«Բուդաղյանը սպառնացել է վերացնել Խաչատրյանների ցեղը». Փաստաբանների բացահայտումը (Տեսանյութ)
«Ոչ թե զինվորական դատախազությունն է գլխիվայր շուռ տալիս եղած փաստերը, այլ դա փորձում է անել Բուդաղյանների ներկայացուցիչ Հայկ Ալումյանը, իմ հարգարժան կոլեգան», -այսօր լրագրողների հետ հանդիպման ժամանակ հայտարարեց հունիսի 1-ին Գորիսում տեղի ունեցած միջադեպի գործով Սյունիքի նախկին մարզպետ Սուրիկ Խաչատրյանի Խաչատրյանի որդու` Տիգրան Խաչատրյանի փաստաբան Ռուբեն Սահակյանը:
Վերջինի հետ ասուլիսին էր ներկայացել նաև Խաչատրյանի հետ կալանքի տակ գտնվող նախկին մարզպետի թիկնապահ Զարզանդ Խաչատրյանի փաստաբան Մարտին Զիլփուղարյանը:
Հիշեցնենք, որ Գորիսում հունիսի 1-ին Սյունիքի նախկին մարզպետ Սուրիկ Խաչատրյանի տան մոտ տեղի ունեցած միջադեպի կապակցությամբ նախկին մարզպետի որդին` Տիգրան Խաչատրյանը ու թիկնապահը` Զարզանդ Նիկողոսյանը մեղադրվում են շատերի կյանքի համար վտանգավոր եղանակով սպանության, դիտավորությամբ մեկ ուրիշի առողջությանը ծանր մարմնական վնասվածք պատճառելու և ապօրինի զենք-ռազմամթերք ձեռք բերելու և պահելու համար: Նրանք կալանավորվել էին դեպքից հետո և մինչ այժմ գտնվում են «Նուբարաշեն» քրեակատարողական հիմնարկում: Այս գործի շրջանակներում մեղադրանք էր առաջադրվել նաև այդ օրը մահացած Ավետիք Բուդաղյանի եղբայր, ԼՂՀ ՊԲ Ասկերանի զորամասի հրամանատար Արտակ Բուդաղյանի նկատմամբ այն բանի համար, որ սպանության սպառնալիքներ է արել Սուրիկ Խաչատրյանի ու նրա հարազատների հասցեին:
Սահակյանը կասկածի տակ չի դնում իր գործընկերոջ` Հայկ Ալումյանի «մասնագիտական «բարձր կարողությունները», բայց գիտե` «այս գործում նրա մոտ ինչ-որ բան այն չէ»:
Այնուհետև, Ռուբեն Սահակյանը վայրկյան առ վայրկյան ներկայացրեց, թե ինչ է եղել Խաչատրյանի տան դիմաց գիշերը ժամը 22-ից սկսած: Փաստաբանի ներկայացմամբ, հունիսի 1-ին ժամը 22:19-ի սահմաններում Ավետիք Բուդաղյանը իր մեքենայով եկել է, հասել Խաչատրյանների տան դռան մուտքի մոտ, եղել է գինովցած և, ըստ փորձագետի եզրակացության, այն եղել է նորմայից 25 անգամ շատ` 6,2 պրոմիլե:
«Այդտեղ տեղի է ունեցել փոքրիկ լեզվաբանավեճ. Բուդաղյան Ավետիքը պահանջել է, որպեսզի հրավիրեն Սուրիկ Խաչատրյանին, բայց նրան ասել են, որ գնա, առավոտյան կգաս, մի քիչ բանավիճել են, և Ավետիք Բուդաղյանը հեռացել է», -ներկայացրեց փաստաբանը ու նշեց, որ հեռանալուց կես ժամ անց Ավետիք Բուդաղյանը դարձյալ հետ է եկել, ճանապարհը փակել ու կանգնել:
Այդ ժամանակ նրան են մոտեցել Խաչատրյանների երկու զավակները` Տրդատն ու Տիգրանը, վարորդ Արագած Ղևոնդյանը և Սուրիկ Խաչատրյանի զարմիկը` Նիկոլայ Աբրահամյանը ու հորդորել Բուդաղյանին վերադառնալ և առավոտյան գալ: Սակայն, ըստ փաստաբանի ներկայացման, Բուդաղյանը պահանջել է արթնացնել Սուրիկ Խաչատրյանին ու չի համաձայնել հեռանալ տարածքից:
«Ասել է` չէ արթնացրեք Սուրիկին, թող գա, տեսնենք ինչու այդպես եղավ: Չի ասում,թ ե ինչի մասին է խոսքը: Դատելով գործի նյութերից, խոսքը վերաբերում է նույն օրը Սըդըխի գյոլ տարածքից երբ վերադարձել են, ըստ Զարզանդ Նիկողոսյանի ցուցմունքի, տեղի է ունեցել վիճաբանություն Ավետիքի և Զարզանդի միջև, և Զարզանդը ձեռքով հարվածել է նրան: Ըստ մեր նյութերի, Ավետիք Բուդաղյանը վրդովված է եղել, որ Սուրիկ Խաչատրյանը չի սաստել Նիկողոսյանին», -ներկայացրեց Սահակյանը:
Բուն իրադարձությունները ծավալվում են գիշերը, ժամը 23:00-ից հետո, երբ, ըստ փաստաբանի, «դեպքի վայր» է ժամանում Ավետիք Բուդաղյանի եղբայրը` Արտակ Բուդաղյանը, դուրս է գալիս «Ժիգուլի» մենքենայից` որսորդական հրացանը ձեռքին: Այնուհետև նրան մոտենում են Տիգրան և Տրդատ Խաչատրյանները, հեռվում կանգնած է վարորդը և տեղում է գտնվում նաև զարմիկը` Նիկոլայ Աբրահամյանը:
«Մի քանի վայրկյան հետո տեղից անմիջապես պոկվում ու հետ է փախչում վարորդ Արագած Ղևոնդյանը: Ինչու, չգիտեմ, բայց ցուցմունքներից դատելով` Արտակ Բուդաղյանը սպանության սպառնալիքներ է տվել: Երբ Արտակ Բուդաղյանը իջնում է մեքենայից, միաժամանակ իջնում մեքենայից նաև Ավետիք Բուդաղյանը` այս անգամ ձեռքին ունենալով Արմսքոր տեսակի հրազեն` 9 մմ տրամաչափի, որը 16 փամփուշտ է ունեցել տվյալ պահին իր մեջ: Նա մոտեցել է եղբորը, պահել է զանքը բոլորի վրա և ասել` չմոտենաք: Նույն պահին Տիգրան Խաչատրյանը հետ է վազել իրենց տուն, հետո կպարզվի, որ գնաց, զենքը բերեց:
Նույն պահին երևում է, որ Զարզանդ Նիկողոսյանը մոտենում է Լեքսուս ավտոմեքենային, դուրս եկավ կադրից էլ չի երևում, հետո ուղիղ 9 վայրկյան հետո դուրս եկավ մեքենայից, եկավ մի քանի մետր առաջ, և մենք նրա ձեռքին տեսնում ենք ատրճանակի փող: Արդեն զինվեց: Այսինքն Բուդաղյանի գալուց` ժամը 23:00-ից մինչև վեց րոպե նրանց մոտ որևէ զենք չի եղել: Բայց դուք հիշում եք, որ Ալումյանը ասում էր, որ Բուդաղյանի դիմաց կանգնած անձանցից ոմանց մոտ զենք է եղել»,- համարելով գործի նյութերը և դրանք համեմատելով Բուդաղյանների պաշտպան Հայկ Ալումյանի հայտարարությունենրի հետ ներկայացրեց Սահակյանը:
Նա պնդեց, որ փաստաբանը պետք է ճշմարիտ տեղեկություն փոխանցի հասարակությանը և առաջարկեց խարազանել իրեն, եթե ինքը գործի վերաբերյալ սխալ հայտարարություններ կանի:
Շարունակելով նկարագրել նախաքննական մարմնի մոտ եղած տեսանյութի բովանդակությունը, Սահակյանը փոխանցեց, որ մինչև Տիգրան Խաչատրյանի վերադառնալը Արտակ Բուդաղյանին են մոտենում Խաչատրյանի կինը` Լորետա Բարսեղյանը, նրանց տան աշխատակցուհի Կարինե Հարությունյանը և մյուս որդին` 15-ամյա Տրդատ Խաչատրյանը: Մոտենում է նաև Ավետիք Բուդաղյանը:
«Նրանք 4-ով փորձում են խլել Արտակ Բուդաղյանի ձեռքի զենքը կամ փողը վեր բարձրացնել: Այդ ընթացքում Արտակ Բուդաղյանը գտնվելով մեզ` տեսանյութը դիտողներիս մեջքով, աջ արմունկով հարվածում է Տրդատին ու մեկուկես մետր այն կողմ շպրտում:
Մնացին երեք հոգի` Ավետիք Բուդաղյանը, Կարինեն և Լորետան այդ տեղից մոտավորապես տասը մետր փորձելով խլել Արտակի ձեռքին եղած հրազենը` բարձրացնելով փողը վեր գնացել են մի փոքր հեռու: Այ սա է, որ Ալումյանն ասում էր, թե ամեն ինչ վերջացել էր: Ոչ: Այդ ժամանակ Արտակ Բուդաղյանը ձեռքի կտրուկ շարժումով գետնին է տապալում իր եղբորը, իսկ Ավետիքն էլ փորձում է բարձրանալ պառկած տեղից, զենքը գցում է դեպի եղբոր հրազենը, կորցնելով հավասարակշռությունը, Ավետիք Բուդաղյանը կրկին ընկնում է գետնին: Այնուհետև, 39-րդ վայրկյանին հնչում է կրակոց, և Արտակ Բուդաղյանը տապալվում է գետնին, որից 5 վայրկյան անց հնչել է 2-րդ և 3-րդ կրակոցը` «Տոզ» հրացանից: Մենք չենք տեսնում Ավետիք Բուդաղյանի վիրավորվելը, բայց 07:45-ի վերջից տեսնում ենք, որ երբ Ավետիք Բուդաղյանը ձեռքը առաջը պարզած և ձեռքին «Արմսքոր» ատրճանակը, վազելով գալիս է դեպի առաջ: 07:50-րդ վայրկյանին երևում է, որ նրան մոտեցավ Նիկոլայ Աբրահամյանը, ձեռքը գցեց աջ ձեռքին և նրանք դուրս են գալիս տեսադաշտից: 07:53-ին հնչում է ատրճանակի կրակոցի ձայն, մեքենայի տակից երևում է ինչ-որ ստվեր, և դա Նիկոլայ Աբրահամյանն է, որը ստանում է ծանր մարմնականվնասվածք է ստանում Ավետիք Բուդաղյանի մոտ եղած երկրորդ ինքնաշեն ատրճանակի կրակոցով», -փոխանցեց փաստաբանը:
Այնուհետև կադրում երևում են կրակոցներ, և դրանք, Սահակյանի խոսքով, Զարզանդ Նիկողոսյանի արձակած կրակոցներն են, որոնք, ըստ Զարզանդ Նիկողոսյանի պաշտպան Մարտին Զիլփուղարյանի, կանխարգելիչ նպատակ են ունեցել: «Այնուհետև, երբ Ավետիք Բուդաղյանը երևում է կադրում, այդ պահից բոլորը փախչում են, գալիս է Ավետիք Բուդաղյանը նրանց հետևից, երևում է Տիգրան Խաչատրյանը կանգնեց, կրակեց նրա ուղղությամբ իմ համոզմամբ, այդ կրակոցը չի կպել: Իհարկե, դա բավական չէ որակման համար, որովհետև երկու հատն հաստատ կպել է: Դրանից հետո երևում է, թե ինչպես է Ավետիք Բուդաղյանը կրակում փախչողների ուղղությամբ, որի հետևանքով վնասվել է տան շքամուտքի սյուներից մեկը: Այնուհետև Ավետիք Բուդաղյանը վերադառնալիս վայր է ընկնում», -կատարվածը տեսանյութի հիման վրա ներկայացրեց փաստաբանը:
Նրա խոսքով, վերադառնալիս Ավետիք Բուդաղյանի վայր ընկնելիս տպավորություն է, որ նրա հետևից կամ թիկունքից կրակում են, բայց այդպես չէ: Հետևաբար, Բուդաղյանների ու նրանց պաշտպանի հայտարարությունը, թե Ավետիքին կրակել են թիկունքից, փաստաբան Սահակյանը անթույլատրելի հնարք է համարում: «Դու փաստաբան ես, դու գիտես, որ քո պաշտպանյալի մարմնի մեջ եղել է ընդամենը մեկ գնդակ, դուրս չի եկել, ուրեմն` անցքն էլ է մեկ հատ: Եթե մուտքը լյարդի շրջանում է, ուրեմն կրակոցը եղել է դիմացից. մեր հրազենները դեռևս սովորություն չունեն շրջանցել մարդու մարմինը 180 աստիճան ու վերադառնալ մխրճվել մարմնի մեջ», -ասաց Սահակյանը:
Նա իր մարմնի վրա ցույց տվեց, թե հատկապես որ հատվածներից է վիրավորվել Ավետիք Բուդաղյանը. Երկու վնասվածքի դեպքում փամփուշտները դուրս են եկել, իսկ երկուսի դեպքում էլ մնացել են մարմնի մեջ: Սահակյանը տեղեկացրեց, որ բոլոր փամփուշտները Ավետիք Բուդաղյանի ուղղությամբ կրակվել են դիմացից:
«Արդյո՞ք մարմնի այս մասը (ցույց է տալիս լյարդի հատվածը-հեղ.) կոչվում է թիկունք, արդյո՞ք մարմնի ցայլքը կոչվում է թիկունք, արդյո՞ք կրծքավանդակի աջ մասը կոչվում է թիկունք», -հարցադրումներ արեց փաստաբանը և հայտարարեց, որ կրակողը եղել է Սուրիկ Խաչատրյանի որդին` Տիգրան Խաչատրյանը: Ի դեպ, նրա նկատմամբ հարուցված քրեական գործը կարճելու և խափանման միջոցը փոխելու մասին Սահակյանի միջնորդությունը նախաքննական մարմինը մերժել է:
Ավետիք Բուդաղյանի ձեռքի արմունկի հատվածում ստացած վնասվածքը հասցրել է Զարզանդ Նիկողոսյանը: Սահակյանի խոսքով, Նիկողոսյանը վաղուց պետք է ազատության մեջ լիներ, քանի որ այդ վնասվածքը «միջին աստիճանի էլ չի ձգում»:
«Սուրիկ Խաչատրյանը հարբած ու քնած է եղել»
Տիգրան Խաչատրյանի ու Զարզանդ Նիկողոսյանի փաստաբանները պնդում են, որ Սուրիկ Խաչատրյանը ողբերգական դեպքի ժամանակ իր սենյակում քնած է եղել: «Նա ուժեղ հարբած է եղել: Դուք երբևէ հարբած ու քնած եղե՞լ եք, օրինակ ես շատ շուտ եմ արթնանում, իսկ եղբայրս` ուշ: Ու բացի այդ, նրանց պատուհանները ձայնը մեկուսացրել են և նրա ականջին ձայն չի հասել», -հայտարարեց Ռուբեն Սահակյանը:
Մյուս փաստաբան Մարտին Զիլֆուղարյանը մանրամասնեց. «Ավետիք Բուդաղյանի գալու ժամանակ Սուրիկ Խաչատրյանը ննջել է, բայց քնած չի եղել: Հարազատները նրան խնդրել են գնալ սենյակ, քնել ու չեն ասել, որ Ավետիք Բուդաղյանը եկել է: Արդեն երկրորդ անգամ, երբ Բուդաղյանները նորից եկել են, Խաչատրյանի քույրը եղբորը տարել է շատ ավելի հեռու սենյակ, որը բակից բաժանում է մեծ դահլիճը, լողավազանը: Կրակոցներ չէր կարող լսել», -հայտարարեց Զիլֆուղարյանը:
Ներկայացնելով Արտակ Բուդաղյանի արարքը, որը նախաքննական մարմինը գնահատել է որպես սպառնալիքներով ուղղորդված զինված հարձակում, փաստաբան Զիլֆուղարյանն ասաց, որ Բուդաղյանը սպառնացել է վերացնել Խաչատրյանների ցեղը: «Նա եկել ու սպառնացել է վերացնել ցեղը, ծնողը, իսկ տիկին Լորետային դիմելով հայտարարել է, թե կսպանի նրան», -նշեց փաստաբանը:
Կարդացեք նաև`
Սուրիկ Խաչատրյանի նկատմամբ առնվազն երկու մեղադրանք պետք է առաջադրվեր. Փաստաբան Հայկ Ալումյան
Սուրիկ Խաչատրյանին մեղադրանքներ առաջադրելու փոխարեն մեղադրանք են առաջադրել որդուս` Արտակին. Բուդաղյանի նամակը՝ նախագահի
Լրահոս
Տեսանյութեր
Եթե Ադրբեջանը վստահ է, ինչո՞ւ է դատական գործընթացները դադարեցնելու մասին գաղափար առաջ քաշում
