Ձեր վստահելի աղբյուրը

 Հայաստանը անշեղորեն հետևում է Ժնևյան կոնվենցիաների դրույթներին: Մեկնաբանելով ադրբեջանցի ռազմագերի Ֆիրուզ Ֆարաջևի`երրորդ երկիր փոխանցելու փաստը` panorama.am-ի հետ զրույցում այս մասին նշեց Հայաստանում Գերիների, պատանդների և անհայտ կորածների հարցերով զբաղվող հանձնաժողովին առընթեր աշխատանքային խմբի ղեկավար Արմեն Կապրիելյանը:

«Հայաստանի Հանրապետության իշխանությունները հետամուտ են միջազգային մարդասիրական իրավունքի նորմերով ստանձնած պարտավորություններին: Հաշվի առնելով ռազմագերու` հայկական կողմի և ԿԽՄԿ-ի ներկայացուցիչների մոտ արտահայտված ցանկությունը, Կարմիր խաչի միջազգային կոմիտեն, որպես միջնորդ կազմակերպություն, դիմել է ՄԱԿ-ի հատուկ ընթացակարգերին և նախօրեին ադրբեջանցի ռազմագեերին տեղափոխվել է երրորդ երկիր»,- նշեց Ա. Կապրիելյանը:

Հատկանշական է, որ Ֆիրուզ Ֆարաջևը վերջերս ցանկություն է հայտնել վերադառնալ հայրենիք, ինչն իր հերթին առաջացրել էր Ադրբեջական կողմի «կասկածները»:

Մասնավորապես` «ԱՊԱ» լրատվական գործակալության հետ զրույցում Ադրբեջանի գերիների, անհետ կորածների և պատանդների հարցերով պետական հանձնաժողովի քարտուղար Շահին Սայիլովը նշել էր, որ «կասկած է առաջացնում այն իրողությունը» որ Հայաստանում գտնվող ադրբեջանցի ռազմագերի Ֆիրուզ Ֆարաջևը ցանկություն է հայտնել վերադառնալ հայրենիք հենց այն պահից, երբ ադրբեջանական գերության մեջ հայտնվեց Հակոբ Ինջիգուլյանը: Շահին Սայիլովը նշել էր, որ սա Ժնևյան կոնվենցիաների խախտում է:

Այս կապակցությամբ անդրադառնալով Ֆիրուզ Ֆարաջևի` երրորդ երկիր տեղափոխվելու վերջնական ցանկությանը Ա. Կապրիելյանը նշեց.

«Ֆարաջևը ի սկզբանե հատել էր ՀՀ պետական սահմանը` երրորդ երկիր տեղափոխվելու մտադրությամբ: Նա առաջին իսկ օրվանից հայտարարել է այդ իր ցանկության մասին: ԿԽՄԿ ներկայացուցիչները պարբերաբար այցելում և դեմ առ դեմ հանդիպումներ էին ունենում ադրբեջանցի ռազմագերու հետ: Ահա այսպիսի հանդիմումներից մեկի ընթացքում Ֆարաջևը հանկարծ նշել է, որ ցանկանում է վերադառնալ Ադրբեջան: Ենթադրում եմ, որ գուցե այստեղ դեր է խաղացել հարազատների նկատմամբ կարոտը: Դրանից հետո Ֆարաջևը նորից փոխեց իր ցանկությունը` հայտարարելով, որ վերջանական որոշում է կայացրել տեղափոխվել երրորդ երկիր: Պարզ է, որ որքան էլ բարվոք լինեն ռազմագերու պահվելու պայմանները, նա անշուշտ գտնվում է որոշակի ապրումների մեջ: Կարծում եմ, ռազմագերին բավական ժամանակ է ունեցել դիտարկել բոլոր տարբերակները: Մյուս կողմից անկասկած իր դերն է ունեցել այն իրողությունը, որ Ադրբեջան վերադարձած ռազմագերիները բոլորն անխտիր դատապարտվել են հայրենիքի դավաճանության հադվածով բավական երկար ազատազրկման ժամկետների:

Հարկ է նշել նաև, որ ՀՀ իշխանությունները որևէ առնչություն չունեն ռազմագերուն` երրորդ երկիր տեղափոխելու գործընթացի հետ: Այն իրականացվել է ԿԽՄԿ-ի կողմից:

Այս ամբողջ գործընթացը իրականացվել է բավական թափանցիկ և ՊՆ-ն ժամանակին հանդես է եկել համապատասխան հայտարարություններով: Այսինքն, տվյալ իրավավիճակում ռազմագերին, ինչ ցանկություն որ արտահայտել է, այդ մասին պաշտոնական հայտարարություն է արվել»,- նշեց Ա. Կապրիելյանը:

Անդրադառնալով օգոստոսի 7-ի լույս 8-ի գիշերը` Ադրբեջանի զինված ուժերի կողմից գերեվարված հայ զինծառայող Հակոբ Ինջիգուլյանի շուրջ ստեղծված իրադրության ներկա փուլին` Արմեն Կապրիելյանը նշեց. «Ցավոք սրտի, դեռևս հստակ արդյունքների մասին խոսել չենք կարող: Գործընթացը գտնվում է բանակցային փուլում: Առայժմ ադրբեջանական կողմից որևէ կոնկրետ արձագանք չկա»:

Արմեն Կապրիելյանի համոզմամբ Ֆարաջևի` երրորդ երկիր տեղափոխվելը ևս մեկ անգամ փաստեց այն իրողությունը, որ հայկական կողմը ուղղակի կապ չէր տեսնում
ադրբեջանցի ռազմագերու շուրջ զարգացումների և Ինջիգուլյանի` Հայաստան վերադառնալու գործընթացների միջև:

«Մենք դրա իրավունք էլ չունեինք: Այս առումով ադրբեջանական «կասկածները» լիովին անհեթեթ էին: Հակառակորդ կողմի առջև պայման դնելը, ինչ-որ նախապայմաններով հանդես գալը արգելված է միջազգային մարդասիրական իրավունքով: Հայաստանը երկար տարիներ անշեղորեն հետևում է Ժնևյան կոնվենցիաներին` կատարելով իր ստանձնած պարտավորությունները: Տվյալ պարագայում հաշվի է առնվում ռազմագերու ցանկությունը»,- ասաց Ա. Կապրիելյանը:

Նախորդիվ`

 Ինջիգուլյանի վերադարձը կլինի պաշտոնական Բաքվի ամենախելամիտ որոշումը. Փորձագետ

ՊՆ. Հայաստանը ադրբեջանցի գերի Ֆիրուզ Ֆարաջևին փոխանցեց երրորդ երկրին