Ձեր վստահելի աղբյուրը

Փաստաբանների պալատի նախագահ Ռուբեն Սահակյանի լիազորությունները պալատի նախագահի պաշտոնում հոկտեմբերի 3-ին կդադարեցվեն, սակայն մինչ այդ սեպտեմբերի 14-ին պալատում նախագահ են ընտրելու: Այս պահի դրությամբ Պալատի նախագահի պաշտոնում առաջադրվել են 4 թեկնածուներ` Արա Զոհրաբյանը, Կրոմվել Գրիգորյանը, Աշոտ Թադևոսյանը և Տիգրան Աթանեսյանը:

Ներկայացնում ենք Պալատի ձեռքբերումների, Պալատի նախագահի ընտրությունների ու իր հետագա գործունեության մասին Ռուբեն Սահակյանի հետ Panorama.am-ի հարցազրույցը.

- Սեպտեմբերի 14-ին կայալանիք ընտրությունները, ըստ որոշ շրջանակների, խոստանում են աղմկոտ լինել: Դուք, պարոն Սահակյան, աղմկոտ ընտրություններ սպասո՞ւմ եք:

- Որևէ նախադրյալ չեմ տեսնում աղմուկ հանելու համար: Իսկ եթե որևէ մեկը աղմուկ հանի, ինձ թվում է, դա կլինի ընդամենը պոպուլիստական քայլ, որպեսզի ձայներ հավաքի:

- Ի՞նչն է Ձեզ հիմք տալիս պնդելու, որ նախադրյալներ չկան աղմուկի համար, պարոն Սահակյան: Ամեն ինչ հանգի՞ստ է պալատի ներսում:

- Այո, եթե մինչև օրս եղել է հանգիստ, ապա եթե վաղը լինի անհանգիստ, ես կգնահատեմ որպես ընտրությունների հետ կապված ընտրական տեխնոլոգիա:

- Ըստ որոշ տեղեկությունների, Փաստաբանների պալատի ներսում տարաձայնություններ կան: Դուք դա էլ չե՞ք տեսնում:

- Ես շատ բան եմ տեսնում, բայց չեմ ցանկանում արտահայտվել:

- Այսինքն, այնուամենայնիվ, խնդիրներ կան:

- Ինչի՞ վերաբերյալ, դուք չասացիք:

- Ներքին տարաձայնություններ, ինչ-որ հարցերի շուրջ անհամաձայնություններ, ինչի վկայությունն էր մի քանի ամիս առաջ փաստաբանների մի խմբի գործադուլի ակցիան, որին չմասնակցեցին փաստաբանների մեծ մասը:

- Բոլոր կազմակերպություններում, ինչպես նաև կոնկրետ երկու հոգու միջև կարող են լինել տարբեր կարծիքներ, տարբեր մոտեցումներ կոնկրետ հարցի լուծման հարցում: Դա այնպիսի արտառոց բան չէ, որ ասեմ՝ նման երևույթներ կան: Տարաձայնություններն այլ խնդիրների մասին են, որոնց մասին ինքս չեմ ուզում խոսել:

- Շատերի համար զարմանալի էր, որ Դուք ՓՊ նախագահի պաշտոնում առաջադրվելու ցանկություն չունեք: Ինչո՞ւ այդպես որոշեցիք:

- Փաստաբանության մասին օրենքի համաձայն՝  Պալատի նախագահի պաշտոնում փաստաբանը կարող է ընտրվել երկու անգամ և ոչ ավելի: Ես արդեն երկու անգամ ընտրվել եմ որպես Պալատի նախագահ, իմ պաշտոնավարման ժամկետը լրանում է հոկտեմբերի 3-ին: Նորից իմ թեկնածությունը դնելու և մասնակցելու ընտրական գործընթացին ես իրավունք չունեմ: Շատ պարզ բացատրություն է:

- Պարոն Սահակյան, ի՞նչ խղճով եք հեռանում, ի՞նչ ժառանգություն եք թողնում:

- Ես չեմ հեռանում:

- Պալատի նախագահի պաշտոնից նկատի ունեմ:

- Պաշտոնից հեռանալով՝ ես գտնում եմ, որ թողել եմ բավականին լավ ժառանգություն, մեծ փոփոխություններ են կատարվել Պալատում: Օրինակ, Փաստաբանների մասին օրենքի փոփոխություն տեղի ունեցավ, Հանրային պաշտպանի գրասենյակ ձևավորեցինք, որը տարիների ընթացքում թափ առավ, կայացավ, և ես գտնում եմ, որ լավ ապագա ունի` իր բոլոր թերություններով հանդերձ: Փաստաբանական դպրոց ունենք, արդեն երկրորդ տարին է` գործում է: Մինչև տարեվերջ կունենանք Փաստաբանների պալատի նոր շենք, քաղաքի կենտրոնում, քաղաքի սրտում: Այդ շենքում կգործեն Փաստաբանների պալատը, փաստաբանական դպրոցը և Հանրային պաշտպանի գրասենյակը, ինչը ավելի կդյուրացնի Պալատի նախագահի, Պալատի խորհրդի գործունեությունը: Փաստաբանների պալատը նաև օրենքի ուժով նոր փոփոխություն է արել, որի համաձայն, փաստաբանները ամեն տարի պարտադիր պետք է վերապատրաստվեն, անցնեն շարունակական ուսուցում 24 ժամվա չափով: Սա նույնպես դրական գործընթաց է: Բավականին որակյալ փաստաբաններ են ընդունվել այս տարիների ընթացքում: Դպրոցը նույնպես խթան կհանդիսանա, որպեսզի բարձրանա փաստաբանների որակը:

- Այսինքն` Ձեր խիղճը հանգիստ եք հեռանում:

- Ինքս շատ-շատ հանգիստ եմ ո՛չ հեռանում (ժպտում է-հեղ.): Ես մնալու եմ, ես չեմ կարող չօգնել, որովհետև այդ ժառանգությունը, ես պետք է աշխատեմ, որ չփոշիացվի: Համոզված եմ, որ ով էլ գա, չի փոշիացնի: Իսկ եթե որևէ մեկը փորձի ոտնձգություն իրականացնել, ապա ես նույնպես ոտնձգություն կիրականացնեմ իր նկատմամբ:

- Պարոն Սահակյան, արդեն 4 թեկնածու է առաջադրվել Պալատի նախագահի պաշտոնում և արդեն ուրվագծվում է` ում միջև է ընթանալու պայքարը…

- Սպասենք, դեռ օր ու կես կա, վաղն ավարտվելու է առաջադրումների ժամկետը:

- Լավ, այս պահի դրությամբ առաջադրվածների թվում որևէ նախընտրելի թեկնածու ունե՞ք, որ կուզենայիք Ձեր ժառանգորդը լիներ:

- Ես այդ առումով ոչինչ չեմ ասի, որովհետև թեկնածուների քարոզչությունն սկսվելու է օգոստոսի 23-ից, որպեսզի չդիտվի որպես քարոզչություն: Ուղղակի ասեմ, որ ես, որպես Պալատի նախագահի թեկնածու, առաջադրել եմ իմ նախկին տեղակալ, Պալատի խորհրդի նախկին անդամ, որովհետև առաջադրվելուց հետո նա հրաժարվեց այդ պաշտոններից, Արա Զոհրաբյանի թեկնածությունը: Դա փաստ է, ոչ թե քարոզ:

- Այդպիսով, փաստորեն ուրվագծվում է նաև Ձեր համակրանքը թեկնածուի նկատմամբ:

- Դա դուք ասացիք:

- Լավ, դուք պատրաստվում եք ակտիվ փաստաբանական գործունեությա՞մբ զբաղվել:

Ա- յո, պատրաստվում եմ, վաղուց եմ սկսել պատրաստվել: