Ձեր վստահելի աղբյուրը

Վաղը Լոռու մարզի Դսեղ գյուղում մեկնարկելու է «Թումանյանական հեքիաթի օր» տիկնիկային թատրոնների միջազգային 8-րդ փառատոնը: Այն կանցկացվի «Տիկնիկները հանուն բարեկամության և մշակույթների մերձեցման» կարգախոսի ներքո:

Փառատոնն անցկացվում է Տիկնիկային արվեստի գործիչների միջազգային միության հայկական կենտրոնը` ՅՈՒՆԻՄԱ-Հայաստանը մշակույթի նախարարության աջակցությամբ:

Փառատոնի նպատակն է նպաստել նոր սերնդի գեղագիտական դաստիարակությանը, տիկնիկային արվեստի զարգացմանը, մշակույթի ապակենտրոնացմամբ աշխուժացնել մշակութային կյանքը Հայաստանի մարզերում և հեռավոր բնակավայրերում: Այն կարևոր հարթակ է տարբեր ազգերի մշակույթների մերձեցման, տիկնիկային արվեստի բնագավառում ժամանակակից ձեռքբերումների փոխադարձ ծանոթացման, տիկնիկային արվեստում միջազգային փորձի փոխանակման համար:

«Թումանյանական հեքիաթի օր» տիկնիկային թատրոնների միջազգային 8-րդ փառատոնի մեկնարկը կտրվի Դսեղի հրապարակում` Հովհ. Թումանյանի արձանի մոտ: Ներկայացումները կցուցադրվեն անվճար՝ Դսեղի մշակույթի տանը և գյուղապետարանի դահլիճում: Փառատոնի ընթացքում ներկայացումներով հանդես կգան Երևանի, Գյումրիի, Վանաձորի, Իջևանի, Էջմիածնի, Ախալքալակի, Սպիտակի, Դսեղի, Մրգաշատի, Մեծամորի, Շուշիի տիկնիկային թատրոնները, ինչպես նաև ՅՈՒՆԻՄԱ-Հայաստանի՝ վերջին մեկ տարվա ընթացքում ստեղծված 4 տիկնիկային թատրոնները:

Մշակույթի նախարարությունից Panorama.am-ին տեղեկացրեցին, որ փառատոնին կմասնակցեն տիկնիկային թատրոններ Վրաստանից, Բելգիայից, Լիտվայից, Ռուսաստանի Դաշնությունից, Իտալիայից, Դանիայից, Բուլղարիայից, Սերբիայից, Գերմանիայի Դաշնությունից, Իրանի Իսլամական Հանրապետությունից, Ալժիրից, Ուկրաինայից, Չեխիայից, Ղազախստանից, Թուրքմենիայից և Ֆրանսիայից, ինչպես նաև Արցախից և Ջավախքից:

Փառատոնի ծրագրում կարևոր տեղ է զբաղեցնում Արամ Խաչատրյանի ծննդյան 110-ամյակը, որի կապակցությամբ կներկայացվի մեծանուն կոմպոզիտորի «Մանկական ալբոմի» ստեղծագործությունների հիման վրա բեմադրված երաժշտական հեքիաթ-ներկայացում` տարբեր ժողովուրդների հեքիաթների հերոսներով:

Փառատոնի օրերին կանցկացվեն սեմինարներ` նվիրված հայ մեծ գրող Հովհ. Թումանյանի՝ աշխարհի ժողովուրդների հեքիաթների և մանկական բանաստեղծությունների թարգմանություններին ու փոխադրություններին, ինչպես նաև «Տիկնիկների և տիկնիկային արվեստի դերը երեխաների մտավոր և հոգեբանական խնդիրների գործում» խորագրով: Կգործի «Երեկոյան ակումբը», որտեղ կկայանան ներկայացումների քննարկումներ, վարպետության դասեր՝ «Տիկնիկային արվեստը հանուն հանդուրժողականության և բարեկամության», «Տիկնիկային արվեստը 21-րդ դարում», «Տիկնիկային արվեստի հնագույն օրրանները շարքից` Հնդկաստան, Չինաստան, Ինդոնեզիա», «Ժամանակակից հեքիաթագիրները և տիկնիկային թատրոնը», «Քաղաքացիական հասարակության կայացման և անհատի բազմակողմանի զարգացման խնդիրները տիկնիկային արվեստում» թեմաներով:
Ինչպես նախորդ տարիներին, այս տարի ևս փառատոնի լավագույն ներկայացումներն ու դերասանները կարժանանան «Կարապետ» մրցանակի: Փառատոնը կշարունակվի մինչև սեպտեմբերի 14-ը: