Ձեր վստահելի աղբյուրը

Ադրբեջանական զանգվածային և էլեկտրոնային լրատվական միջոցների քաղաքական բաժանումը պաշտոնականի, ոչ պաշտոնականի, իշխանականի և ընդդիմադիրի բավականին պայմանական բնույթ է կրում: Այդ մասին գրում է REX լրատվական գործակալությունը: Հոդվածում նշվում է, որ այդ ԶԼՄ-ների նյութերին կանոնավոր ծանոթանալիս տպավորություն է ստեղծվում, թե նրանք բոլորը կառավարվում են մեկ միասնական կենտրոնից, որը կոչվում է Ադրբեջանի նախագահի աշխատակազմ (իսկ ոմանք էլ՝ անմիջականորեն Ադրբեջանի ազգային անվտանգության նախարարությունից):

«Եվս մեկ ապացույց այդ կապակցությամբ. օգօոստոսի 13-ին Պուտինի Բաքու կատարած այցից անմիջապես հետո ադրբեջանական ԶԼՄ-ներում հակառուսական նյութերի քանակը կտրուկ ընկավ, և դրանք օրեցօր ավելի ու ավելի են քչանում: Չի բացառվում այն, որ այդտեղ իր դերն է խաղացել ադրբեջանական ԶԼՄ-ներում հակապուտինական և հակառուսական արտահայտիչ հրապարակումների մասին ռուս նախագահի տեղեկացվածության ցուցադրումը Ալիևի հետ առանձնազրույցի ընթացքում», - գրում է գործակալությունը:

Նաև նշվում է, որ տվյալ այցի և ընդհանրապես ռուս-ադրբեջանական հարաբերություններին նվիրված ադրբեջանական ԶԼՄ-ների նյութերում ակնհայտորեն զգացվում է դրանց հեղինակների ցանկությունը յուրաքանչյուր գնով թաքցնել երկու նախագահների հանդիպման ընթացքում տեղի ունեցածի բնույթը, որպեսզի հասարակության մոտ չստեղծվի այնպիսի կարծիք, թե Իլհամ Ալիևը կախված է իր ռուս կոլեգայից:

Newtimes.az ադրբեջանական վերլուծական կայքը Պուտինի «Կասպյան հյուրախաղերը» գնահատում ՝ որպես «Ադրբեջանի հետ նոր մակարդակում պրագմատիկ համագործակցություն», որն իբրև թե վկայում է «Ադրբեջանի տարածաշրջանային ազդեցության աճի մասին», և որը թույլ է տալիս նյութի հեղինակներին բացարձակապես լրջորեն հայտարարել, որ «այցի իրական նշանակությունը գնահատականի է արժանի տարածաշրջանային և համաշխարհային (!) մասշտաբով»:

«Իհարկե, դա սովորական հասկացությունների փոխարինում է, որի նպատակն ընթերցողի աչքում Ադրբեջանի դերի արհեստական աճն է ոչ միայն տարածաշրջանում, այլ նաև «համաշխարհային մասշտաբով»: Հետևաբար, ավելի ճիշտ կլիներ գրել «Ադրբեջանի աշխարհաքաղաքական նշանակության» մեծացման մասին, այլ ոչ թե նրա «աշխարհաքաղաքական ազդեցության» մասին, քանի որ «ազդեցություն» որպես այդպիսին գոյություն չունի, գրված է նյութում:

Հեղինակն ընդգծում է, որ «Ադրբեջանի ազդեցության համաշխարհային աճի» մասին խոսքերը ոչ մի արդյունք չի տալիս, բացի Ադրբեջանում իշխող ռեժիմի, և ոչ միայն, շահերին ծառայող վերլուծական մտքի ընդհանուր մակարդակի հանդեպ ցավակցող ժպիտից: Ինչպես հայտնի է, այդ նպատակով առավել հնազանդ վերլուծաբաններին Ադրբեջանի իշխանությունը անվճար բնակարաններ է բաժանում, որի համար նորմալ աշխատանքային պայմաններում նրանք կարող են վճարել միայն սեփական կամ մեկ ուրիշի արյունով:

Սալեխ Ուստաջլին ադրբեջանական Minval.az պորտալում գրում է իր հայրենակիցների «ազգային թերարժեքության կոմպլեքսի» մասին: «Հեղինակի կարծիքով, թերարժեքության կոմպլեքսը հենց այնպես չի առաջանում, դա պատերազմներում կրած պարտությունների կամ օկուպանտների կողմից հողերի գրավման, խտրականության և այլ գործոնների արդյունք է: Ազգային թերարժեքության կոպլեքսի առաջացման համար Ադրբեջանում համապատասխան նախապայմաններ են եղել», - նշում է նյութի հեղինակը:

Սալեխ Ուստաջլին վստահ է, որ իր հայրենակիցների բոլոր դժբախտությունների պատճառները թաքնված են բոլշևիկների կողմից կազմակերպված էթնոցիդի և ճնշման քաղաքականության մեջ: Իր կարծիքով՝ հասարակության առողջացման հաջորդ քայլը պետք է լինի Ադրբեջանի պատմական գիտության վերանայումը: