Ձեր վստահելի աղբյուրը

Նախախորհրդարանի մամուլի խոսնակ Վարուժան Ավետիսյանին ծեծի ենթարկելու փաստով հարուցվել է քրեական գործ: Ոստիկանությունից մանրամասնում են.

Վարուժան Ավետիսյանը ոստիկանության Կենտրոնականի բաժնում սեպտեմբերի 4-ին հաղորդում էր տվել, որ սեպտեմբերի 2-ին, ժամը 17.40-ից 17.50-ի սահմաններում, Երևանի Հյուսիսային պողոտայի միջնամասում Արմեն Աղայանը, Արմեն Մկրտչյանը և 3-4 անհայտ անձինք վիճաբանել են իր հետ, ծեծի ենթարկել և պատճառել ֆիզիկական ցավ:

Ոստիկանության հաղորդմամբ, դեպքի առթիվ 11.09.2013 թ. ոստիկանության քննչական գլխավոր վարչության Երևանի քննչական վարչության Կենտրոնականի քննչական բաժնում ՀՀ քրեական օրենսգրքի 117 հոդվածով հարուցվել է քրեական գործ և կատարվում է նախաքննություն:

Նշանակված դատաբժշկական փորձաքննության եզրակացության համաձայն՝ «Վ. Ավետիսյանի մարմնական վնասվածքները վերին շրթունքի սալջարդ վերքի և արյունազեղման ձևով, պատճառվել են բութ առարկայի ներգործությամբ, հնարավոր է նշված ժամանակին և հանգամանքներում, որոնցից արյունազեղումը առողջության թեթև վնասի հատկանիշներ չի պարունակում, սալջարդ վերքը՝ առողջությանը պատճառել է թեթև վնաս՝ առողջության կարճատև քայքայումով, նկատի ունենալով վնասվածքի հետ անմիջական պատճառական կապի մեջ գտնվող հետևանքների տևողությունը՝ ոչ պակաս վեց օրից և ոչ ավել քսանմեկ օրից»:
Նախաքննություն շարունակվում է:

Նախորդող հրապարակումներ`

Նախախորհրդարան. «Մեր մամուլի խոսնակի վրա հարձակվել են Հայազն կուսակցության յոթ-ութ անդամներ»

Ա. Հովհաննիսյան. Անձնական հարաբերությունների հիման վրա համաշխարհային դավադրության մասին մեկնաբանություններ չենք անում

Ա. Սորոկին. Ես մտահոգված եմ Երևանում բողոքի ակցիաների ժամանակ խաղաղ հավաքների իրավունքի հնարավոր ոտնահարմամբ