Աշխարհահռչակ Յուրի Բաշմետը Երևանում. Շնորհավոր ծնունդդ, Մաեստրո
Հայ հանդիսատեսը սովոր է` մշակութային իրադարձությունների առումով աղքատիկ ամռանից հետո գալիս է առատ սեպտեմբերը, երբ հայկական բեմում մեկը մյուսի հետևից հյուրընկալվում են աշխարհահռչակ երաժիշտներ:
Նրանց թվում ալտահար, դիրիժոր Յուրի Բաշմետի անունը քաջ հայտնի է հայ հանդիսատեսին, ավելին` Բաշմետը սիրված է Հայաստանում, միշտ սպասված հյուր է ու թերևս հենց այդ պատճառով հերթական իր այս այցի շրջանակում նա ոչ միայն պարգևատրվեց ՀՀ նախագահ Սերժ Սարգսյանի կողմից Պատվո շքանշանով, այլ նաև «Երևանյան հեռանկարներ» 14-րդ միջազգային երաժշտական փառատոնի շրջանակում Արամ Խաչատրյան համերգասրահում մասնակցեց իր իսկ 60-ամյա հոբելյանին նվիրված համերգին:
Մինչ հանդիսատեսը անհամբեր սպասում էր մաեստրոյի հետ հանդիպմանը, Յուրի Բաշմետը` Պատվո շքանշանով, հանդիպեց էլ ավելի անհամբեր լրագրողների հետ, որոնք, սակայն, այդպես էլ չկրողացան վերջինիս իրենց հարցերն ուղղել` ժամանակը չէր ներում: Մամուլի ասուլիսն էլ տևեց ուղիղ այնքան ժամանակ, որքան հարկավոր էր, որ դիրիժորը սև սուրճ ըմպեր ու նաև պատմեր Հայաստանի հանդեպ տածած իր վաղեմի սիրո մասին…
Բաշմետը հասցրեց կիսվել ոչ միայն իր վառ տպավորություններով, որ կապված են մեր երկրի հետ, մասնավորապես թե ինչպես նա ծանոթացավ ու սիրեց դուդուկը, այլև նշեց, որ հայերեն ոչ մի բառ, ցավոք, չի հասկանում և ոչինչ չհասկացավ այն ամենից, ինչ մինչ իրեն խոսք տալը լրագրողներին ասաց փառատոնի նախագահ և գեղարվեստական ղեկավար Ստեփան Ռոստոմյանը.«Ես ընդամենը երկու անգամ լսեցի Բաշմետ, մեկ անգամ ինչ-որ բառ, որ նման էր «տեռորիզմ» բառին և մի անգամ էլ «տանկ» բառը... Մտածեցի` տանկեր, տեռորիզմ.... ի՞նչ կապ ունեի տեռորիզմի հետ»,- կատակով իր խոսքը սկսեց աշխարհահռչակ դիրիժորը:
Յուրի Բաշմետը պատմեց, որ շատ է սիրում Երևանը և ամեն անգամ ինքը վառ տպավորություններով է հեռանում մեր երկրից: Անգամ, շարունակեց նա, եղել են դեպքեր, երբ ինքնաթիռը սպասում էր, բայց ինքը ցանկություն չուներ հեռանալու:
Եվ այս այցը ևս իր համար հագեցած է վառ տպավորություններով, քանի որ նա ծանոթացավ երկրի ղեկավարի հետ.
«Ես ծանոթացա ձեր երկրի ղեկավարի հետ և շատ ուրախ եմ, բայց ոչ միայն նրա համար, որ նա ինտելիգենտ է, գեղեցիկ շարադրում է իր մտքերը, այլ որովհետև նա սիրում է իր երկիրը: Եվ դրանով նա ինձ շատ մոտ է, որովհետև ես էլ շատ սիրում եմ իմ երկիրը և իմ նախագահը ևս շատ է սիրում իր երկիրը: Եվ վերջին շրջանում նրանք կարծես ավելի մտերմացան... ես կարծում եմ` դուք երջանիկ մարդիկ եք, կատարել եք ճիշտ ընտրություն»,- իր խոսքում ասաց Յուրի Բաշմետը` ավելացնելով, որ նա շատ ուրախ էր սպասվող համերգից, որ հանդիպելու է Երևանին ու հայ հանդիսատեսին, բայց պարզվեց, որ նրան հյուրընկալելու է երկրի ղեկավարը ու պարգևատրելու:
Խոսեց նաև հայ կոմպոզիտորների հետ համագործակցությունից, հիշատակեց, մասնավորապես, Էդուարդ Միրզոյանի, Դավիթ Խանջյանի հետ ընկերական հարաբերությունների մասին, ու հիշեց դուդուկի հետ իր ծանոթությունը. «Հերթական այցիս ժամանակ` մոտ 15 տարի առաջ, ես ուղղակի խելագարվեցի դուդուկից: Եվ համերգներ ունեցանք, համատեղեցինք ալտն ու դուդուկը... տիեզերական էր, անկրկնելի այդ համատեղությունը: Ես գտնում եմ, որ դուդուկը անմահ է» ,- ընդգծեց նա:
Հավելեց, որ հայ երաժիշտների ու հայկական երաժշտության հետ իր փոխհարաբերությունները երբևէ չեն ընդհատվել ու նաև հորդորեց երիտասարդ կոմպոզիտորներին ակտիվ լինել, գեղեցիկ երաժշտություն գրել, քանի որ ինքը պատրաստ է դրանց ծանոթանալ և ինչու չէ` կատարել:
...իսկ համերգը, ինչպես միշտ, մոգական էր. Շուբերտի, Շնիտկեի, Ստրավինսկու և մեծն Չայկովսկու ստեղծագործություններից հետո Բաշմետը, ինչպես միշտ, դասական երաժշտական երեկոյի լրջությունը հրամցրեց ժամանակակից երաժշտության ներկայացմամբ: Այս անգամ դա աշխարհում թերևս ամենից շատ կատարվող երգերից մեկի` «Happy birthday to you»-ի տարբեր վարիացիաներն էին` անզուգական բաշմետական ոճով.... շնորհավոր ծնունդդ, Մաէստրո:
Նախորդիվ`
Սերժ Սարգսյանը Յուրի Բաշմետին պարգևատրել է Պատվո շքանշանով
Լրահոս
Տեսանյութեր
Եթե Ադրբեջանը վստահ է, ինչո՞ւ է դատական գործընթացները դադարեցնելու մասին գաղափար առաջ քաշում
