Ձեր վստահելի աղբյուրը

Վերջին տարիներին Հայաստանում սեռական բնույթի հանցագործությունների կտրուկ աճ է գրանցվել. այս տարվա ութ ամիսների կտրվածքով արդեն իսկ գրանցվել է նման հանցագործությունների 59 դեպք: Նմանատիպ հանցագործությունները կանխելու նպատակով ԱԺ պատգամավորներ Դավիթ Հարությունյանը և Նաիրա Զոհրաբյանը խորհրդարան են ներկայացրել «ՀՀ քրեական օրենսգրքում փոփոխություններ կատարելու մասին» օրինագիծը, որն առաջին ընթերցմամբ քննարկվեց սեպտեմբերի 9-ին:

Նախագծով առաջարկվում է վաղեմության ժամկետն անցնելու հետևանքով քրեական պատասխանատվությունից ազատելուն վերաբերող հոդվածում լրացում կատարել, որի համաձայն անչափահաս տուժողի նկատմամբ սեռական անձեռնմխելիության և սեռական ազատության դեմ ուղղված հանցանք կատարած անձի նկատմամբ վաղեմության ժամկետի հաշվարկը կսկսվի տուժողի տասնութ տարին լրանալու պահից: Այսինքն`անչափահասը սեռական բնույթի բռնի գործողություն կատարելու համար բռնություն իրականացնողի հանդեպ պատիժ կարող է պահանջել չափահաս դառնալուց հետո և սեռական բնույթի հանցագործությունների վաղեմության ժամկետի հաշվարկը պատգամավորներն առաջարկում են սկսել զոհի չափահաս դառնալու պահից:

Պատգամավորները նաև առաջարկում են, որ բռնաբարության և սեռական բնույթի բռնի գործողությունների մասին հոդվածներով նախատեսված հանցակազմերին ավելացնել նաև նույն արարքը «ակնհայտ հղի» կնոջ նկատմամբ կատարելը:

ԱԺ պատգամավոր Ռուզան Մուրադյանը օրինագիծը ներկայացնող պատգամավոր Դավիթ Հարությունյանից հետաքրքրվեց, թե ինչ է նշանակում «ակնհայտ հղի կին», ինչին ի պատասխան Դավիթ Հարությունյանն ասաց, որ դա այն դեպքն է երբ հղիության մասին կարելի է իմանալ կնոջ արտաքինից:

Նախագծով առաջարկվում է նաև որպես արարքի առանձնապես վտանգավոր նոր տեսակ սահմանել համապատասխան արարքը (բռնաբարություն կամ սեռական բնույթի բռնի գործողություն) կատարելը երեխայի նկատմամբ այն անձի կողմից, ում վրա դրված է նրա դաստիարակության կամ խնամքի պարտականությունը`այսինքն ծնողի կամ մանկավարժի կամ ուսումնական կամ բուժական կամ դաստիարակչական հաստատության աշխատակցի կամ այլ անձի կողմից, ում վրա դրված է նրա դաստիարակության կամ խնամքի պարտականություն: Նմանատիպ դեպքերի համար նախագծի երրորդ մասի սանկցիայով նախատեսվում է 3-ից 7 տարի ժամկետով ազատազրկում: Նախագծի հեղինակները առաջարկում են նաև սանկցիայում նախատեսված հիմնական պատժի հետ միասին սահմանել լրացուցիչ պատիժ` որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելը երեք տարի ժամկետով:

ՀՀ Քրեական օրենսգրքի 140-րդ հոդվածով նախատեսված արարքի`սեքսուալ բնույթի բռնի գործողություններին հարկադրելը, որակյալ հանցակազմ է սահմանվում այդ արարքը ակնհայտ տասնվեց տարին չլրացած անձի նկատմամբ կատարելը` նախատեսելով ավելի խիստ պատիժ` ազատազրկում 5-ից 12 տարի ժամկետով: Առաջարկվում է տասնութ տարին լրացած անձի կողմից տասնվեց տարին չլրացած անձի հետ սեռական հարաբերությունը կամ սեքսուալ բնույթի գործողություններ կատարելու դեպքում որպես որակյալ հանցակազմ նախատեսել միևնույն անձի նկատմամբ պարբերաբար կատարելը, ինչպես նաև նույն արարքը կատարելը մի խումբ անձանց կողմից կամ քսանմեկ տարին լրացած անձի կողմից: Նշված որակյալ հանցակազմերի առկայության պարագայում առաջարկվում է սահմանել ավելի խիստ պատիժ` 4-ից 10-ը տարի ժամկետով ազատազրկում: