Ձեր վստահելի աղբյուրը

Վրաստանի նախագահ Միխեիլ Սաակաշվիլին «ZIK» ուկրաինական հեռուստաընկերությանը տված հարցազրույցում հայտարարել է, որ մտադիր չէ հեռանալ քաղաքականությունից նախագահի պաշտոնի լիազորությունների ավարտից հետո:

«Ես շարունակելու եմ մնալ քաղաքականության մեջ: Զգում եմ, որ ունենք մեծ ներուժ, շատ մեծ ակտիվ համախոհներ: Կարևորն այն է, որ կան խոշոր նախագծեր, որ դեռ չենք ավարտել»,- նշել է Մ. Սաակաշվիլին:

Խոսելով կառավարությունում աշխատելու հնարավորության մասին՝ Վրաստանի նախագահը ասել է, որ կհամաձայնի դրան միայն այն դեպքում, եթե հնարավորություն ունենա իրականացնել «մեծ նախագծեր»: Վրաստանի կառավարման համակարգում ներկա իր դիրքը բնութագրելիս՝ նա փաստել է, որ դա ավելի շատ նման է պատվավոր թոշակառուի կարգավիճակին:

«Ահա նստած եմ գրասենյակում: Առանձնապես բան չկա անելու»,- ասել է Մ. Սաակաշվիլին:

Նշենք, որ Վրաստանում նախագահական ընտրությունները տեղի կունենան հոկտեմբերի 27-ին: Վրաստանի սահմանադրության համաձայն՝ պաշտոնավարման երկրորդ ժամկետից հետո Մ. Սաակաշվիլին չի կարող առաջադրվել:

Նախորդ տարվա հոկտեմբերի 1-ի խորհրդարանական ընտրություններից հետո Մ. Սաակաշվիլիի գլխավորած «Միացյալ ազգային շարժում» կուսակցությունը կորցրեց իշխող դիրքերը և դարձավ ընդդիմություն: Այնուամենայնիվ, Մ. Սաակաշվիլին մնաց նախագահի պաշտոնում՝ չնայած երկրում իր ազդեցությունը էապես նվազեց:

Վրաստանի սահմանադրական փոփոխությունների համաձայն՝ նորընտիր նախագահի երդմնակալությունից հետո իշխանությունը երկրում փաստացի փոխանցվելու է խորհրդարանին և կառավարությանը: 2010-ին ընդունված նոր սահմանադրությունը նախատեսում է նախագահի լիազորությունների կրճատում և բաշխում խորհրդարանի ու կառավարության միջև:

Վրաստանի վարչապետ Բիձինա Իվանիշվիլին ավելի վաղ հայտարարել է, որ մինչև տարվերջ մտադիր է դուրս գալ քաղաքականությունից և գործունեություն ծավալել ոչ կառավարական, հասարակական ոլորտում՝ նշելով, որ հոկտեմբերին կայանալիք նախագահական ընտրություններից հետո երկրում կստեղծվի նոր իրավիճակ, ու այլևս կառավարությունն իր օգնության կարիքը չի ունենա: