Ձեր վստահելի աղբյուրը

«Եվրամիության հետ Ասոցացման համաձայնագրի ստորագրման դեպքում ազատ առևտրի գոտու ստեղծման օգուտները կարող են զրոյացվել, եթե Մաքսային միությունը Հայաստանի նկատմամբ կիրառի իր շուկան պաշտպանելու միջոցառումները, որի մասին հայտարարվել է»,- այսօր լրագրողների հետ հանդիպմանը ներկայացնելով Մաքսային միությանը Հայաստանի միանալու վերաբերյալ Զարգացման եվրասիական բանկի հետ համատեղ իրականացված տնտեսական հաշվարկները, նշեց Հայաստանի պետական տնտեսագիտական համալսարանի Տնտեսամաթեմատիկական մեթոդների ամբիոնի վարիչ, տնտեսագիտության դոկտոր, պրոֆեսոր Աշոտ Թավադյանը:

Վերջինս իր այդ պնդումը հիմնավորեց այն վնասներով, որ Հայաստանը հնարավոր է ունենա Ռուսաստանի էներգակիրների գների բարձրացման, Ռուսաստանից եկող տրասնֆերտների կրճատման, ռուսական ներդրումների նվազման, ներկա տրասնպորտային շրջափակման խորացման, եվրոպական շուկայի բաց լինելու դեպքում իսկ հայկական ապրանքների մուտքի դժվարությունների և այլ գործոնների արդյունքում:

ԵՄ հետ ազատ առևտրի գոտու ստեղծման առումով նա առանձնացրեց եվրոպացի փորձագետների մատնանշած ռիսկերը` Թուրքիայի հետ փակ սահման, Հայաստանի տնտեսության կախվածություն հումքի արտահանումից, կոռուպցիա և եվրոպական ստանդարտներ: Տնտեսագետը վստահություն հայտնեց, որ Թուրքիայի հետ փակ սահմանի հարցի լուծումը անորոշ է, իսկ կոռուպցիայի, հումքի արտահանման ու եվրոպական ստանդարտների ռիսկերի լուծումը բացառապես պյամանավորված է երկրի ներքին խնդիրների լուծումից, որից հետո միայն կարող է ԵՄ հետ տնտեսական ինտեգրումը ցանկալի արդյունքներ տալ:

«Բացի այդ չի լինում ապրանքների, ծառայությունների և կապիտալի ազատ տեղաշարժ` առանց մարդկանց ազատ տեղաշարժի, ինչը Եվրամիությունը Հայաստանի հետ չի նախատեսում»,- ասաց բանախոսը:

Պրոֆեսորը կարևորեց Եվրամիության հետ առանձին ոլորտներում տնտեսական սերտ համագործակցությունը, ինչպես, օրինակ, Նորվեգիան է իրականացնում` ելնելով իր տնտեսական շահերից: Տնտեսագետը, միաժամանակ, կարևորեց եվրոպական նորմերի ու արժեքների ընդունումը, կիրառումը, և համոզմունք հայտնեց, որ Մաքսային միությանը միանալը դրան չի կարող խոչընդոտել:

Panorama.am-ի հարցին, թե Մաքսային միությանը միանալու խոչընդոտը համարվում էր ընդհանուր սահմանի բացակայությունը, ապա այժմ արդյոք վերացե՞լ է այն և ինչպե՞ս է դրա հնարավոր վնասները փոխհատուցվելու, տնտեսագետը պատասխանեց, որ այդ հարցը հստակ դրվել է և սահմանի բացակայության հնարավոր վնասների փոխհատուցումը կլինի մասնավորապես էներգակիրների գնի իջեցումով:

Իսկ հարցին, թե փաստորեն ՀՀ քաղաքացին Մաքսային միությունում կապրի ավելի լա՞վ, Ա. Թավադյանը պատասխանեց. «Հայաստանի քաղաքացին կապրի տնտեսապես ավելի անվտանգ, իսկ ՀՆԱ-ի ավելի մեծ աճի պարագայում կապրի ավելի լավ»:

Նախորդող` Ա. Թավադյան. Մաքսային միությանը միանալը կապահովի Հայաստանի տնտեսական անվտանգությունը