Ձեր վստահելի աղբյուրը

Ոստիկանության Մաշտոցի բաժանմունքում 2011 թվականին խոշտանգումների ենթարկված 34-ամյա Ֆելիքս Գևորգյանը արդեն երկու տարի է՝ ապրում է անորոշ վիճակում, չի կարողանում աշխատանքի անցնել, իսկ խափանման միջոցի առկայությունը հնարավորություն չի տալիս երկրից դուրս աշխատանք գտնել:

2011-ին Ֆելիքս Գևորգյանը մեղադրվել էր գողության համար, կալանավորվել, իսկ ոստիկանության Մաշտոցի բաժանմունքում խոշտանգումների ենթարկվել:

Դեռ 2011-ին Գևորգյանի փաստաբան Ստեփան Ոսկանյանը հայտարարել էր, որ հենց ոստիկանության Մաշտոցի բաժնի քրեական հետախուզության նախկին պետ Արթուր Գևորգյանի աշխատասենյակում Ֆելիքսը բռնության ու խոշտանգումների է ենթարկվել, մասնավորապես, երկաթյա շիկացած ձողով ոտքն են այրել, սակայն նույն բաժնում այդ հայտարարության կապակցությամբ քննությունն արդյունք չէր տվել. բացի պաշտոնանկությունից, ոստիկանության պաշտոնյաները պատասխանատվության չէին ենթարկվել:

«Քրեական հետախուզության պետի աշխատասենյակում, հարցաքննության ժամանակ, Ֆելիքսի նկատմամբ բռնություն են կիրառել ու հենց այդ ժամանակ շիկացած երկաթով ոտքն են այրել, ոտքի վրա այդ վնասվածքը հիմա էլ կա, որն հաստատված է նաև դատաբժշկական փորձաքննությամբ», -Panorama.am-ի թղթակցի հետ զրույցում ասաց Գևորգյանի փաստաբան Ստեփան Ոսկանյանը: Նշենք, որ գողության գործով Աջափնյակ և Դավթաշեն վարչական շրջանների ընդհանուր իրավասության դատարանը արդարացրել էր Ֆելիքս Գևորգյանին: Սակայն Վերաքննիչ դատարանը 2012-ի հուլիսի 9-ին բեկանել էր առաջին ատյանի դատարանի վճիռը և ուղարկել նոր ծավալով քննության:

Քրեական գործն արդեն վերադարձվել է Աջափնյակ և Դավիթաշեն վարչական շրջանների ընդհանուր իրավասության դատարան, որտեղից Հատուկ քննչական ծառայությանն ուղարկվել է իրեն խոշտանգումների ենթարկելու վերաբերյալ Ֆելիքս Գևորգյանի 2011թ. հոկտեմբերի 17-ի դիմում-բողոքը։ 

Այժմ արդեն հնարավոր է, որ Գևորգյանին խոշտանգած ոստիկանության նախկին պաշտոնյաները պատասխանատվության ենթարկվեն. Գլխավոր դատախազությունը երկու օր առաջ հայտարարեց, որ Գևորգյանի նկատմամբ բռնություն գործադրելու, վերջինիս իրավունքներին ու օրինական շահերին էական վնաս պատճառելու փաստի առթիվ հարուցել է քրեական գործ՝ ՀՀ քրեական օրենսգրքի 309-րդ հոդվածի 2-րդ մասով:

Քրեական գործն ուղարկվել է ՀՀ հատուկ քննչական ծառայություն՝ նախաքննություն կատարելու համար:
Փաստաբան Ստեփան Ոսկանյանը մեծ ակնկալիքներ ունի ՀՔԾ-ում խոշտանգումների մասով նոր քննությունից: «Կարծում եմ, որ եթե ՀՔԾ-ում օբյեկտիվ քննություն կատարվի, ապա ոստիկանության համապատասխան աշխատակիցները պատասխանատվության կենթարկվեն», նկատեց Ստեփան Ոսկանյանը:

Նշենք, որ ՀՀ Քրեական օրենսգրքի 309 հոդվածի 2-րդ մասը վերաբերում է պաշտոնեական լիազորություններն անցնելուն, որը զուգորդվել է բռնություն, զենք կամ հատուկ միջոցներ գործադրելով: Այս հանցանքի համար նախատեսվում է ազատազրկում` երկուսից վեց տարի ժամկետով:

Այս գործով պատասխանատվության կարող են ենթարկվել ոստիկանության Մաշտոցի բաժնի քրեական հետախուզության նախկին պետ Արթուր Գևորգյանը, նրա տեղակալը և Մաշտոցի բաժնի մի քանի այլ աշխատակիցներ, որոնք էլ խոշտանգել են Ֆելիքս Գևորգյանին:

Փաստաբանն հիշում է, որ խոշտանգումների մասին դեռ գողության գործով դատաքննության ժամանակ են իրենք հայտարարել, սակայն այն ժամանակ ոչ մի արդյունք և որևէ ընթացք չունեցավ գործը: «ՀՔԾ-ն այն ժամանակ քննություն չկատարեց թեպետ կարող էր ընդունել վարույթ: Ու քանի որ ՀՔԾ-ում քննություն չկատարվեց, Վերաքննիչ դատարանը նաև էս հիմքով գործն ուղարկեց նոր քննության և պահանջեց, որ բռնությունների մասով կոնկրետ քննի այն մարմինը, որը պարտավոր է քննել, ոչ թե ոստիկանությունը», -ներկայացրեց Ոսկանյանը:

Ֆելիքս Գևորգյանը նաև հայտնի է 2008-ի մարտիմեկյան իրադարձություններից. նա մարտի 1-ի դեպքերին մասնակցելու համար դատապարտվել էր 7 տարվա ազատազրկման` 235 հոդվածի 2-րդ մասով` (ապօրինի զենք ու զինամթերք ձեռք բերելն ու պահելը) և 238 հոդվածի հատկանիշներով (զենք զինամթերք, պայթուցիկ սարքեր հափշտակելը): Սակայն 2010-ին պատիժը կրելուց պայմանական վաղաժամկետ ազատ էր արձակվել: Իսկ ահա 2011-ի գողության դեպքը փաստաբանը կապում էր Գևորգյանների քաղաքական հայացքների հետ. Ֆելիքս Գևորգյանի հայրը ՀԱԿ Աջափնյակի տարածքային կառույցի համակարգողն է:

Կարդացեք նաև՝

ՀԱԿ ակտիվիստի ոտքերը երկաթյա շիկացած ձողով այրել են, ծեծել են ու խոշտանգել. Փաստաբան

Ոստիկանությունում բռնություն են գործադրել քաղաքացու նկատմամբ. Գործը կքննի ՀՔԾ-ն