«ԱրմենՏել»-ը մեկնարկում է բջջային ցանցի արդիականացումը և ընդլայնումը Դիլիջանում

ՏՀՏ-ն Հայաստանում 14:34 29/08/2013

«ԱրմենՏել» ընկերությունը (ապրանքանիշը Beeline) հայտարարում է բազային կայանների արդիականացման և բջջային ցանցի ընդլայման աշխատանքների մեկնարկի մասին Դիլիջանում և նրա շրջակայքում: Կատարված աշխատանքների արդյունքում բջջային կապի ծածկույթը զգալիորեն կբարելավվի ոչ միայն Դիլիջանում, այլև քաղաքի մատույցներում: Այս մասին հայտնում են ընկերության մամուլի ծառայությունից:

«Մենք հատուկ նշանակություն ենք տալիս Դիլիջանին, քանի որ այն հեռանկարային և ամենաարագ զարգացող քաղաքներից մեկն է Հայաստանի հյուսիսում: Հետաքրքրվածությունը ներդնողների, կառավարական կառույցների և տուրիստական միջազգային կազմակերպությունների կողմից էլ ավելի անհրաժեշտ է դարձնում արդիականացնել ցանցերը` կապի ծառայությունների հանդեպ աճող պահանջարկը բավարարելու համար: Այդ իսկ պատճառով մենք առաջնահերթ խնդիր ենք համարում ապահովել Դիլիջան քաղաքը լավագույն բջջային ծածկույթով, ինչը հնարավորություն կընձեռի քաղաքի բնակիչներին և հյուրերին ավելի հարմարավետ օգտվել ինտերնետից և ձայնային ծառայություններից», - նշել է «ԱրմենՏել» ընկերության Գլխավոր Տնօրեն Անդրեյ Պյատախինը:

Աշխատանքները կընթանան մինչև նոյեմբեր ամսվա կեսերը, սակայն Դիլիջան քաղաքի բնակիչները և հյուրերն առաջին որակական փոփոխությունները կզգան արդեն իսկ մի քանի օրից:

Աղբյուրը հիշեցնում է, որ 2013 թ. օգոստոս ամսվա սկզբին ընկերությունն ընդլայնել է բջջային ցանցը Սյունիքի մարզի արևելյան սահմանի տարածքում` ապահովելով Խնածախ և Վաղատուր գյուղերի բնակիչներին բջջային կապով և շարժական ինտերնետով: Ցանցի ընդլայմանն ուղղված աշխատանքների արդյունքում ծածկույթն ավելացել է 22 քմ. կիլոմետրով, իսկ բջջային կապի ծառայություններից և 3G ինտերնետից այսուհետ կարող են օգտվել ավելի քան 1500 բնակիչ:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: