Ձեր վստահելի աղբյուրը

Ադրբեջան կատարած այցի ընթացքում Ռուսաստանի նախագահ Վլադիմիր Պուտինին չի հաջողվել էներգետիկայի ոլորտում կնքել կոնկրետ համաձայնագիր, որը մարտահրավեր կնետեր նախկին խորհրդային հանրապետությունում գերիշխող դիրք ունեցող արևմտյան էներգետիկ ընկերություններին: Այս մասին գրում է «Ռոյթերս» լրատվական գործակալությունը:

«Ռուսաստանը վաղուց ձգտում է մեծացնել իր ներկայությունը Ադրբեջանում, որը, ինչպես ակնկալում է Եվրոպան, պետք է օգնի վերջինիս ազատվել ռուսական գազից ունեցած կախվածությունից»,- նշել է լրատվական գործակալությունը:

«Ռոյթերսը», հղում անելով իր աղբյուրներին, գրել է, որ «Роснефть»-ի տնօերն Իգոր Սեչինը ստորագրել է միայն մեկ «լղոզված» համաձայնագիր Ադրբեջանի պետական նավթային ընկերության հետ: Անանուն աղբյուրը հայտնել է, թե Ադրբեջանը այնքան բարձր գին է պահանջել իր ակտիվների համար, որ «Роснефть»-ը մտադիր չէ վճարել, և մեծ աշխատանք կպահանջվի տարաձայնությունները հաղթահարելու համար:

«Արևմտյան էներգետիկ ընկերությունները, ինչպիսիք են BP-ը, «Statoil»-ը և «Exxon Mobil»-ը, գերիշխող դիրք են գրավել Ադրբեջանի էներգետիկ ոլորտում Խորհրդային Միության փլուզման օրվանից, երբ Մոսկվայի և Բաքվի հարաբերությունները բավական սառն էին»,- գրում է «Ռոյթերսը»:

«Bloomberg» լրատվական գործակալությունը իր հերթին անդրադարձել է Ռուսաստանի և Ադրբեջանի միջև ռազմական համագործակցությանը: Ըստ լրատվականի՝ Ադրբեջանը, որը հակամարտության մեջ է հարևան Հայաստանի հետ, Ռուսաստանի ռազմական համագործակցությունը գնահատում է $4 մլրդ:

«Առաջին անգամն է, որ Ադրբեջանը հայտարարում է գնված սպառազինությունների արժեքի մասին: Վերջին տասնամյակում Ադրբեջանը 30 անգամ ավելացրել է պաշտպանության ոլորտում ռազմական ծախսերը՝ հասցնելով $3,7 մլրդ-ի, և շարունակում է սպառնալ ուժի կիրառմամբ Լեռնային Ղարաբաղի նկատմամբ վերահսկողությունը վերականգնելու համար, եթե տապալվեն խաղաղ բանակցությունները, ինչը սպառնում է տարածաշրջանում պատերազմի վերսկսմամբ, որտեղ սկսած 1994 թ.-ից «BP»-ն և նրա գործընկերները ներդրել են ավելի քան $35 մլրդ»,- նշում է գործակալությունը:

Բաքու կատարած իր այցի ընթացքում Վլադիմիր Պուտինը կոչ է արել գտնել Ղարաբաղյան հակամարտության քաղաքական լուծում: Գրում է «Europe Online» պարբերականը:

«ԵԱՀԿ-ի միջնորդությամբ ավելի քան 20 տարի շարունակվող բանակցությունները արդյունք չեն տվել: Մոսկվան ավանդաբար աջակցել է Հայաստանին, որը չունի այնպիսի ռեսուրսներ, ինչպիսին Ադրբեջանը, և հանդիսանում է Իրանի մերձավոր գործընկերը: Սակայն այս ամառ Ռուսաստանը սկսել է միլիարդավոր դոլարների զենքերի առաքում Ադրբեջան, այդ թվում՝ տանկեր և հրթիռային համալիրներ»,- գրում է պարբերականը:

«Europe Online»-ը շարունակում է, որ ըստ ռուս փորձագետների, Կրեմլը ցանկանում է պահպանել ուժերի հավասարակշռությունը ռազմավարական նշանակություն ունեցող տարածաշրջանում:

«Ալիևը, ով իշխանության է եկել իր հոր՝ Հեյդար Ալիևի մահից հետո, 2003թ.-ին, քննադատության է ենթարկվում Արևմուտքի կողմից իր ավտորիտար կառավարման համար»,- ընդգծել է պարբերականը: