Ձեր վստահելի աղբյուրը

 Հայաստանյան շուրջ 60 մշակութային օջախների մուտքն այսօր և վաղն անվճար է. մեկնարկել է «Եվրոպական ժառանգության օրերը»` «Ժառանգության ժառանգները» խորագրի ներքո: Իրականացվելու է շուրջ 200 միջոցառում: Ծրագրում ներառված են նաև նորօրյա ճարտարապետական հուշարձանները. հատուկ թիրախային խմբերի համար կկազմակերպվեն այցելություններ ՀՀ նախագահի նստավայր, ՀՀ կառավարության և Ազգային ժողովի շենքեր, հատուկ էքսկուրսիոն ծրագրով առաջին անգամ իր դռները կբացի Ալ. Սպենդիարյանի անվան օպերայի և բալետի ազգային թատրոնը, (նախնական գրանցումով) անվճար այցելություններ կկազմակերպի «Արարատ» կոնյակի գործարանը: Միջոցառումներին ծրագրին կարելի է ծանոթանալ այստեղ:

Եվրոպական ժառանգության օրերի շրջանակում սեպտեմբերի 21-ին «Հարավկովկասյան երկաթուղի» ՓԲԸ-ի հետ կիրականացվի երկաթուղային շրջագայություն. դեպի Լոռու մարզ` Հաղպատ, Սանահին, Քոբայրավանք, Օձուն, Շիրակի մարզ` Ջաջուռում գտնվող Մինաս Ավետիսյանի թանգարան, Սևան` Այրիվանք և բրոնզեդարյա հնավայր:

«Եվրոպական ժառանգության օրերը» կոչված է ապահովելու հասարակության, մասնավորապես, երեխաների, պատանիների և երիտասարդների ակտիվ մասնակցությունը բազմատեսակ միջոցառումներին` խթանելով մշակույթի և մշակութային ժառանգության մատչելիությունն ու հասանելիությունը հասարակության լայն շերտերի համար:

Եվրոպական ժառանգության օրերին զուգահեռ օգոստոսի 30-ից սեպտեմբերի 1-ը Երևանում անցկացվում է Եվրոպական ժառանգության օրերի ազգային համակարգողների համաժողովը, որին կմասնակցեն մշակութային ժառանգության ոլորտի մասնագետներ, պաշտոնյաներ Եվրոպայի խորհրդից և Եվրամիությունից, Եվրոպական ժառանգության օրերի ազգային համակարգողներ` շուրջ 30 եվրոպական երկրներից: Համաժողովը կազդարարի Եվրոպական ժառանգության օրերի մեկնարկը, ինչպես նաև կքննարկի ծրագրի 2013-2014 թթ մարտավարությունը և հեռանկարները: Համաժողովի ընթացքում ազգային համակարգողների համար կկազմակերպվի ուսումնական սեմինար, որը կվարեն Մեծ Բրիտանիայից և Հունաստանից ժամանած մշակութային պահպանության ոլորտի մասնագետները, ինչպես նաև կմեկնարկի «Եվրոպական ժառանգության օրեր» ծրագրի հանրահռչակմանն ուղղված նորաստեղծ Հաղորդակցման պլատֆորմը:
Համաժողովի մասնակիցները հնարավորություն կունենան մասնակցելու Եվրոպական ժառանգության օրերի հայաստանյան ծրագրին, այցելելու պատմամշակութային հուշարձաններ:

Եվրոպական ժառանգության օրերն անցկացվում են յուրաքանչյուր տարի՝ Եվրոպական մշակութային կոնվենցիային (1954 թ.) միացած 50 Եվրոպական երկրներում: Ծրագրի իրականացման մտահաղացումը ծագել է Ֆրանսիայում 1984 թվականին՝ «Պատմական հուշարձանների բաց դռների օր» խորագրի ներքո: «Եվրոպական ժառանգության օրեր» ծրագիրը պաշտոնապես հաստատվել է Եվրոպայի խորհրդի կողմից 1991 թվականին, իսկ 1999 թ. ծրագրին միացել է նաև Եվրամիությունը և նախաձեռնությունը սկսել է իրականացվել «Եվրոպա. միասնական ժառանգություն» կարգախոսի ներքո:
Հայաստանը «Եվրոպական ժառանգության օրեր» ծրագրին միացել է 2000 թվականին: Նախորդ տարիներին միջոցառումները կրել են տարբեր խորագրեր՝ «Ծիր կաթին», «Կամրջենք սերունդները», «Գրավոր հիշողություն», «Ճանապարհ» և այլն: