Ռուս լրագրողուհուն հայկական ազգանվան պատճառով արգելել են մուտք գործել Բաքու
Ռուս լրագրող Աննա Սահակյանին՝ անձնագրում հայկական ազգանվան պատճառով Բաքվի օդանավակայանում արգելել են մուտք գործել Ադրբեջան: Այս մասին լրագրողուհին գրառում է արել իր ֆեյսբուքյան էջում՝ նշելով, որ ինքն ազգությամբ ռուս է, սակայն ամուսնությունից հետո վերցրել է հայ ամուսնու ազգանունը:
«Գիտե՞ք ինչից եմ ամաչում: Նրանից, որ ես այդ մարդկանց բացատրում էի, որ ծնունդով ռուս եմ։ Ես հպարտ եմ իմ ազգանվամբ, մի ժամանակ ես այն փոխել եմ՝ սիրելով, և եթե ինձ վիճակված է ևս մեկ անգամ փոխել այն, ապա միայն մեծ սիրո դեպքում։
Այո, ես ափսոսում եմ, որ այդ ամենը ասելու և հպարտորեն հեռանալու փոխարեն բռնկվել եմ և լաց եղել: Եթե անկեղծ՝ դա հոգնածությունից էր։ Եվ ես չեմ դառնա ազգայնական ու չեմ ատի Ադրբեջանը, սակայն տղանե՛ր, մի՞ թե հասկանալի չէ, որ մենք բոլորս Աստծո առաջ հավասար ենք, և քանի դեռ չենք ներել միմյանց, երջանիկ չենք լինելու։
Ես արդեն վաղուց ռուս չեմ՝ որդուս հետ, որը կիսով չափ հայ է, տարբեր ազգության ներկայացուցիչ տղամարդկանց հետ սիրավեպերից հետո։ Այո, ես հիմա լավ չեմ։ Սակայն ոչ թե այն պատճառով, որ ստիպված եղա հետ թռչել, պարզապես ամեն ինչ կուտակվել էր։ Շնորհակալ եմ «Աէրոֆլոտի» ուղեկցորդուհիներին, որ նրանք ինձ բիզնես-կլաս նստեցրին և գինի հյուրասիրեցին։
...Սակայն այժմ ես հաստատ գիտեմ, թե ինչ են ապրում մարդիկ, երբ նրանց ազգային պատկանելիության պատճառով ծաղրում են, թեկուզև երկրից արտաքսումը ես շատ «մեղմ» վերապրեցի։ Եվ ես հասկանում են, որ ունեմ ընդամենը հազար ընկեր, ովքեր կարող են տարածել այս գրառումը և ամենակարևոր խոսքերս. Մի՛ դատեք մարդկանց ազգային պատկանելիությունից ելնելով։
Ճիշտ է՝ ես լսել էի, որ նման բան կարող է պատահել, սակայն հավատալ այդ «հիմարությանը» չէի կարողացել։Կարող է՝ իմ համեստ խոսքը հասնել Իլհամ Ալիևի ականջին, ում պատկերը կախված էր իր իսկ անունը կրող օդանավակայանի սահմանապահ ծառայության ղեկավարի գլխավերևում, ով ինձ թեյ առաջարկեց, սակայն այդպես էլ թույլ չտվեց հատել սահմանը և առաջարկեց փոխել ազգանունս և թռչել նորից։
Ոմանք կարծում են, որ այս ողջ աղմուկը Պուտինի այցի պատճառով է։ Սակայն պարո՛ն Ալիև, վերջապես տղամա՛րդ եղեք և հեղաշրջո՛ւմ արեք հայ ժողովրդի հետ հարաբերություններում։ Եվ գիտե՞ք՝ ինչն է ամենածիծաղելին։ Ես իրոք շատ էի ցանկանում տեսնել Բաքուն և զբոսնել հին քաղաքի փողոցներում, սակայն տեսա միայն ծովի մի կտոր՝ ինքնաթիռից։ Եվ եթե իմ ընկերների թվում կան ադրբեջանցիներ, ես հույս ունեմ, որ ձեզ համար նույնպես ամոթալի է»,- գրել է Աննա Սահակյանը:
Լրահոս
Տեսանյութեր
Եթե Ադրբեջանը վստահ է, ինչո՞ւ է դատական գործընթացները դադարեցնելու մասին գաղափար առաջ քաշում
