Ձեր վստահելի աղբյուրը

«Այնպիսի տպավորություն է ստեղծվում, կարծես պատիժն Ադրբեջանում ավելի շուտ է կիրառվում քան օրենքը», - խմբագիր Մարգարիտա Ախվլեդիանին կասկածի տակ է դնում Ադրբեջանի սև ցուցակի օրինականությունը, հայտնում է Պատերազմի և Խաղաղության Լուսաբանման Ինստիտուտը:

Ախվլեդիանին, ով ապշել է՝ իր անունն այդ ցուցակում տեսնելով, նշում է. «Ավելի քան 20 տարի է ինչ ես՝ որպես լրագրող և խմբագիր, աշխատում եմ ամբողջ Կովկասով մեկ: Ես կանոնավոր կերպով տարբեր շրջաններ եմ այցելում, քանի որ լրագրողական աշխատանքը ֆիզիկական ներկայություն է պահանջում, հակառակ դեպքում կարող ես ինչ-որ տենդենցներ և տեսակետներ բաց թողնել, հատկապես երբ խոսքը հեռավոր շրջանների մասին է: Ադրբեջանը դեռ մի օրենք ունի ՝ ըստ որի անձը պետք է Լեռնային Ղարաբաղ այցելելու թույլտվություն ստանա միայն այն դեպքում, եթե նրան Ադրբեջան մուտք գործելու համար վիզա է անհրաժեշտ, սակայն Վրաստանի քաղաքացիներին վիզա հարկավոր չէ: Ադրբեջանն այժմ պլանավորում է փոփոխել օրենքը, և հնարավոր է, որ նոր օրենքի պահանջները կարգավորեն իրավիճակը»: Ախվլեդիանին Լեռնային Ղարաբաղ է այցելել 2011թ:

Մեկ այլ լրագրող՝ Զարինա Սանակոևան վստահեցնում է. «Այդ քայլը շատ վատ էր կազմակերպված և մարդկային տեսանկյունից անարդար էր և ցուցակից հնարավոր չի լինի որևէ քաղաքական օգուտ քաղել»: Ինչպես գրում է Պատերազմի և Խաղաղության Լուսաբանման Ինստիտուտը՝ Սանակոևան Հարավային Օսեթիայից է, որը վրացական վերահսկողությունից դուրս է եկել հենց այն ժամանակ, երբ Լեռնային Ղարաբաղն անկախ հռչակվեց: Նրա համար նույնպես մուտքն Ադրբեջան արգելված է Լեռնային Ղարաբաղ այցելելու համար:

Ադրբեջանում Մարդու Իրավունքների Կենտրոնի նախագահ Էլդար Զեյնալովը համոզված է, որ կառավարությունն իրավասու է արգելել որոշ մարդկանց մուտքը երկիր, սակայն ի՞նչ կստանա Ադրբեջանն այդ ցուցակի մեջ ընդգրկելով լրագրողների, բարեգործների և արվեստագետների: Ըստ Զեյնալովի՝ ցուցակը բավականին «անավարտ» տեսք ունի: Որոշ անունների կողքին կան լուսանկարներ, իսկ որոշների կողքին` ոչ, արգելքի կոնկրետ պատճառները մի տեղ կան, իսկ այլ տեղերում այդ վանդակը դատարկ է: «Սա վկայում է այն մասին, որ փաստաթուղթը հապճեպորեն է պատրաստվել, ավելին, այն միտված է եղել ներքին օգտագործման համար», - ասել է Զեյնալովը՝ նշելով, որ որոշ անուններ գրված են ադրբեջանական արտասանությամբ, բայց լատիներեն տառերով: Այսինքն՝ մարդիկ, որոնողական համակարգերում իրենց անունները փնտրելիս, չեն տեսնի, որ իրենք Ադրբեջանում անցանկալի անձ են համարվում:

Հիշեցնենք, որ Ադրբեջանն անցանկալի անձանց համար նախատեսված իր սև ցուցակի մեջ է ընդգրկել 335 անձ՝ քաղաքական գործիչներ, լրագրողներ, արվեստագետներ, լուսանկարիչներ և այլք: Պատճառն այն է, որ այդ մարդիկ առանց Ադրբեջանի թույլտվության այցելել են Լեռնային Ղարաբաղի Հանրապետություն: Իսկ իսպանացի օպերային երգչուհի Մոնսերատ Կաբալյեի՝ ԼՂՀ այցելելու փաստը Բաքվի և Մադրիդի միջև փոքրիկ դիվանագիտական վիճաբանության պատճառ էր դարձել:
Սև ցուցակն ընդգրկում է Բրիտանայի, Կանադայի, Ֆրանսիայի, Ռուսաստանի, Արգենտինայի և Ուրուգվայի խորհրդականների, Եվրախորհրդարանի ութ անդամների, ինչպես նաև լրագրողների և այլն: