Ձեր վստահելի աղբյուրը

Հայաստանի ֆուտբոլի ազգային հավաքականի գլխավոր մարզիչ Վարդան Մինասյանը Պրահայի «Էդեն Արենա» մարզադաշտում հանդիպել է ԶԼՄ-ների ներկայացուցիչների հետ: Այս մասին հայտնում է ՀՖՖ պաշտոնական կայքը:

- Հայտնի է, որ Ռոբերտ Արզումանյանը վնասվածքով է ժամանել հավաքականի ճամբար: Ի՞նչ վիճակում է նա մոտենում խաղին:
- Միանգամից նշեմ, որ հավաքականում գտնվող բոլոր 23 ֆուտբոլիստներն էլ պատրաստ են խաղին:

- Չեխիայի ընտրանու մարզիչը նշեց, որ Հայաստանն անկայուն խաղ է ցուցադրում, հոգեբանական խնդիրներ ունի, ինչի արդյունքում թիմը կարող է պարտվել Մալթային, բայց հաղթել Դանիային: Ի՞նչպես կմեկնաբանեք նրա խոսքերը:
- Ինչ-որ առումով համաձայն եմ, որ կա հոգեբանական ազդեցություն: Բայց միայն հոգեբանությունը չէ պատճառը, քանի որ կան նաև այլ գործոններ: Մենք կարող ենք հաղթել Դանիային, պարտվել Չեխիային, իսկ Չեխիան, իր հերթին, կարող է զիջել Դանիային:

- Չեխիայի հավաքականի մարզիչը շեշտել էր նաև, որ ինքը որոշակի ճնշման տակ է: Այդ առումով ի՞նչ վիճակ է Հայաստանում:
- Այո, նրանց վրա ճնշումն ավելի մեծ է: Ես ավելի շատ մտածում եմ մեր հավաքականի մասին: Միակ ցանկությունը վաղվա մրցավեճում լավ խաղ ցուցադրելն ու հաղթելն է:

- Այսօր չեխական ԶԼՄ-ները նշել էին, որ եթե Չեխիայի հավաքականը ցանկանում է հաղթել, ապա պետք է մի քանի անգամ դիտի Դանիա-Հայաստան հանդիպման տեսագրությունը: Արդյոք Դուք փոխե՞լ եք մարտավարությունը:
- Խաղերը միմյանց նման չեն, և յուրաքանչյուր խաղի համար մենք ընտրում ենք այլ մարտավարություն:

- Լևոն Հայրապետյանը և Հրայր Մկոյանը որքանո՞վ են պատրաստ վաղվա խաղին:
- Նշեցի, որ բոլորը պատրաստ են, իսկ ինչ վերաբերում է ֆունկցիոնալ վիճակին, ապա պետք է ընտրություն կատարենք:

- Ընդլայնված ցուցակում ընդգրկված էին նաև Արտակ Դաշյանը և Վարդգես Սաթումյանը, սակայն նրանք դուրս մնացին հայտացուցակից: Ի՞նչ կարող եք ասել այդ խաղացողների մասին:
- Նրանք պետք է հասկանան, որ մեր ուշադրության կենտրոնում են, պարզապես այս անգամ ընտրվեցին այս 23 խաղացողները:

- Միխալ Բիլեկին հարց էին ուղղել, թե ի՞նչ կլինի, եթե Չեխիայի ընտրանին պարտվի, իսկ նա պատասխանել էր, որ իրենք պարտության մասին չեն մտածում: Ի՞նչ կլինի, եթե պարտվի Հայաստանը:
- Մենք էլ չենք մտածում պարտության մասին:

- Հավաքականի մի քանի խաղացողներ տեղափոխվել են Ղազախստան: Ձեր կարծիքն այդ կապակցությամբ:
- Հասկանում եմ ձեր անհանգստությունը: Բայց ղազախական թիմերի վարկանիշը բարձրանում է, ակումբներն ունեն մեծ բյուջեներ: Երկու թիմեր մոտ էին Չեմպիոնների լիգայում և Եվրոպայի լիգայում հայտնվելուն: Վատ բան չեմ տեսնում:

- Ինչպե՞ս եք գնահատում Չեխիայի հավաքականի ներուժը:
- Եթե նայենք վիճակագրությանը, ապա այն մեր օգտին չէ: Չեխիան լավ թիմ է և դա արդեն ապացուցել է Հայաստանում: Բայց ես Երևանում նշել էի, որ այդ խաղն այնպիսի խաղ էր, որում հաղթելու էր այն թիմը, որն առաջինն էր գոլ խփելու: Շատ գրավիչ ֆուտբոլ է ցուցադրում Չեխիայի հավաքականը:

- Ձեր՝ «Ով առաջինը գոլ խփի, նա էլ կհաղթի» արտահայտությունը դարձել է թևավոր խոսք: Կբացատրե՞ք, թե ի՞նչ եք ցանկանում դրանով ասել:
- Ես դա ասել եմ՝ հաշվի առնելով խաղի ընթացքը: Ժամանակակից ֆուտբոլում շատ բարակ է հաղթանակի և պարտության միջև եղած գիծը: Շատ փոքր բաներ ազդում են խաղի վրա: Հասարակ մի բան. երբ գոլ ես խփում, սկսում ես ավելի վստահ գործել, իսկ մրցակիցը, ընդհակառակը, սկսում է նյարդայնանալ, ավելի անհաջող գործել: Նույն՝ Դանիայի հավաքականի հետ խաղում մեր խփած արագ գոլը փոխեց խաղի ընթացքը, քանի որ դիմակայող թիմը փոխում է մարտավարությունը:

Հ.Գ.- Ավելացնենք, որ երեկ երեկոյան Հայաստանի ազգային հավաքականը նախախաղային մարզում է անցկացրել Պրահայի «Էդեն Արենա» մարզադաշտում: Թեթևակի նախավարժանքից հետո հավաքականի ֆուտբոլիստները երկկողմանի խաղ են անցկացրել: Հավաքականի հետ Պրահա ժամանած բոլոր 23 ֆուտբոլիստները կազմ ու պատրաստ են խաղին:
Հիշեցնենք, որ Չեխիա-Հայաստան հանդիպումը կկայանա Պրահայի «Էդեն Արենա» մարզադաշտում, սեպտեմբերի 6-ին և կսկսվի Երևանի ժամանակով 20:00-ին: