Ձեր վստահելի աղբյուրը

Սեպտեմբերի 14-ին կայանալիք Փաստաբանների պալատի նախագահի ընտրություններին ընդառաջ, նախընտրական քարոզարշավի ընթացքում արդեն իսկ թեկնածուների կողմից մեղադրանքներ են հնչում Պալատի ղեկավարության ու առանձին անդամների հասցեին: 

Panorama.am-ին տված հարցազրույցում Փաստաբանների պալատի խորհրդի անդամ Կարեն Մեժլումյանը պատասխանում է հնչած մեղադրանքներին.

-Փաստաբանների պալատի նախագահի ընտրությունների քարոզարշավի ընթացքում պարզվեց, որ Պալատը իր փաստաբանների թիկունքում կանգնած չէ, մասնավորապես նման հայտարարություններ արեցին մյուս թեկնածուներ Կրոմվել Գրիգորյանն ու Տիգրան Աթանեսյանը: Մի տեսակ նաև թշնամական տրամադրություններ կան: Իսկապե՞ս այդպիսի ծանր վիճակ է Պալատի ներսում, պարոն Մեժլումյան:

-Թշնամական վերաբերմունք ընդհանրապես չկա և չի կարող լինել Պալատում: Փաստաբանական համայնքը այն համայնքը չէ, որտեղ կարող են նման ճղճիմ բաներ լինել: Ոչ միայն թշնամաքի մասին էր խոսք գնում նրանց հարցազրույցներում, այլ նաև մեղադրանքներ էին հնչում Պալատի ղեկավարության հասցեին: Նույնիսկ հեռախոսային հաղորդագրություններ ստացանք, որ դատարանի կցորդ կլինենք, եթե չընտրենք Տիգրան Աթանեսյանին: Կրմովել Գրիգորյանն էլ, ըստ էության, հաստատել էր, որ նման երևույթ կա: Այդպես չէ: Օրինակ, Վճռաբեկ դատարանի մոտ ակցիայի մասին Տիգրան Աթանեսյանը ասել էր, որ ինքն է եղել Ռուբեն Սահակյանի կողքին և մի քանի երեխաներ, իրականությանը չի համապատասխանում նման ձևակերպումը: Չեմ ասում սուտ է: Մեղմ եմ ասում` իրականությանը պարզապես չի համապատասխանում: Մենք ունենք տեսագրություն, որտեղից պարզ երևում է, որ բազմաթիվ փաստաբաններ են մասնակցել դատադուլի ակցիային: Այնտեղ մի երեխա է եղել, և դա Արմանս է: Իսկ եթե այդպիսի անճշտություններ հայտարարելը ուղղված է այլ դաշտի, ապա չեմ հասկանում դրա իմաստը որն է: Դա, Փաստաբանների պալատի նախագահի ընտրություններում ոչ մի դիվիդենտ չի կարող տալ:
Կրոմվել Գրիգորյանի պարագայում ևս, երբ նա ասում է, որ 90-ական թվականներին իր դեմ քրեական գործ է հարուցվել, և իրեն Պալատն անպաշտպան է թողնում, պետք է նա ասեր նաև, թե ով էր իրեն պաշտպանում, ինչ էր արվում նրան օգնելու համար: Այդ ժամանակ կային փաստաբանական երեք միություն` Հայ Փաստաբանների միջազային միությունը, Փաստաբանների միությունը, Փաստաբանների միջազգային միություն: Կրոմվել Գրիգորյանը ՀՀ Փաստաբանների միությունից էր: Երբ նրա նկատմամբ քրեական գործ էր հարուցվել այդ միությունից նա պաշտպան չուներ,բայց նրան պաշտպանեց Ռուբեն Սահակյանը, որը Փաստաբանների միջազգային միության փաստաբան էր: Նրա կազմակերպած պաշտպանությանը միացան այդ միության մոտ 50 փաստաբաններ: Ես այդ ժամանակ ստաժոր էի և հիշում եմ այդ պաշտպանությունը: Եվ Սահակյանին մեղադրել, որ չի պաշտպանում իր գործընկերներին….Այդ մարդու էությունն է պաշտպանել մարդկանց, չի կարող հակառակը լինել: Ավելին ասեմ. ես՝ որպես, Պալատի խորհրդի անդամ որոշակի ինֆորմացիայի տիրապետում եմ. սկսած 2005 թվականից, երբ ստեղծվեց Փաստաբանների պալատը, Կրոմվել Գրիգորյանի կողմից վարույթ հարուցելու մասին 12 դիմում է եղել, որոնցից 7-ը սանկցիա կիրառելու մասին դատարանների կողմից է եղել, իսկ սանկցիայի մասին Պալատը պարտավոր է հարուցել, 2 դիմում դատախազության կողմից և երեք դիմում քաղաքացիների կողմից: Դատարանների ուղարկած սանկցիաների մասին բոլոր դիմումների մասով վարույթը հարուցվել է, բայց մերժվել են` կարճվել է, Կրոմվել Գրիգորյանին պատասխանատվության չենք ենթարկել: Դատախազությանը նույնպես մերժվել են: Քաղաքացիների մեկ դիմումով վարույթ հարուցվել է, պատասխանատվության է ենթարկվել, վիճարկել է դատարանում, մերժվել է, մյուսով վարույթ չի հարուցվել, իսկ երրորդով պատասխանատվության է ենթարկվել, սակայն նոր հանգամանք է ի հայտ եկել, և Պալատի խորհուրդը իր նոր որոշմամբ նախկին որոշումը վերացրել է:

-Կրոմվել Գրիգորյանը նաև ասել էր, որ Ռուբեն Սահակյանը նախանձում է իրեն, քանի որ Սահակյանը ձեռքին գործեր չի ունեցել: 

-8 տարի է` Ռուբեն Սահակյանին տեսնում եմ Պալատի նախագահի պաշտոնում, նա գործեր, պարզապես, չի վերցնում, որովհետև դա կխանգարի իրեն: Ընդամենը տարեկան մեկ-երկու գործ է վերցնում, իր ասելով, ֆորմայի մեջ մնալու համար: Այսինքն, այդ մարդը Կրոմվել Գրիգորյանին նախանձելու դաշտում չէ, որ մի հատ էլ նախանձի կամ չնախանձի: Դա Կրոմվել Գրիգորյանի սուբյեկտիվ մոտեցումն է, որը օբյեկտիվ իրականության հետ կապ չունի: 

-Պարոն Մեժլումյան, Տիգրան Աթանեսյանը խոսում էր նաև վախի մթնոլորտի մասին, ինքը օրինակներ բերեց, որ Կապանում հանդիպման ժամանակ փաստաբանները խնդրել են տեսանյութը տարածելիս մոնտաժել, որ իրենք չերևան: Այնուհետև ասել էր, որ Հանրային պաշտպանի գրասենյակի աշխատողներից ստորագրություններ են վերցնում, որ ընտրելու են Արա Զոհրաբյանին: Կա՞ իսկապես նման բան:

-Մի բան ասեմ. հեռախոսային հաղորդագրություններ փաստաբաններս ստանում ենք Տիգրան Աթանեսյանից, որ «եթե չեք ուզում Պալատը դառնա դատարանի կցորդ, ապա ընտրեք Տիգրան Աթանեսյանին»: Այլ թեկնածուի օգտին քվեարկելու մասին հաղորդագրություն, գոնե ես, չեմ ստացել: Ինչ վերաբերում է Հանրային պաշտպանի գրասենյակից Զոհրաբյանի օգտին քվեարկելու մասին ստորագրություններ վերցնելուն, ապա վստահ հայտարարում եմ, որ նման բան չկա և չի կարող լինել, ՀՊԳ-ում աշխատում են լավ, արժանապատիվ ու կայացած մարդիկ և նրանց ճանաչողը իրեն թույլ չի տա մտքով անգամ անցկացնել, որ նրանցից կարելի է ստորագրություն վերցնել որևէ մեկի օգտին քվեարկելու համար, դա աբսուրդ է և նման բան հայտարարողը պարզապես միտինգային տրամադրություններ ունի: Իսկ վախի մթնոլորտի մասին խոսելն անհեթեթ է: Նախ ասեմ` եթե կա փաստաբան, որը վախեր ունի, ուրեմն նա չի կարող փաստաբան լինել: Ինչպես կարող է դատախազության, դատարանների, ոստիկանության դեմ պայքարել, եթե վախ ունի: Փաստաբանների ու Փաստաբանների պալատի միջև կապը անդամավճարի վճարումն է, վճարեց, ուրեմն կարող է կապ չունենալ Պալատի հետ: Եթե ցանկանում է ակտիվ գործունեություն ծավալել Պալատի ներսում, ապա կարող է, որևէ մեկը չի խանգարում նրան: Ինչի՞ մասին է խոսքը: 

-Նախընտրական քարոզարշավի ժամանակ նաև «յուրային փաստաբան» «տերմինը» շրջանառության մեջ դրվեց: Ովքե՞ր են նրանք, պարոն Մեժլումյան:

-Բոլոր փաստաբանները Պալատի յուրային են: Խոսք գնաց նաև գործուղումների հետ կապված, որ յուրայինները գնում են գործուղումների: Նախ ասեմ, որ գործուղումը «սանատորիա» չէ, որ գնան հանգստանան: Գործուղումը կոնկրետ ծրագրի շրջանակում, կոնկրետ աշխատանք է: Գործուղման գնացել են օրինակ կարգապահական հանձնաժողովի, խորհուրդի անդամները` ուսումնասիրելու այլ երկրների փորձը: Գործուղման կարող են գնալ վարչական աշխատողները, որոնք իրենց գումար աշխատելու ժամանակից տրամադրում են Պալատին: Այդ հայտարարությունները անտեղի են, դրանք նախընտրական սև PR են դեպի Պալատի այսօրվա նախագահը ու իր կողմից առաջադրված թեկնածուն` Արա Զոհրաբյանը: Պալատի նախագահի վրա ցեխ շպրտելու փորձ անելով, փորձում են վարկաբեկել նրա առաջադրած թեկնածուին: Բայց Ռուբեն Սահակյանը որևէ առիթ չի տվել, որ այդպիսի փաստերով իրեն մեղադրեն: Տիգրան Աթանեսյանը նաև ասում է, որ Արա Զոհրաբյանը Մուշեղ Շուշանյանի պաշտպանությանը չի մասնակցել ու Պալատն այդ հարցում որևէ բան չի արել: Կարող եք տեսագրությունը տեղադրել, որտեղ երևում է, որ Արա Զոհրաբյանը, Հայկ Ալումյանը և Մուշեղ Շուշանյանը խոսում են նույն գործի մասին, և ինչ է ասում Արա Զոհրաբյանը ի պաշտպանություն` Շուշանյանի: Նա հրապարակայնորեն մտել է այդ գործում որպես Մուշեղ Շուշանյանի պաշտպան: Այդ ասուլիսին նախորդել է Պալատի խորհրդում քննարկումը և մենք որոշեցինք, որ Ռուբեն Սահակյանը շուրջ 200 փաստաբանի կոնսոլիդացնի, որ պատրաստ լինեն գնալ դատարանի դահլիճ: Այդ ժամանակ Սահմանադրական դատարանում նույն օրենքի, որով մեղադրում էին Շուշանյանին, սահմանադրականության հարցը պետք է քննվեր և խնդիր ունեինք, որ դատարանում նիստը հետաձգվեր, որպեսզի ՍԴ-ն վերջապես որոշում կայացներ այդ օրենքի գործով: Դատարանը ոչ թե հետաձգում էր քննությունը, այլ արագ-արագ նիստեր էր անում և տպավորություն ունեւնք, որ ուզում են Շուշանյանին դատապարտել: Մենք որոշեցինք, որ ամեն նիստում մի փաստաբան ներգրավում է որպես Շուշանյանին պաշտպան ու առաջինը գնացին խորհրդի անդամները, մասնավորապես, առաջինը գնաց նիստի Հայկ Ալումյանը, հաջորդը Արա Զոհրաբյանը: Սակայն դատարանը գործը հետաձգել էր մինչև ՍԴ-ն որոշում կայացնի: Այդ որոշումից հետո դատարանը գործը կարճեց: Ամբողջ խորհուրդն էր այդ որոշումը կայացրել Ռուբեն Սահակյանի հովանավորությամբ: Նաև ոչ հրապարակային պաշտպանություն է եղել, ամեն ինչ ցուցադրական հո չի արվում: 

-Ի դեպ, Մուշեղ Շուշանյանի անվան հետ միասին, նշվում էր նաև փաստաբան Վահե Գրիգորյանի անունը, որին ժամանակին Պալատը չի պաշտպանել:

-Վահե Գրիգորյանի դեմ քրեական գործը որ հարուցվել էր Պալատը դեռ նոր-նոր ձևավորվում էր, հստակ չեմ հիշում, կա՞ր Պալատը, թե ոչ: Ամեն դեպքում, երբ Վահե Գրիգորյանի դեմ գործ էր հարուցվել ու կալանքի սանկցիա էր կիրառվել, օրինակ, ես կամավոր ներգրավել եմ նրա պաշտպանության գործում: Նաև կինս` փաստաբան Ինեսա Պետրոսյանը: Երբ կալանքի հարցն էր քննարկվում դատարանում, որը շարունակվել է մինչև առավոտյան ժամը վեցը, բոլորս այնտեղ էինք, այնտեղ էր նաև Փաստաբանների պալատի նախագահ Ռուբեն Սահակյանի դուստրը` Զարուհի Դանիելյանն էր: Եվ այսօր Ռուբեն Սահակյանին մեղադրել, որ նա ոչինչ չի արել…Բացի այդ, նաև ոչ հրապարակային գործողություններ են կատարվել, որոնց մասին պետք չէ բարձրաձայնել: Պալատը միշտ էլ մասնակից է եղել իր փաստաբանների պաշտպանությանը: Ընդհանրապես պետք չէ զատել Պալատը փաստաբաններից: Պալատը մեր գործող 1500 և ավելի փաստաբանների հանրագումարն է, մենք յուրաքանչյուրս մեզանով պալատ ենք: Երբ ասում են դատախազության դեմ պայքար, ոստիկանության դեմ պայքար, այդ պայքարը մենք ամեն օր տանում ենք, որպես Պալատի անդամ փաստաբաններ: Մենք յուրաքանչյուրս Պալատ ենք, և այդ պայքարի մեջ միայնակ չենք: Մենք փաստաբաններ ենք, և դեռ ուսանողական տարիներից ենք սովորել, որ պետք է խոսել փաստերով: Եթե մի բան ասելու ենք ու դա հիմնավորող փաստ չունենք, ավելի լավ է չասենք: Իսկ էլ ավելի վատ է, որ պարզապես սուտ ենք ասում: 

-Պարոն Մեժլումյան, Պալատի ընտրություններում Արա Զոհրաբյանի թեկնածությունն առաջադրելը համարվեց «ժառանգ» օպերացիա: Դուք, որպես Պալատի խորհրդի անդամ, ինչպե՞ս կմեկնաբանեք դա: 

Ես այդ որակմանը դեմ եմ, դա վիրավորական որակում է: Ես ցավ կապրեի, եթե Պալատում չլիներ մեկը, որին այդ պաշտոնում կտեսներ Պալատի նախագահը:: Նա գտել է, որ Արա Զոհրաբյանը իր պարտականությունը կարող է լավ կատարել, Պալատին կարող է լավ օգուտ տալ: Չմոռանանք, որ Արա Զոհրաբյանը 7-8 տարի է, որ Պալատի փոխնախագահն է: Ես դեռ օբյեկտիվ որևէ քննադատություն նրա հասցեին չեմ լսել: Դա զուտ ցեխ շպրտելու միջոց է: Պալատին անհիմն վարկաբեկելու միջոցով նրանք չեն կարող դիվիդենտներ շահել, որովհետև գոնե անդամները գիտեն իրականությունը: Պետք չի սուտ ասել, սա այն դեպքը չէ, որ ստի հիման վրա դիվիդենտներ բերի: 


Կարդացեք նաև`

Սահակյան Ռուբիկը նախանձել է և փորձել է խոչընդոտել ինձ. Կրոմվել Գրիգորյանը` ՓՊ ընտրությունների մասին

Ես չեմ կարող հանդուրժել «ժառանգ» օպերացիան. Տիգրան Աթանեսյանը «ընդհատակյա» քայլեր է նկատել քարոզարշավի ընթացքում