Ձեր վստահելի աղբյուրը

«Պարտադիր չի կոչ անեն, որ պաշտոնանկ անեն ոչ միայն տրանսպորտի ոլորտում, այլ բոլոր ոլորտներում: Այն աշխատակիցները, որոնք իրենց աշխատանքը նորմալ չեն կատարի , այդ ժամանակ, բնականաբար, ես կվերանայեմ: Բայց այսօր այդ մարդիկ իրենց աշխատանքը նորմալ կատարում են»,- «Ազատություն» ռադիոկայանի հետ զրույցում ասել է Երևանի քաղաքապետ Տարոն Մարգարյանը` լրագրողին հարցնելով` «եթե երեք-չորս հոգի հավաքվում են, ձեր, մյուսի-մյուսի հրաժարականը պահանջելու, նորմա՞լ եք ընդունում»:

Լրագրողի հակադարձմանը, թե 150 դրամի դեմ բողոքողները ավելի շատ էին, ոչ երեք կամ չորս հոգի, Տ.Մարգարյանն արձագանքել է. «50 դրամի համար որոշումս բոլորս լսեցինք, կասեցվեց, հանձնաժողով կստեղծվի, որ սոցիալական խմբերի խնդիրները ուսումնասիրենք նոր քայլեր կայացնենք: Ինձ թվում է այս հրաժարականներին ու այս պահանջներին ժողովուրդը այդքան էլ կողմնակից չէ»,- նշել է նա` հորդորելով հարցնել ժողովրդին:

Այն հարցին, թե տրանսպորտի 100 դրամի վերանայումը բացառված է, թե ոչ, Երևանի քաղաքապետը նշել է, որ քննարկումները շարունակվում են. «Ես նշել եմ ու նորից նշում եմ, որ եթե ուզում ենք նորմալ տրանսպորտ ունենալ, ապա պետք է քննարկենք այդ հարցը: Եթե չենք ուզում ունենալ նորմալ տրանսպորտ և ընդհանրապես տրանսպորտ, ուրեմն ինչ վիճակ կա, պետք է դա էլ մնա»:

Տ.Մարգարյանը համաձայն չէ, որ խոսքը զուտ գծատերերի շահերի մասին է և հորդորում է ուսումնասիրել մյուս քաղաքների փորձը. «Բոլոր այն քաղաքներում, որտեղ միասնական տոմսեր կան, դա 100 տոկոսանոց պետության սեփականություն չի` մասնավոր-պետություն համագործակցության արդյունք է»,- նշել է նա, իսկ ինչ վերաբերում է հարցին, թե ինչո՞վ էր պայմանավորված իր` 150 դրամը չեղյալ հայտարարելու որոշումը, ակցիաներով թե այլ հանգամանքներով, Երևանի քաղաքապետը արձագանքել է.

«Իմ շփումները թե ուսանողների հետ, թե այն կազմակերպությունների, որոնք իրականում այդ հարցը բարձրացնում էին սոցիալական խնդրի հետ կապված, որ պետք է «լգոտաներ» տալ, ես իմ համաձայնությունը տվեցի, որ, այո, հանձնաժողովը ստեղծվի: Եվ հանձնաժողովում կքննարկենք այն «լգոտաները», որ պետք է տրամադրվի մեր սոցիալական խոցելի խավին»,- նշեց նա ու հավելեց, որ սակագնի վերանայումն էլ կլինի այն ժամանակ, երբ ստեղծվի հանձնաժողովը:

Տեսանյութն`  այստեղ: