Ձեր վստահելի աղբյուրը

«Ազատագրենք հուշարձանն օլիգարխից» քաղաքացիական նախաձեռնությունը Երևանի քաղաքապետ Տ. Մարգարյանի, ՀՀ մշակույթի նախարար Հ. Պողոսյանի, ՀՀ անշարժ գույքի կադաստրի պետ Ե. Զախարյանի, ՀՀ գլխավոր դատախազ Ա. Հովսեփյանի, ՀՀ ոստիկանության պետ. Վ. Գասպարյանի անուններով «Հայփոստի» Սարյան 22 հասցեում գտնվող բաժանմունքից նամակներ ուղարկեցին: «Այս մարմինները պետք է հաշվետվություն տան, թե առ այսօր ինչ են արել ապօրինի շինարարությունը կանխելու, Փակ շուկան աղավաղելու համար: Այս բոլոր մարմիններն իրենց գործառույթներն ունեն այս հարցում, իսկ մենք էլ հասարակական հաշետվության կարիք ունենք»,- ասաց նախաձեռնության անդամ Վարդան Հակոբյանը:

Պատասխանելով այն հացրին, թե արդեն բազմաթիվ անգամներ տարբեր կազմակերպություններ, անհատներ նամակներով դիմել են այդ կառույցներին՝ պետության կողմից պահպանող հուշարձանը՝ Փակ շուկան փրկելու համար, այդ դեպքում ի՞նչ երաշխիք, որ այս նամակների կպատասխանեն կամ դրական արձագանք կլինի, Վ. Հակոբյանն ասաց. «Քանի դեռ չի հայտարարվել, որ մենք Հանրապետություն չենք, հույս ունենք, որ Հանրապետությունում գործող օրենքների շրջանակներում հարցը լուծում կստանա: Իսկ երբ հայտարարվի, որ Հանրապետություն չենք, ասենք՝ թագավորություն ենք, կամ խանություն, կամ ֆեոդալական պետություն, այդ ժամանակ չենք գրի այս նամակները, կմտածենք ուրիշ քայլերի մասին, որոնց միջոցով հնարավոր կլինի վերադարձնել շուկան իր նախկին տեսքին»:

Նամակում գրված է.
«Ձեզ բոլորիդ քաջ հայտնի է, որ 2013 թ. հունվարի 1-ից ցայսօր հանրապետության զանգվածային բոլոր լրատվամիջոցներով ու նաև Ձեզ հասցեագրված բազմաթիվ նամակ-ուղերձներով իրազեկվել ու բողոքարկվել է Երևանի Մաշտոցի պողոտայի վրա գտնվող և հանրապետական հուշարձանների շարքում դասվող Ծածկած շուկան սեփականատիրոջ կողմից բարբարոսաբար վնասելու մասին: Ձեզ հայտնի է նաև, որ Ծածկած շուկայի սեփականատերը երկու անգամ տուգանվելուց հետո անգամ չի անսացել պետական ատյանների հրահանգներին ու ոչ միայն համառորեն շարունակել է ապօրինի վերակառուցումը, այլև հայտարարել, որ սույն թվականի սեպտեմբերի կեսին ամենայն շուքով ու հանդիսությամբ կազմակերպելու է ապօրինի շինությունը շահագործման հանձնելու արարողությունը:
Փաստորեն` ձեր աչքի առաջ տեղի է ունենում հանրապետական հուշարձանը դիտավորյալ կերպով վնասելու հրապարակային գործողություն, ինչը ՀՀ քրեական օրենսգրքի 264 հոդվածով նախատեսված հանցագործություն է, մինչդեռ դուք անգործության եք մատնվել և ըստ էության նպաստում եք այդ հանցագործությունը ավարտին հասցնելու գործին` վերածվելով հանցակիցների:
Վերը նշվածի հաշվառմամբ ձեզանից ակնկալում ենք պատասխաններ ստանալ հետևյալ հարցերին.

1. Ինչո՞ւ կրկնակի տուգանքից հետո անգամ չկանխվեց հանրապետական հուշարձան Ծածկած շուկայի ապօրինի վերակառուցումն ու վնասումը:

2. Ինչու մինչ օրս քայլեր չեն ձեռնարկվում հանրապետական հուշարձանը վնասելու ձևով քրեական հանցագործություն կատարած անձանց քրեական պատասխանատվության ենթարկելու ուղղությամբ:

3. Ի՞նչ իրավական հիմքերի վրա է Ծածկած շուկայի կառուցապատողին իրավունք վերապահվելու շահագործման հանձնել իր անշարժ գույքը հանրային սպասարկման նպատակով, եթե այն հիմնովին վերակառուցվել է առանց սահմանված կարգով համաձայնեցված ու հաստատված ճարտարապետաշինարարական նախագծային փաստաթղթերի, առանց շինթույլտվության. առանց շինարարության որակի տեխնիկական ու հեղինակային վերահսկողության ապահովման:

4. Պետական լիազոր մարմինների ո՞ր պաշտոնյաներն են, որ պետք է վավերացնեն ապօրինի վերակառույցի շինարարության ավարտական ակտը, եթե առկա չեն շինթույլտվության հիմքերը:

5. Հնարավոր է արդյոք, որ ՀՀ անշարժ գույքի պետական կադաստրը փաստագրի ու օրինականացնի այլակերպված պատմամշակութային հուշարձանը առանց վերակառուցումը փաստարկող ավարտական ակտի:

6. Եվ, վերջապես, գիտակցում են արդյո՞ք ծածկած շուկայի բարբարոսության գործառույթում ներգրավված ու դեռ ներգրավվող պաշտոնյաները, որ այս ամենը չի մոռացվելու ու վաղ թե ուշ նրանք բոլորը հայտնվելու են արդարադատության առջև՝ հատուցելու համար ազգային մշակույթին հասցված նյութական ու բարոյական վնասը»:

Նշենք, որ բացի փոստով, նամակները հանձնվելու են նաև բոլոր նշված մարմիններին առձեռն: