Կոնգրեսի հունական խմբի համանախագահները սատարում են Հայոց ցեղասպանությունը ճանաչող բանաձևին

Հասարակություն 13:22 12/09/2013

Կոնգրեսի հունական խմբի համանախագահները սատարում են Հայոց ցեղասպանությունը ճանաչող բանաձևին

ԱՄՆ Կոնգրեսի հունական խմբի համանախագահներ Մայքլ Բիլիրակիսը և Քերոլին Մելոնին սատարում են Ներկայացուցիչների պալատի Հայոց ցեղասպանությունը ճանաչող բանաձևին հանուն ճշմարտության ու արդարության (H.Res.227): Այս մասին տեղեկացնում է Ամերիկայի Հայ դատի հանձնախմբի (ANCA) պաշտոնական կայքը:

«Միանում ենք հայ-հունական կոալիցիայի մեր գործընկերներին ու հուսով ենք, որ բանաձևը կընդունվի, ինչպես նաև Թուրքիայի հանդեպ արդարություն կհաստատվի, որը մեղավոր է հայերի, հույների, ասորիների ու այլ քրիստոնեա ազգերի ցեղասպանությունում: Հույները, հայերը, ԱՄՆ մեր բոլոր համաքաղաքացիները, բոլոր նրանք, ովքեր ձգտում են ամերիկյան գաղափարներին, անհամբեր սպասում են այն օրվան, երբ պետք է Սպիտակ տունն, ի վերջո, դադարի աջակցել Անկարայի ժխտողական քաղաքականությանն ու կոչ անի թուրքական հանրությանն ու պետությանը ստանձնել այդ ոճրագործությունների բարոյական ու նյութական պատասխանատվությունը»,-նշել է Ամերիկայի Հայ դատի հանձնախմբի տնօրեն Արամ Համբարյանը, վերջինս նաև շնորհակալություն է հայտնել կոնգրեսականներին:

Նշենք, որ 227-րդ բանաձևը կոչ է անում ԱՄՆ նախագահին աշխատել անաչառ, կառուցողական, կայուն և ամուր հայ-թուրքական հարաբերությունների ստեղծման ուղղությամբ` հիմնվելով Թուրքիայի Հանրապետության կողմից Հայոց Ցեղասպանության ընթացիկ հետևանքների և փաստերի ամբողջական ճանաչման և մարդկության հանդեպ այս հանցանքի արդար, ազնիվ և համապարփակ միջազգային լուծման վրա:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: