլիոն մանաթը որպես կաշառք է օգտագործվել`ընդդիմադիր թերթերին հանցագործությանը մեղսակից դարձնելու համար»,-անդրադառնալով Ադրբեջանում լրագրողներին անվճար տներ հատկացնելու նախագահի նախաձեռնությանը` իր ֆեյսբուքյան էջում նման գրառում է կատարել անկախ լրագրող Խադիջա Իսմայիլովան, ով հայտնի է նախագահի կլանի կասկածելի գործարքների վերաբերյալ բացահայտումներով:

Նա քննադատել է ընդդիմադիր թերթեր «Ազադլիգ»-ի, «Ենի Մուսավաթ»-ի և «Բիզիմ Յոլ»-ի այն 15 լրագրողներին, ովքեր կառավարության կողմից բնակարաններ են ստացել նոր կառուցված շենքում:

Iwpr.net կայքի հաղորդմամբ` հուլիսի 22-ին Իլհամ Ալիևը պաշտոնապես շահագործման է հանձնել մայրաքաղաք Բաքվի ծայրամասում գտնվող բազմաբնակարանային շենքը` հատուկ նախատեսված լրագրողների համար:

Ըստ նախագահի` լրագրողներն ի վիճակի չեն բնակարանային խնդիրներն իրենց աշխատավարձով հոգալ, ինչով էլ նախագահը պայմանավորել է նման շենք կառուցելու անհրաժեշտությունը: Սակայն Ալիևի այս նախաձեռնությունը քննադատության է արժանացել ոչ միայն Իսմայիլովայի, այլև մի շարք այլ ընդդիմադիր լրագրողների կողմից: Նրանք նշում են, որ Ալիևն այս քայլով ցանկանում է դրական լուսաբանում ստանալ հոկտեմբերին կայանալիք ընտրությունների քարոզարշավի ժամանակ:

Անդրադառնալով լրագրողներին տրամադրվող բնակարաններին` «Թուրան» լրատվական գործակալության ղեկավարն ասել է. «Իրականում սա լրագրողներին գնել է նշանակում: Սակայն, այնուամենայնիվ, քանի՞ բնակարան կա այնտեղ: Առնվազն 1000 լրագրող բնակարանի խնդիր ունի: Ո՞վ է լուծելու նրանց խնդիրները: Միթե՞ նրանք այս բոլոր լրագրողների համար տուն կառուցելու կարիք ունեն: Եվ բացի այդ, տուն ստանալու հարցում լրագրողներն ինչո՞վ են տարբերվում բժիշկներից կամ ուսուցիչներից: Ադրբեջանին քաղաքական և տնտեսական այնպիսի համակարգ է պետք, որը բավականաչափ զարգացած կլինի և թույլ կտա լրագրողներին սեփական միջոցներով կացարան ձեռք բերել, բայց այդ պայմանները չկան: Ահա թե ինչու ես կաշառք եմ համարում այս տների հատկացումը»:

Ի դեպ, «Թուրանը» միակ լրատվամիջոցն է, որ մերժել է նորակառույց շենքում որևէ բնակարան ստանալ իր անձնակազմի համար:

Իսկ ահա մեկ այլ լրագրող` Այգուն Մուրադխանին, ով աշխատում է «Ենի Մուսավաթ» ընդդիմադիր թերթում զայրացել է ոչ այնքան տուն հատկացնելու սկզբունքի վրա, այլ ավելի շատ իր անունը ցուցակում չգտնելու համար: Նրա միանձնյա ցույցը Կառավարության դիմաց ավարտվել է նրանով, որ վերջինիս կանչել են զրույցի, որի ընթացքում սակայն որոշ հարցեր այդպես էլ անպատասխան են մնացել լրագրողի համար: «Ես պարզեցի, որ իմ անունը պաշտոնական հայտարարությունից 3 օր առաջ են հանել: Սակայն այն հարցս, թե ինչու են բնակարանները տալիս այն խմբագիրներին, որոնք մի քանիսն ունեն կամ բացարձակապես անհայտ լրագրողներին, այդպես էլ անպատասխան մնաց: Նրանք խոստացան, որ ես նոր շենքում բնակարան կստանամ»,- նշել է ընդդիմադիր լրագրողը: