Ձեր վստահելի աղբյուրը

ԱՊՀ-ից ժամանած գրոհայինների վերապատրաստման ճամբարները Սիրիայում գլխավորում է Ադրբեջանի նախագահի անձնական թիկնապահը: Ընդհանուր առմամբ, Սիրիայում գրոհայինների շարքերում կռվում են ԱՊՀ հազարավոր քաղաքացիներ. նրանցից միայն 4000-ը ռուսաստանցի են, իսկ գրոհայինների ճամբարներում կան նաև բազմաքանակ ադրբեջանցիներ, ովքեր այժմ մահանում են «տասնյակներով»: Այդ մասին «Նեյրոմիր-ԹիՎի»-ի հետ զրույցում հայտարարել է վերջերս Սիրիայից վերադարձած փորձագետ Մարատ Մուսինը: Հարցազրույցի ձայնագրությունը կարելի է գտնել` այստեղ:

Մեկնաբանելով Դամասկոսի Ջոբար արվարձանում քիմիական զենքի կիրառման մասին տեղեկատվությունը` փորձագետը նշել է, որ Սիրիայի կառավարական զորքերի կողմից քիմիական զենք չի կիրառվել, ճիշտ հակառակը` հենց գրոհայիններն են քիմիական զենք կիրառում:

Մուսինն ընդգծել է, որ Արևմուտքն աջակցում է Սիրիայում ահաբեկչական էլիտային: «Երբ բարձրակարգ պրոֆեսիոնալները դառնան էլիտա, մնացածն, իհարկե, կնահանջեն», - ասել է նա: Ընդ որում, փորձագետն ընդգծել է. «Սիրիայում ԱՊՀ-ից ժամանած գրոհայինների վերապատրաստման ճամբարները գլխավորում է Իլհամ Ալիևի անձնական թիկնապահը»:

Նախագահ Բաշար Ասադի հակառակորդների հետ միասին պայքարող գրոհայինների տեղափոխումը ԱՊՀ-ից Սիրիա, ինչպես նկատել է Մուսինը, կատարվում է Թուրքիայի միջոցով:

«ԱՊՀ երկրների քաղաքացիները Սիրիա են ներթափանցում Թուրքիայի միջոցով: Սկզբում հանդիպում են թուրքերին, ովքեր տեղափոխում են նրանց մինչև սահմանը, որտեղ և հավաքվում են խմբերը: Տաքսին մոտենում է, նրանց իջեցնում անհրաժեշտ կետերում, որտեղից նրանք պետք է հատեն սահմանը: Այնուհետև մոտենում է թուրքական ոստիկանական մեքենան, հավաքում է փաստաթղթերը, տանում է բաժանմունք, սկանավորում է դրանք, վերադառնում է և վերադարձնում փաստաթղթերը: Սահմանը հատելուց հետո նրանց դիմավորում են ղրղզները, ովքեր ռուսերեն են խոսում», - նշում է Մուսինը:

Այնուհետև, ԱՊՀ քաղաքացիները հայտնվում է գրոհայինների ճամբարում: «Այնտեղ շատ են ադրբեջանցիները: Ո՞վ է պահում մեր շուկաները: Մեր խաղաղ առևտրականները: Նրանց այժմ Ջոբարում տասնյակներով են սպանում: Այժմ այդ ամբողջ խաժամուժն այնտեղ է», - ասել է Մուսինը:

Ընդ որում, նա ընդգծել է, որ Սիրիայում բոլոր աղմկահարույց հանցագործությունները կատարում են հյուսիսային կովկասցիները: «Այժմ Սիրիայում պատրաստում են ահաբեկիչ առաջնորդների, ովքեր ապագայում վերադառնալու են Ռուսաստան», - կարծում է փորձագետը:

Ջոբարում Ալ-Քաիդայի ահաբեկիչներին դիմադրող կառավարական զորքերի մասին խոսելիս Մուսինը նշել է, որ այն բանից հետո, երբ սիրիական զորքը կես ժամվա ընթացքում գրավեց այդ թաղամասի հիմնական դիրքերը, ահաբեկիչների հրամանատարությունն իր շարքերը կարգի հրավիրելու համար գնդակահարել է 3 դաշտային հրամանատարների: Մուսինը նաև նշել է, որ Ռուսաստանը պատրաստ չէ պատերազմի այն մարտավարությանը, որը կիրառվում է Սիրիայում, քանի որ այնտեղ զորքերը ստիպված են լինում հազարավոր ահաբեկիչների կողմից գրավված թաղամասեր ամբողջապես ավիրել:

Հիշեցնենք, որ վերջին շրջանում ԶԼՄ-ները հայտնում էին Սիրիայում ադրբեջանցիների մահվան մի շարք դեպքերի մասին:
Ապրիլի սկզբին թուրքական կայքերը հաղորդեցին, որ Սիրիայում Ադրբեջանից մոտ 30 ահաբեկիչ է արդեն մահացել: Ադրբեջանցի կոնֆլիկտաբան Արիֆ Յունուսովի տվյալների համաձայն` Աֆղանստանում և Պակիստանում ավելի քան 300 իսլամիստ է կռվում, ովքեր ծնունդով Ադրբեջանից են: Ընդ որում, ըստ Արիֆ Յունուսովի և «ՖակտԽեբեր» պորտալի`Սիրիայում կռվում են ավելի քան 100 ադրբեջանցի ահաբեկիչ: Հենց ադրբեջանցի ահաբեկիչները «ջիհադ»-ին միանալու կոչ պարունակող տեսագրություն են տեղադրել համացանում:

Նշենք, որ միջազգային ահաբեկչական խմբավորումների և Ադրբեջանի միջև կապերը ստեղծվել են 1990-ականներին: Այն ժամանակ ադրբեջանական բանակը, ձախողելով Լեռնային Ղարաբաղի Հանրապետության դեմ ցուցաբերած ագրեսիան, մեծ կորուստներով նահանջում էր: Փորձելով փրկել իրավիճակը`Հեյդար Ալիևի գլխավորած կառավարությունը Լեռնային Ղարաբաղի հայերի դեմ պատերազմում ներքաշեց միջազգային ահաբեկիչներին և ռադիկալ խմբավորումների անդամներին Աֆղանստանից (Գյուլբեդին Հեքմաթիարի խմբավորումը), Թուրքիայից («Գորշ գայլեր» և այլն), Չեչնիայից (Բասաևի, Ռադուևի խմբավորումները և այլն) և այլ տարածաշրջաններից:

Չնայած ադրբեջանական բանակի կազմում հազարավոր օտարերկրյա վարձկանների և ահաբեկիչների` Լեռնային Ղարաբաղի Հանրապետության դեմ պատերազմում մասնակցությանը` ադրբեջանական ագրեսիան անհաջողություն կրեց և Բաքվի իշխանությունը ստիպված եղավ ԼՂՀ-ի և Հայաստանի հետ զինադադար կնքել: Սակայն միջազգային ահաբեկիչներն Ադրբեջանում իրենց անհրաժեշտ կապեր ձեռք բերեցին և հետագայում օգտագործեցին դրանք: Նրանց շարքերը համալրվում էին ադրբեջանցիներով, ովքեր այնուհետև մեկնում էին Աֆղանստան և Հյուսիսային Կովկաս, որտեղ մասնակցում էին միջազգային կոալիցիաների և ռուսական կառույցների դեմ կռվում:

Վերջին տարիներին Ադրբեջանի քաղաքացիները ակտիվորեն մասնակցում են ահաբեկչական և ծայրահեղական գործունեությանը Ռուսաստանում, Աֆղանստանում և Սիրիայում: Հենց Ադրբեջանում այդ հանրապետության քաղաքացիները քրեական պատասխանատվության են ենթարկվում Աֆղանստանում «զինված անօրինական խմբավորումների» գործունեությանը մասնակցելու պատճառով և դատապարտվում են չնչին ժամկետների ազատազրկման: